Fermandarê Qerargehê Merkezê Pawitişê Şarî Murat Karayilanî pê hacetê bêtelî venga gerîlayanê ke Zap, Avaşîn û Metîna de şer kenê, da.

 Qiseykerdişo ke Gerîla TVyî weşanayo, tede Karayilanî bale ante nê babetan ser:

''Dişmenî armanc kerd ke 2022 de verî Herêmanê Pawitişî yê Medya îşxal bikero, dima zî verê xo bido Rojawnaî. La nê 3 mengan de dişmen nêeşka ser bikewo. Dişmenî pêro rayîrî şuxilnayî. Dişmenî Girê Cûdî, Girê FMyî, Girê Hekarî, Çemço û Girê Amedîyê de derbê pîlî werdî. Dişmenî tarîxê xo de, reya verêne vînîbîyayîşê pîlî werdî. Embazanê ma heta nika 1700 îşxalkerî ceza kerdî.

Goreyê bîlançoya HPGyî 72 embazê ma şehîd bîyî. La tay embazan ra xebera ma çin a. Beno ke 80-90 şehîdê ma est bê. Eke ma teknîkê dişmenî pûç bikerê, bi prfesyonelî têbigêrê, kêmasîyan peyda nêkerê eşkenê bi temamî dişmenî bin bikerê. Embazê ma nika Zap, Avaşîn, Girê Cudî, Girê FM, Girê Hakkarî û Girê Amediyê de bi qehremanî şer kenê.Embazê ma yê cinîyî zî xo mîyan de qehremanan nimnenê. Şexsê Şaristan, Mizgîn, Çiya, Avzem, Viyan, Nalîn, Dîdar û Berfîne de çimê dinya serê embazanê ma yê cinîyan de yo.

Ma eşkenê bi zelalî vajê ke dişmen rew ra bin kewto la binkewtişê xo qebul nêkeno. Çunke eke îtîraf bikero rejîmê AKP-MHPyî rijîyeno. Eke dişmen seke Garê de vat vajo 'Ma nêeşkayî ser bikewê' do bi temamî ma do ser bikewê û rejîm do birijîyo. No do bibo roşanê şaranê Kurdîstan û Tirkîya, verê azadîya Rayber Apoyî abibo. Dişmen coka şer de israr keno. Ma zanenê ke nika tay zehmetîyî bi taybetî tay cepheyan de est ê. La eke ma bi metodanê Apogîran têbigêrê do dişmenî ser bivisnê.

Dişmeno ke teng bîyo hêrişê sivîlan keno. Tewr peyên dişmenî Zaxo de 9 sivîlî qetil kerdî. Şarê Başûrî û Iraqî narey bi hawayêkê qetî nînan rê vat 'bes o.' Dişmen vano 'PKKyî kerdo' la her kes zaneno ke dewleta tirke kerdo.

Xoverdayîşê Zap û Metîna nika têkoşînê ma de rolêkê pîlî ano ca û do bîyaro ca. Ganî pêro eyaletê Vakurê Kurdîstanî bi xurtêrî paştî bidê Herêmanê Pawitişî yê Medya. Ganî her kes tewrê nê prosesî bibo. No cinî, ciwanan, sosyalîst, demokratanê Kurdîstanî û dostanê kurdan rê yew vengdayîşê xoverdayîşî yo. Ganî dormeyê xoverdayîşê Zap, Metîna û Avaşînî de ma xoverdayîşê neteweyî û demokrasî pîl bikerê. Ma hêvî kenê ke no xoverdayîş do vera pîl bibo.

Dişmen wazeno bi teqaberanê qewetînan tunelanê şerî birijno ke mîyanê nê teqaberan de nukler û termobarîk est o. Dişmenê ma namerd û tersnek o coka vera ma pêro metodan ano ca. Dewleta tirke cenazayanê xo zî dano bombayan ver. La pê şerê Apogîran nêeşkeno. Beno ke dişmenî tay cayî vistî xo destî la vera şerê Apogîran teng bîyo. Eke embazê ma tunelan de vera kîmyewîyan û teqaberan tedbîranê xo bigêrê dişmen nêeşkeno netîce bigêro. La ma vînenê ke na babete de tay kêmasîyî est ê. Dişmeno ke pê kîmyewî û teqaberan ser nêkewto, nika Şikefta Birîndaran û Werxelê de keno ke pê kepçe û dozeran netîce bigêro. Ganî ma metod û rayîranê pawitişî de, tunelan de xo aver berê, hîna bi baldarî têbigêrê. Reyna şerê tîman ma rê zaf girîng o. Eke şerê tîman de qelsîyêke virazîya dişmen do verê xo bido tunelan. Dişmen nika seba ke dormeyî kontrol bikero kamerayanê mobese şuxilneno teyarayanê keşfî nê. Yan zî dronan şaweno, tîmanê nimiteyan waran de ca keno. Eke ma xonimitişî aver berê, kêmasîyanê xo ser de vinderê eşkenê nê metodanê dişmenî pûç bikerê.

Dewleta tirke têna nê şerî de nê cara mîyanê tengîye de ya. Nêrazîbîyayîşê Iraqî yê vera Qirkerdişê Zaxoyî ra dima dewletê dinya zî Tirkîya nêzdî ra teqîb kenê. Hetê bînî ra xora ma zî tay zehmetîyan ancenê, ge ge şehîdan danê. La ma zanenê ke fedakarîya Apogîre, felsefeya Rayberîye reyde cewabê her zehmetîye est o û embazê ma cewabê lazimî danê.

Ge ge kêmasî û xeletîyî benê. Mîsal embazê fermandarî ganî her şertî mîyan de serkêşîye bikerê. Wa fermandarî bi ruhê kolektîfî embazan bîyarê yewca, tewrê ekîp û kolektîfî bikerê. Wexto ke yew mesele virazîyena, şehadet qewimîyeno zî wa pêro embazî sey fermandarêkî/e têbigêrê. Ganî wextanê winasênan de her kes yewbînan fam bikero, temam bikero. Mîyanê pêro zehmetîyan de pê ruhê fedayî yê Apogîrî têbigêrê.

Şerê ma ewro resayo safhayêka girînge. Ganî ma hêzê xo bipawê, fedakarî bikerê û dişmenî bin bivisnê. Ma mecbur ê ke nê xoverdayîşê tarîxîyî berz bikerê. Seba ke ma hêvîyanê Rayber Apoyî, dadîyanê Kurdîstanî û şaranê herême rê bibê cewab îmtîhanêkî de têrî yê. Eke ma nê îmtîhanî xo ser ra bierzê do berê serfîrazîye abibo. Na babete de mesuldarî kewena ma milî. Ma do rayraşîyayîşê azadîya Kurdîstanî û Rayberîye bikerê. Nê esasî ser o ma embazanê xo yê cepheyanê xoverdayîşî selam kenê, înan rê serkewtiş wazenê.''