Fermandarê Qerargehê Merkezî yê Pawitişê Şarî (MPŞ) Murat Karayilan bi meymanê 'Bernameyê Taybetî' yê Stêrk TVyî. Karayilanî cewab da persanê Arjîn Feratî û tay meseleyî ercnayî.

Qiseykerdişê Karayilanî ra beşêk wina yo:

''Ez embaz Kasim Engîn yad kena. 31 serran ra nata ma yewbînan şimasnayêne. Embaz Kasim fermandarêk, tarîxnasêk, fîlozofêk û nuştoxêk bi. Ewladê Kurdîstanî bi. Kasim Engîn şehîd kewt la herinda ey de bi hezaran Kasim Engînî do bêrê.

Dewleta tirke nêwazena yewîya neteweyîye ya kurdan bêra awankerdene. Çunke zaf tersena.Xora her kes bala xo bido eşkerayîyanê peyênan ê Mevlut Çavuşogluyî vîneno ke dewleta tirke çita ya. Eşkerayîya aye YNK,ENKS, PDKyî rê gef waneno. Madem dişmenî ma rê gef wanenê ganî ma yewîye de israr bikerê. Înan derheqê operasyonê Heftanînî de zî vanê operasyonêko cîya yo. Vanê no operasyon seba ke Başûr û Rojawan bêrê yewkerdene, yeno kerdene. Bi hawayêkê eşkerayî vanê operasyon vera sîyasetê kurdan o, vera yewîya kurdan o.

Seba ke Şêladizê de serewedaritişê şarî esto hêrişê ci kenê. Heyfo ke 5 sivîlî merdî. Ez keyeyanê înan rê serweşîye wazena.

Ma dekewtî dewrêkê neweyî. Nê dewirî de hem Rojhelat, hem Vakur, hem Başûr û hem zî Rojawanê Kurdîstanî ganî dewirê neweyî baş fam bikerê. Dewaya azadîye ya kurdan ewro dekewte dewirêkê neweyî. Dewleta tike vera dewaya heqdare ya Têkoşînê Azadîye yê Kurdîstanî, vera statuyê şarê kurdî dest pê hêrişan kerd.Nê hêrişî hîra yê. Dewleta tirke qirkerdişê kurdan xo rê kerd armanc. Wazena destkewteyanê şarê kurdî, statuyê şarê kurdî yê Başûrê Kurdîstanî û Rojawanê Kurdîstanî werte ra wedarê.Na stratejîya aye ya. Ma rewşêka newîye reyde têrî yê. Stratejîya înan a nimite zî îşxalê 'Mîsak-i Mîllî' ya. Başûrê Kurdîstanî de verê yewîya kurdan gênê, wazenê hêzê kurdan yewbînan de şer bikerê. Armancê înan o bîn zî no yo ke wazenê Başûrê Kurdîstanî de herêmêka tampone awan bikerê. Operasyonê Heftanînî zî destpekê ney o. Par îşxalê Lêlikanê amadekarîya ney bi. Wazenê herême îşxal bikerê.

Tay hêzan vera nê hêrişan tewirê xo mojna. La Neteweyê Yewbîyayeyî, Amerîka bêveng ê. Gelo TC eşkayêne bêxebera nînan hêrişê herême bikero? Na babetêka girîng a. Nika her kes fikrê Hukmatê Başûrê Kurdîstanî mera keno. Gelo tewirê Başûrî yê vera hêriş û awankerdişê herêma tampon senî yo?

Par Nêçîrvan Barzanîyî wexto ke dewleta tirke Serêkanîyê îşxal kerd vatbi meseleya dewleta tirke kurdan reyde çin a PKKyî reyde esta. Ez nika Birêz Nêçîrvan Barzanî rê vana ke wa şoro biewno Serêkanîyê. Gelo uca da kurdî, namus û şerefê kurdan mend? Gelo rewşa kurdan a Efrînî senîn a?Uja de zî qirkerdiş esto. Wa ke dewleta tirke nêpawo, wa raştîya AKP-MHPyî bivîno. Ê PKK xo rê kenê bahane hêrişê şarê ma kenê.

Dişmanan vat operasyonê Heftanînî ra verî 4 embazê ma şehîd bîyî ke aslê xo de 3 yê. Embaz Şahîn, Çîya û Tolhildan pê îxbarê ajanan şehîd bîyî. A şewe zî embazî Mazlûm û Egîd şehîd bîyî. Ma nika ra vînenê ke netîceya nê şerî do senî biba. Xoverdayîşo ke heta nika Heftanîn de ame mojnayene, eşkera keno ke Xoverdayîşê Cengê Heftanînî do tarîxî bibo. Sere de şarê ma yê Başûrî, ganî şarê kurdî bizano ke ma do heta peynî şer bikerê. Ma do Heftanînî ra fek vera nêdê. Nameyê fedayîyanê Apoyî ser o ma soz danê ke ma do her parçeyê Kurdîstanî bi hawayêkê fedayî bipawê. Nameyê PKKyî ser o ma do nê şerî bikerê. Ma venga şarê xo danê ke paştî bido ma.

Raşt a zî Mexmûr de hûmarêka qijkeke ya hêzê xopawitişî esta. Seba ke şarê Mexmûrî DAÎŞî ra bipawo no hêz uja de yo. Hêzêko winasên nîyo ke gef biwano, yan zî pê teyarayan bêro bombayan ver.

Şingal de hêzêkê ma çin o. Ma nê YBŞ Şingal de yo.Tay kesî xîret kenê ke YBŞ sey PKK bimojnê. Tay êzidîyî zî nankorîye kenê. Ma şarê ma êzidîyan pawit, seba înan korîdor kerd a. La hema zî ma rê neheqîye kenê. Ma Nîsana 2018î de xo Şingalî ra tepîya ant. Nika uja de têna YBŞ/YJŞ estê.

Balkêş o ke DAÎŞî zî sey dewleta tirke waştbi Şingal û Mexmûr de qirkerdiş bikero. Armanca înan yew a. Eşkera yo dewleta tirke waşt ke awil Şingal û Mexmûr dima pêro Başûrê Kurdîstanî îşxal bikera.

Eşkerayo ke emser şer do hîna zehmet bibo.

Vakurê Kurdîstanî de hem çalakîyê gerîlayan hem zî çalakîyê xopawitişî estê. Rejîmo faşîst ê AKP-MHPyî şerêkê psîkolojîk û hîrayî keno. Ganî nê çalakîyî bizêdîyê.Dewleta tirke vera şarê ma hêrişanê qirkeran kena. Ma şaranê Ewropa û Rûsya ra wazenê ke sey turîst mêrê Tirkîya. Çunke her quruşê şima çeka vera kurdan a.

Dewaya ma heqdar û meşrû ya. Ma do teslîm nêbê û xo ver bidê. Ciwanê kurdî, ciwanê sosyalîstî, demokratî ganî zêdêr têkoşîn bikerê. Ma zanenê ke nika zaf ciwanî wazenê tewrê gerîlayan bibê. Êyê ke wazenê eşkenê tewrê gerîlayan yan zî YPSyî bibê.

Ma venga her ciwanêkê kurdî, welatperwerî û demokratanê Kurdîstanî û Tirkîya danê ke vera rejîmê faşîstî çalakîyan bikerê. Wext wextê çalakîyan o. Ganî her kez nê dewirî de wayîrê wezîfeyanê xo bivejîyo. Her kes xo bikero milîtanêk. Eke bi nê hewayî bibo ma do teqez ser bikewê.''