Endamê Komîteya Rayberdişî ya PKKyî Murat Karayilanî cewab da persanê Radyoyê Dengê Gelî. Qiseykerdişê Karayilanî ra qismê diyînî wina yo:

''Ewro şer û xoverdayîşê  Zap, Avaşîn û Metîna hem tarîxê Kurdîstanî de hem zî tarîxê şerê dinya de newe yeno vînayene. Nika xoverdayîşê Qilê Şehîd Munzurî yê Girê FMyî, Girê Cûdî, Girê Amediyê, xoverdayîşê tunelê Şehîd Doganî yê warê Sîda kewto serra hîrêyine. Nê xoverdayîşî Herêmanê Pawitişî yê Medya de, yanî Hefatanî ra heta Xakurkê erazîyêke de sey şerêkî yenê rayraberdene. Dewleta tirke kena ke herêmêka tampon biafirno û cayanê stratejîkan ê Başûrê Kurdîstanî îşxal bikero. Vera nê gerîlayî xoverdayîşê tarîxîyî kenê. No xoverdayîş çar serrî yo dewam keno. Bitaybetî bi tunelanê şerî û tîmanê erazî Zap, Metîna û Avaşîn de şer dewam keno.  No xoverdayîşêko tarîxî yo. Zap de şero giran est o. Nika şero ke bi tîmanê erazî û tunelî yeno rayraberdene tarîxê şerî de pelo newe akerdo. Bêşik pîya bi nê taktîk û metodan Gerîlayê Azadîye yê Kurdîstanî bi ruhê fedayî yê Apoyî destan afirnenê. Qehremanîya gerîlayan eşkena biba babeta romanan. Gerîlayanê Azadîye yê Kurdîstanî bi têkoşînê xo mojnenê ke ê bin nêekwnê û eynî wextî de mojnenê ke îradeyê merdimî eşkeno se bikero.

Dişmen rixmê heme îmkananê teknîkî, leşker, ajan û çeteyanê ci yê kurdan vera Gerîlayanê Azadîye yê Kurdîstanî bi tewirê tersûnêkî çekanê qedexeyan şuxilneno. Bitaybetî hewteyê peyênî de Qilê Şehîd Munzurî yê Girê FMyî de her roje çekê qedexeyî û gazê kîmyewîyî yenê şuxilnayene. Ge ge teqayîşê zaf pîlî û ke jehr vila kenê yenê kerdene. Nê zî sey taktîk nukleerî yê. Embazê ma vera nê xover danê. Mesele tunelanê Sîda de embazî têna xover danê û tarîx nusenê. Aqibetê ê embezan se beno wa bibo qehremanîya înan ameya îspatkerdene.

Dewleta tirke tewr peynî de hêzê PDKyî zî tede Muhafizê Sînorî yê Iraqî berdî nêzdîya ci. Dewleta tirke Heftanîn û Zap de cayê ke tepiştî nê cayên de baregehê leşkerî viraştî. Seba ke gerîlayan ra tersenê her ca de nêeşkenê vinderî.  Cayanê winayênan de Muhafizanê Sînorî yê Iraqî ca kenê. Yewna karê înan çîn o, têna semedê paştdayîşê dewleta tirke yenê cakerdene. Belka dinya de çîyo winayên çîn o. Yanî artêşêka xerîbe ameya herra to îşxal kerda, ti zî şinî bi hêzê xo yê leşkerî aye pawenî. Çi heyf ke artêşa Iraqî ha nê psozîsyonî de ya û pawitişê artêşa tirke kena. Artêşa tirke Başûrê Kurdîstanî û herra Iraqî îşxal kena. Bi qala kilme ûca rewşêka zaf têmîyankewtîye est a.

Têkoşînê ma do dewam bikero. Eke nê têkoşînî ra nêbîyênî îşxal heme Herêmanê Pawitişî ra ameyêne vilakerdene. Reyna beno ke tay cayan de hêrişê îşxalî yê neweyî bêrê destpêkerdene. Xora 16ê nîsane ra nata Metîna de bi metodêkê neweyî parçe parçe kenê ke erazî de cayê xo hîra bikerî û aver şirê. Reyna yeno pawitine ke Metîna de rojanê verê ma de hêrişê hîrayî bêrê kerdene. Beno ke vera Qilê Baharî û xeta Xakurkê-Xinerê hêrişê îşxalî bêrê averberdene. Ma pê bawer ê ke dişmen do cewabê xo bîgêro.

Ma verî zî vatbi; Dewleta tirke têna nêeşkena vera gerîlayan şer bikero. Coka kesanê ke semedê ci şer kenê semedê ci mirenî, şuxilnena. Vakurê Kurdîstanî de qoricîyî est ê. Wezîfeyê înan pawitişê dewe yo. Xora nameyê înan zî qoricîyê dewe yo.  Nika dewleta tirke înan sey şervananê profesyonalan şuxilnena û sey leteyêkê artêşa gena dest. Nika Vakurê Kurdîstanî ra qoricîyan ane Başûrê Kurdîstanî. Mesela nika Çewlîgî ra, Sêrt, Mêrdîn û Amedî ra qoricîyî ardî. Înan Metîna, Zap û Heftanîn de ca kenê û fînenê mîyanê şerî. Ma sey HPGyî coka veng da. Wa merê! Eşkera yo ke dişmen wazeno şerî bikero şerê kurdan. Wazeno kurdan biverdo pê. Nêwazeno leşkerê ci bimirê. Xora kenê ke pêşmergeyan zî bikerî mîyanê şerî. Ma reyna veng danê qoricîyan ke wa merê tewrê şerî mebê.''