Fermandarê Qerargehê Merkezê Pawitişê Şarî (MPŞ) Murat Karayilanî serrgêra yewine ya şehadetê ci de Şemseddîn Mele Îbrahîm (Ebû Ciwan)o ke 13ê nîsana 2021î de korona ra dinyaya xo bedilnabî, bi mesajêkî yad kerd.

Mesajê Karayilanî bi kilmî wina yo:

''Wefatê kesê sey Ebû Ciwanî ma rê vînîbîyayîşêko pîl o. Ebû Ciwan Rayber Apoyî reyde derbazê herême bi, fikrê Rayberîye şinasna û pê bawer kerd. Heta roja peyêne zî ey seba fikranê Rayber Apoyî têkoşîn kerd. Ebû Ciwan mîsalê embazîya duruste ya bi Rayber Apoyî bi. O perwerê erd, welat û azadîye bi.

Ez ey nêzdî ra şinasnena û ma pîya zaf xebatî kerdbî. O welatperwerêko zanaye bi. Ey Akademîya Mahsum Korkmazî de Rayber Apoyî reyde perwerde dî û Hesekê bi welatperwerêko erjîyaye. Averşîyayîşê Şorişê Rojawanî de rolê kesanê sey Ebû Ciwanî zaf ê. O şehîdê kede yo. Ma pê bawer ê ke keyeyê ci û pêro şarê Hesekê do tim perwerê dewaya ey bibê û bi xurtî tewrê şorişî bibê.

Ma reyna anê ziwan ke ked û xizmetê Ebû Ciwanî xo vîr a mekerê û tim wayîrê keda ey vejîyê, layîqê vîrameyîş û şarê ma bibê. Nê esasî ser o reyna ez keyeyê ey ra serweşîye wazena û şarê ma rê serkewtiş wazena.''