Fermandarê Qerargehê Merkezê Pawitişê Şarî (MPŞ) Murat Karayilanî bi wesîleya 1ê Gulane pê rayîrê hacetê têkilîye  hêzanê gerîlayan ê Metîna, Zap û Avaşînî reyde qisey kerd. Karayilanî 1ê Gulane fîraz kerd û wina qisey kerd:

''Rayberîya partîya ma PKK de dewa karker û kedkaran a Kurdîstanî pê têkoşînê şarî û gerîlayan resa asta tewr berze. Seke zanîyeno  menga gulane heman wextî de  menga şehîdan a. Ma şexsê embaz Hakî Karerî de şehîdanê şorişgêran ê Kurdîstanî bi hûrmet û minetî yad kenê. Ma do wayîrê vîrameyîşê înan vejîyê. Vera îşxalê tirkan Herêmanê Pawitişî yê Medya de xoverdayîşêk yeno kerdene. No xoverdayîş normal nîyo, tarîxî yo. Nika Avaşîn, Zap û Metîna de têkoşînê şarî manadar beno. Hetê sîyasî û leşkerî ra netîceyê ney do girîng bibê. 

Dewleta tirke şarê ma û şaranê herêmî ser o hesabanê gemarinan kena. Seba caardişê nê hesaban şer kena. La heta nika ser nêkewte. Nika zî dewleta tirke wazena Herêmanê Pawitişî yê Medya de şer giran bikera, gerîlayan zî herême ra veja û leşkeranê xo herême de ca bikera. Wazena herêmêka tampone viraza, warê stratejîkî îşxal bikera û bi nê hawayî destkewteyanê kurdan bikera binê kontrolê xo. Na rewşe seba ereban û pêro şaranê herême gefêko pîl o.

Dewleta tirke, îqtîdarê AKP-MHPyî qels bîyê. Seba ke emrê xo derg bikero îqtîdar hêrişê Herêmanê Pawitişî yê Medya keno. Eke ser nêkewo rejîmê îqtîdarî do birijo. Yanî şerê Zap, Metîna û Avaşînî şerê demokrasî yê Tirkîya yo. 

No şer têna pawitişê herêmêke nîyo, şerê ameyox, estbîyayîş û azadîya şarê ma yp, şerê demokrasî yo. Coka ma wazenê ser bikewê. Ganî ma rîskan bigêrê, fekadarî bikerê. Wa pêro embazî bizanê ke bira ma wina ya. Nika dişmenê ma qels o ma eşkenê nê îmkanî bişuxilnê. 

Xoverdayîşo ke 8 rojî yo dewam keno netîceyê giranî xo reyde ardî. Par Heftanîn de, sibate de Garê de xoverdayîş ame kerdene. 8 rojî yo Mamreşo, Şehîd Serdar, Kela Bêdewê, Cîloyê Biçûk û Zendûra de xoverdayîş reyna yeno kerdene. Ma vera teknolojî dewrê 21î afernenê. Coka netîceyê ke heta nika ameyî afernayene seba ma xeylêk girîng ê.

Embazî nika her çeper, her tunel, her binê dare de kelecanîn ê. Ê seba xo vanê 'Ma artêşa pîle ya diyîne ya NATOyî yê, destê ma de her tewirê teknîkî estê.' Xora ê têna nîyê, hetê înan de cergê Sûrîye estê. Rixmê nînan seba ke gerîlayê çêrî cewab danê înan ma dî ke dewleta tirke nêeşkaye biresa armancê xo.

Goreyê agahîyanê ke embazî danê nika Girê Şehîd Dilgeşî û Avaşîn de 4 embazê ma yê çêrî şehîd bîyî; embaz Çîyager, Dilşêr, Ekîn û Asya. Ma reyna înan bi rêzdarî yad kenê. Gerîlayanê ma hêrişê hewayî û erdî kerdî pûç. Reyna goreyê agahîyanê embazan 120 leşkerê dişmenî kişîyayî, 2 helîkopterî ameyî pirodayene. Nê netîceyê pîlî yê. Şerê 8 rojan de kêmasîyê ma çî yê? Ganî ma kêmasîyanê xo bivînê, çareser bikerê. 

Ma ser kewtî la embazî wa pê serkewtişî serxweş nêbê. No hema destpêk o. Ganî ma baldar bibê. Dişme çend rojî yo raştê xoverdayîşê ma yeno. Ma do dişmen wina çin bikerê. Seke mi vat gerîlayê modernî ewro Kurdîstan de vera dişmenî dinya rê bibo mîsalêk.

Ganî ma bimojnê her kesî ke teknolojî sena yena pûçkerdene. Coka ganî sey qerargeh ma û dima embazî fedakarîye bikerê. Çi hewce keno ma bikerê. Ganî ma firsendê serkewtişî nêdê dişmenî. Hêzê Başûrî bi rikdarî bara nê şerî de benê seykerdox. Tersenê ke vera dişmenî vengê xo berz bikerê. Na zî mesele nîya, wa hetkarîye nêdê dişmenî, destek nêdê zî beno. 

Hêzanê Hewayî yê Şehîde Delale Kanî Masî de 2 derbî dayî dewleta tirke ro. Hêzanê Şehîd Bedran Gundikremoyî zî Şeladizê de derbe daye hêzanê tirkan ro. 2 tankî ameyî îmhakerdene û tay leşkerî kişîyayî. Nê di çalakîyî seba hîşyarî yê. Yanî nê hêzê ke verî Başûr de ca bîyî wa tênêgêrê, ganî tewrê nê şerî nêbê, na hîşyarî bîye. Eke nê hêzî tewrê şerî bibê her ca de do bibê hedefê hêzanê ma. No îmkan esto. Ma pê bawer ê ke na peymana ma do biresa cayê xo.

Ma bawer kenê ke hayîya pêro embazan pê na girîngîya prosesî esta. Embazî pê mesuldarîya xo zanenê, zanenê ke senî têbigêrê. Nê hetî ra ma embazan rê bawer kenê. Ma pêro embazanê ke xoverdayîşê azadkerdişê Rayber Apoyî û Kurdîstanî de ca gênê fîraz kenê. 

Ganî derbê hewcedarî dişmenî rê bêrê pirodayene. Koyanê Zagrosî de xoverdayîşêko tarîxî esto. Ganî embazî bizanê ke ewro Kurdîstan de tarîxêko newe nusîyeno. Coka ganî no rayraşîyayîş rayraşîyayîşê çêrî bo. Na çarçewe de ma bawer kenê ke embazî nê rayraşîyayîşê fîrazî de serfîraz bibê. Bi na wesîle ma pêro embazan rê serkewtiş wazenê.''