Endamê Komîteya Rayberdişî ya PKKyî Murat Karayilan beşdarê 'Bernameyê Taybetî' yê Stêrk TVyî bi û pare kerd ke 31 rojanê hêrişanê îşxalî yê dewleta tirke e hêzê gerîlayan 95 reyan Heftanîn de vera artêşa tirka çalakîye kerde.

Karayilanî vat: ''236 leşkerê tirkî ameyî kiştene, 18 zî birîndar bîyî labelê hûmara naye ra zêdêr a. Hetê bînî ra 6 helîkopterê bi tîpê kobrayî ameyî pirodayene'' Karayilanî destpêkê qiseykerdişê xo de 33 qurbanê Qirkerdişê Pirsûsî yad kerdî. Karayilanî dima zî serrgêra Şorişê Rojawanî fîraz kerde û şexsê Xebat, Çekjîn, Gelhat, Arîn, Avesta û Karker de pêro şehîdê şorişî yad kerdî.

Qiseykerdişê Karayilanî ra beşêk wina yo:

''Sere de dewleta tirke tay hêzî hêrişê Şorişê Rojawanî kenê. Dormeyê şorişî ame girewtene. Çira? Çunke kurdî uja de bîyî wayîrê statuyî. A diyîne demokrasî ame caardene. A hîrêyîne cinîyî bîyî azad. Rejîmê AKPyî pê nînan qayîl nîyo. Ganî Şorişê Rojawanî bêro pawitine. Eke wina nêbo pêro destkewteyê kurdan yenê çinkerdene. Xîretê yewîye yê PYD û ENKSî xeylêk girîngê. Ganî nê xîretî zêdêr bêrê pawitene.

Heftanîn

Heftanîn de girêk çin o ke dişmen pê vînkerdişan xo resneno ci. Her ca de ke xo resnayo ci şer esto. Her tim darbe wenê û hesab danê. Şerê Heftanînî şerêko hewayî û teknîkî yo ke dewleta tirke wazena bi sayê teknîkê hewayî Heftanîn îşxal bikera. 17ê hezîrane ra heta 17ê temmuze ez eşkena bîlançoya şerê Heftanînî eşkera bikera; 31 rojan de embazanê ma 95 çalakîyî kerdî, 236 leşkerê dişmenî kişîyayî, 18 birîndarê înan estê. La hûmare zêdêr a. Yanî raşta zî şerêko giran qewimîyeno. dişmen şoq û mat bi. Mesela Xantûr de vat qey çew nêmend la derbê giranî werdî.

Netîceya ke Heftanîn de vejîyaye were wina ya; şerwanî bi îrade û jîhatî eke bi hawayêkê profesyonelî têbigêrî eşkenî teknîkê dewirî çin bikerî, eşkenê vera ci şer bikerê. Nê şerî no vet meydan. Gerîlayê Heftanînî gerîlayê dewirê neweyî yê. Taktîk û metodanê nweyan anê ca. Rast o ke dişmen ameyo xo resnayo tay giranê Heftanînî. La gerîlayê Heftanînî Heftanîn de yê. No metodêko newe yo. Pê nê metodî ma wazenê şer daîmî bikerê. Embazê çalakîyan kenê. Xoverdayîşê Heftanînî seba ma bi tecrube.

Dewleta tirke seba ke destkewteyanê pêro kurdan çin bikera têgêrena. Ma sey gerîlayanê PKKyî qerardar ê ke vera dişmenî wurzê payan ser. Başûr de zî nika seba ke çimê şarî bitersna dewleta tirke hêrişê sivîlan kena. Vanê gerîla uja de yo, la ma uja de nîyê. Ganî şarê ma bizano ke fermanê dişmenî seba pêro kurdan derbazdar o.

Ma eşnawit ke Amedîyê de seba notirîye tay kombîyayîşî ameyî kerdene. Înşalah na xebere raşt nîya. Ganî çew şaşîyêka winasêne nêkero. Kurdî pêro heman keştîye de yê. Dişmenan sînorêk vist mabênê ma. La kurd û Kurdîstan yew ê. Oyo ke Kurdîstan parçe kerd ma nîyê. Medyaya Başûrî vana 'şerê mabênê dewleta tirke û PKKyî'. La PKK seba çi şer keno? Gerîlayê ma Heftanîn, Geliyê Pisaxa, Perex, Qesrok û Şeşdarê de yê. Eşkenê çanteyê xo bigêrê û şorê. Çira nêşinê? Seba rûmet û welatperîye! Eke dişmen ameyo erdê ma ma do erdê xo bipawê. Nika dewleta tirke hêrişê pêro kurdan kena. Ma vera naye îtîraz kenê.
 PKK wazeno kurdî wa pê nasnameyê xo biciwîyê. Dewleta tirke hêrişê Rojawan û Başûrî kena. Gelo armancê aye têna PKK yo? Yanî şero ke qewimîyeno mabênê kurdan û dewleta tirke de yo. Ma ewro mesuldarîye gênê xo ser û şarê xo pawenê.

Ma wazenê şarê ma yê Başûrî paştî bido ma. Heta ke dewleta tirke nê erdî ser o pak n3ebo ma rehet nêkenê. Pê tewir û qiseyanê nerman pê vatişê 'ma dostê yewbînan ê' verê kolonyalîzmê Tirkîya nêno girewtene.

Ma nêzanenê kombîyayîşê Amedîye raştikin o yan ney. Ma hêvîdar ê ke raşt nîyo. La eke raşt o no zî felaket o. Wa kes pê dafika Tirkîya nêxapîyo. Dewlete wazena ma yewbînan qir bikerê. Wa çew meraq nêkero dewleta tirke nêeşkena xo biresna uja. Tîya de şerêko gran estoç Asan nîyo. Ma tîya de nameyê kurdan ser o cewab danê şovenîzmê dewleta tirke. Ma wazenê ma pîya wurzê payan ser, paştî bidê yewbînan. Na meseleyêka neteweyî ya.

Ê kesê ke seba yewîya neteweyîye û Kurdîstanî xîret kenê ez înan rê selam kena. Bi taybetî ez pêşmergeyanê Dêrînî rê selam kena. Ez ê kesan rê ke twrê kampanyaya îmza benê selam kena. Ez tewirê şarê Şêladizê rê selam kena. Eke ma bibê wayîrê tewirêkê neteweyî ma do qet qel nêbê.''