Endamê Komîteya Rayberdişî ya PKKyî Murat Karayilan beşdarê bernameyê taybetî yê Stêrk TVyî bi û rojdem ercna. 

Qiseykerdişê ci ra beşêk wina yo:

''Ganî kurdî vera polîtîkaya înkar û çinkerdişî ya dewlete xo bipawê.Semedo ke Ataturkî seba Kurdîstanê xoserî soz dabi kurdî tewrê şerê dinya bi. La Peymana Lozanî de kurdan rê îxanet ame kerdene. Serewedaritişê Şêx Seîdî wina dest pêkerd. 1925î ra heta 1940î kurdî ameyî qetilkerdene, xora 1938 de Dêrsim de tertele ame kerdene.

1970an de Rayber Apo û têgêrayîşê azadîye vejîyayî werte. Pawitişê ziwanî zaf muhîm o. Dişmenî 1925 de planê Şark Islahatî de qala ziwanî kerda û vato 'Gamî ma tirkî bimusnê pêro kurdan, kurdkî wa vîr a şora.' Sey şarê kurdî bêguman  ganî ma wayîrê rûmet şeref, erdê xo vejîê la her çî ra verî ganî ma wayîrê ziwanê xo vejîyê.

Dişmenî tim hêrişê kurdkî kenê. Coka ganî ma wayîrê kurdkî vejîyê. Ma pêro ziwanan ra hes kenê la kurdkî binê tehlukeyî de ya. Ganî ma pêro lehçeyanê kurdkî bipawê. Tay dezgehî kurdkî pawenê. Karê nê dezgehan girîng ê. Ez înan rê sipas kena. Nê prosesî de tay partîyî ameyî pêser û mesele nîqaş kerde. No karê înan zaf ercîyaye yo.

Dişmen seba çinkerdişê kurdan verî dest erzeno kurdkî. Ez bi taybetî venga dadîyan dana ke kurdkî bimusnê domananê xo, keye û teber de bi kurdkî qisey bikerê. Ma xeberan de vînenê Amed de ge ge ciwanî bi tirkî qisey kenê. Paytextê Kurdîstanî de ti çira tirkî qisey kenî, çi hewce yo? Ganî bi tewirê şorişgêrî ma wayîrê ziwanê xo yê dayîke vejîyê.

Hêrişê vera cinî û ciwanan zêdîyayî. Êyê ke rayberîya paradîgmaya Serek Apoyî kenê cinî û ciwan ê. Rayberîye pê paradîgmaya xo azadîya cinîyan aver berde. Cinîyî hînî camêrdîye zî vurnenê. Rayberîye rolêkê winasênî dano cinîyan. Cinîyî pê paradîgmaya Rayber Apoyî bîyî wayîrê hêzêkê pîlî û tewrê têkoşînî bîyî.

Paradîgmaya Rayber Apoyî de şoriş pê 3 rengan yeno ercnayene; şorişê cinîyan, şorişê demokrasî û şorişê ekolojî. Pandemî ra dima her kesî girîngîya ekolojî dîye la rayberîye 20 serrî verî bale antbi ney ser. Hînî pêro dinya dî ke Rayber apo lîderêko senîn o. Coka sendîkayê xeylêk welatan wayîrê Rayber Apoyî vejîyenê, seba azadîya ci kampanyayan kenê.

Têkoşîno ke hetê cinîyan ê kurdan ra yeno kerdene azadîya pêro komelê kurdan a. Dewleta tirke zî wazena verê nê têkoşînî bigêra, cinîyan bitersna û asteng bikera. Dişmen tewr zaf cinîyan ê kurdan ra terseno.

Dewleta tirke nika zî xîret kena ke qoricîyan bikera kontra. Êyê ke qoricîtîye kenê zanenê ke dewlete ha înan şuxilnena. Coka zerrî ra nêkenê. Dewlete qoricîyan xapînena û vana 'PKK do bido şima ro.' La ma soz dabi ke ma do înan hedef nêkerê. Tay qoricîyî tewrê operasyonan benê, nobete gênê û tay çalakîyan de mirenê. La ma qestî ra înan hedef nêkenê. Wa qoricîyî zî hînî nêkewê dafika dewlete.

Dişmen PKKyî ra zaf terseno. Serê sibayî ra heta şanî vano 'teror ha teror.' Eke 'tay mendo' çira ê hende tersenê? Dişmen Heftanîn de tay giran de ca bîyo. La nê giran de kam ca kerdo? Qoricî û tay cergê sûrîyeyîjî. 

AKP, MHP, Ergenekon, Dogu Perînçek nê pêro faşîst û nîjadperest ê. Ê wazenê kurd û ereban bikerê kole. Coka şarê ma hîşyar bo û qoricîyî zî hayîdar bibê. Dewleta tirke wazena nê polîtîkayan Başûr de zî bikera. Ganî sîyasetmedarê Başûrî pê hişmendî û perspektîfêkê neteweyî têbigêrê.

Dewleta tirke wazena Başûr de şerê zereyî vila bikera. La ez pê bawer a ke a do nêresa nê armancê xo. Coka yewîya neteweyî zaf girîng a. Polîtîkaya birakûjî ya dewlete do bênetîce bimana. Ganî pêro welatperwerî vera ney têbigêrê.''