Endamê Komîteya Rayberdişî ya PKKyî Murat Karayilanî cewab da persanê Radyoyê Dengê Welat. Semedo ke roportaj hêrişanê îşxalî yê vera Garê ra verî amebi kerdene tede na babete ca nêgêna.

Qiseykerdişê Karayilanî ra beşêk wina yo:

''Seba şar û têgêrayîşê ma 15ê ê sibate rojêka reş a. Şexsê Rayber Apoyî de vera şarê ma û têgêrayîşê ma komployêk ame kerdene. Wezîfeyê ma yo verên çinkerdişê komployî yo. Heta ke ma nê wezîfeyî temam bikerê ser nêkewenê. Rayber Apoyî seba ke meseleya kurdî çareser bikerê şibi Ewropa û uca de maruzê nê komployî bi. Yanî hêzanê komplogeran nêwaşt ke meseleya kurdî çareser biba. Coka komplo vera pêro kurdan o. Pê xoverdayîşê Rayber Apo, têgêrayîş û şarê ma komplo bênetîce bi.

Komplo bi temamî nêame binkerdene. Nika yeno waştene ke komplo gandar bibo. Xeta Komployê Mîyanneteweyî vera têgêrayîşê ma hêrişanê xo dewam keno. Komplogeran waştbi ke Rayber Apo Zîndanê Îmraliyî de aqilê xo biperno. Sîstemê Îmraliyî sîstemê îmha yo. La Rayberê ma rixmê nê hêrişan Paradîgmaya Neteweya Demokratîke awan kerde. Rayberê ma 22 serrî yo bi hawayêkê bêhempayî vera îşkenceyî xo ver dano. Eke komplo ser bikewo şarê kurdî do bêro qirkerdene. Coka xoverdayîşê vera komployî têkoşînê estbîyayîş û azadî ya.

Pê paradîgmaya neteweya demokratîke Rayber Apoyî verê xeniqîyayîşê dinya girewt. Na paradîgma çareserîyêka newî ya. Şorişê Rojawanî de tesîrê na paradîgma dîyenê.

Ewro pêro dinya de kedkar, sendîkawan û rêxistinê komelê sivîlî wayîrê Rayber Apoyî vejîyenê. Rayber Apo pê paradîgmaya xo cewabê pêro şaranê dinya dano. Brîtanya ra heta Afrîkaya Başûre seba Rayber Apoyî kampanyayî virazîyenê.

Rayber Apo sey Mandela pêro dinya de bîyo sembol. Rejîmê TCyî rejîmê Apartheidî yê Afrîkaya Başûre ra zulmkar o. Ewro Tirkîya de Erdogan û Bahçelî rejîmê Apartheidî anê ca. Rayber Apo pê paradîgmaya xo sînorê Kurdîstan û Rojhelatê Mîyanênî ra derbaz bîyo, lîderê dinya bîyo.

Çalakîyê seba azadîya Rayber Apoyî zêde nîyê. Ma hem hetê vilakerdişê fikranê Rayberîye de hem zî têkoşînê azadîya Rayber Apoyî de kêm mendî. Azadîya kurdan û Rayber apoyî girêdayîyê yewbînan a. Ma têkoşîn çend xorin bikerê azadîye hende lez visîyena destî. Seba azadîya Rayber Apoyî heta nika ewladanê nê şarî zaf bedelî û kede dayî. Tewr peyên xoverdayîşê zîndanan ê 2019î de 9 şehadetî qewimîyayî. Nika reyna zîndanan de, Kampanê Lavrio û Mexmûrî de grevê vêşanîye esto. Ez bi na wesîle înan rê serkewtiş wazena.

Hemleya 'Wext wextê azadîye yo' hemleyêka girîng a. La ganî her kes bi xurtî tewrê na hemle bibo. Xora Rojawan, Ewropa û waranê bînan de xoverdayîşêk esto. La oyo girîng xoverdayîşê Vakurê Kurdîstanî yo. Ganî Amedî ra heta Wanî welatperwerî bivejîyê kuçeyan. Xora gerîlayî tewrê na hemle bîyî û do zêdêr xo bimojnê.

Dinya de zî xeylêk kes û dezgehî tewrê hemle bîyî. Dewaya kurdan bi nê hawayî bena global û no çîyo girîng o.Ewro dewlet tirke ya qirkere binê nameyê 'têkoşînê vera terorî' de NATOyî reyde vera kurdan şer keno. La ê Kurdîstan de terorê tewr pîlî kenê. Ma hê rûmet û şerefê şarê xo pawenê û pawitişê xo yê meşrûyî anê ca. No heqê ma yo fîraz o. Nika komplogerî dinya ser o vera ma şer kenê. Coka ganî têkoşînê ma global bibo.

Çalakîyê şarê ma yê Ewropa ercîyaye yê. Mîsal nika ciwanî rayraşîyayîş kenê ke tede enternasyonalîstî zî estê. Nê zimistanî de ê çalakîya xo anê ca. Ez înan selam kena. Reyna ma eşnawit ke Neteweyanê Yewbîyayeyan rê e-mailî erşawîyenê. Na çalakîyêka zaf girîng a. Ganî kurdî dezgehanê winan reyde têkilîye ronê. Mîsal eke girseyî verê kanalanê televîzyonî de yan zî verê parlamentoyan de eşkerayîye bidê, çalakîyan bikerê hîna hol beno. Ganî ma hînî dîrekt xîtabê rayaumûmîye bikerê.

Tewirê wendekaranê Bogaziçi kokê raştîya ciwananê tirkîya mojneno. Ganî kurdî paştî bidê xoverdayîşê Bogaziçi.

Operasyonê zimistanî

Operasyonê Amanosî operasyono 8. yê zimistanî ya dewlete bi. Nê operasyonan de dewleta îşxalkere hema zî nêeşkaye netîceyêke bigêra. Heta pêkewtişanê Koyê Agirî de zerarê înan zaf o. Înan Licê-Amedî ser o hende operasyonî kerdî la ppê çalakîyêke derbêka pîlî werde. Çalakîya Licê raşta zî çalakîyêka manadar bîye.

Bi kilmî artêşa îşxalkere operasyonanê zimistanî de bin kewte. Ê vanê Mêrdîn de koma embaze Rêberî ra 3 gerîlayî şehîd bîyî. Nê embazî operasyonanê zimistanî de şehîd nêbîyî. Nê operasyonê 'Eren'î nêeşkayî zerar bidê têgêrayîşê ma. Tîya ra fam beno ke embazî pê tedbîranê xo yê zimistanî heqê teknîkê dişmenî ra ameyî. Nika Amanos de operasyon dewam keno.

Wextê vîyarteyî de eşkera bi ke Amanosan de tay embazê ma yê qadroyî şehîd bîyî. Coka dişmenî waşt bala xo bido nê cayî ser û tira netîceyêke bigêra.

Ez şexsê Dilşêr Herekol û Harun Firatî de pêro şehîdanê xoverdayîşê Amanosî yad kena. Embaz Dilşêr birîndar bibi. Wexto ke embazan o uca ra vetêne dişmen pê hesîya û o zî pa embazanê bînan şehîd bi. Embaz Harun zî wexto ke museno embaz Dilşêr şehîd bîyo pa embaz Zinawî derbazê Peyanusî benı. Pêkewtişî ra dima uca ra derbazê Îskenderunî beno û uca de çalakîyêka fedayîye de şehîd beno. Embaz Zinar zî pêkewtiş de şehîd beno. Nê embazan bi hawayêkê fedayî bala xo dabi hedefanê xo. Tewirê înan zaf manadar o.

Embaz Dilşêr sey her kesî nêbi. Tarîx de ge ge tay kesî rolê pîlî anê ca. Embaz Dilşêr zî wina bi. Eke ê 12 gerîlayî 12 siwarîyê Derwêşê Evdî yê embaz Dilşêr zî Derwêş o. Şingalijan zî o wina pênase kerd û şehdetê ey ra dima merasîmê pîlî kerdî. Embaz Dilşêrî Şingal de şerê vera DAÎŞî de roja verêne ra nata rolêko pîl ard ca. Sey embaz Egîd Civyanî Şingal de kedê ey zî zaf ê. Ma zaf kewenê şehadetê nê embazan ver. Têgêrayîşê ma waştbi embaz Dilşêr uca ra vejo la heyf ke o şehîd bi. Ma do sozanê ke ma dabi Dilşêr û embazanê şehîdan bîyarê ca. Ez keyeyê ercîyayeyî yê şehîdê ma rê û şarê ma yê welatperwerî rê serweşîye wazenê.''