Endamê Komîteya Rayberdişî ya PKKyî Murat Karayilanî derheqê serrgêra 38. ya Hemleya 15ê Tebaxe de ANFyî rê qisey kerd. Qiseykerdişê Karayilanî ra beşêl wina yo:

''Hemleya 15ê Tebaxe pê komêka qije dest pêkerde la ewro pê bawerî, qerardarî û îdeolojîya Apogîre bîye pîl.15ê Tebaxe çimeyê hêzê xo yo, bawerîya îdeolojîke, bawerîya dewaya azadîya Kurdîstanî ya. Gerîlayî teqîbkerdoxê na bawerî yê. Mîsal wexto ke DAÎŞ vejîya gerîlayan ra ber çew nêeşka verê ci de vindero. Heta nika zaf reyî vajîya ke gerîlayî hê qedîyenê la nêqedîyê. Her ke şi gerîlayî aver şîyî. Bi taybetî 2018î ra nata ma projeyê newera awankerdişî vist dewre. Sey hêzêkê Hemleya 15ê Tebaxe ma pê serkewtişanê xo yê Garê, Zap û Metîna sereberz ê. Ruho fedayî yê 15ê Tebaxe hema zî xurt o û bitesîr o.

Nika ma pê xoverdayîşê Zap, Metîna û Avaşînî û pê serkewtişê Garê serra 38. ya Hemleya 15ê Tebaxe pêşwazî kenê. Ruho fedayî yê 15ê Tebaxe xurtêr bîyo, serwer bîyo. Bingeyê ma bingeyê fikr û îdeolojîya Apogîre yo. Tecrubeyê ma yê 37 serran şer de xo mojneno ra. Gerîlayî do serra 38. de zêdêr rolan kay bikerê û bibê cewab. 112 rojî yo Avaşîn de dewleta tirke rixmê hetkarîya NATOyî û teknîkê xo nêeşkena ser bikewa. Garê de hêzê ma cara eşkera bi. Rewşa Tirkîya ya avaşîn, Metîna û Zapî yê Garê ra do xirabêr biba.  Îradeyê gerîlayan verê plananê înan girewt. Înan vatêne qey mîyanê da des rojan de Başûr îşxal bikerê.

Dişmen acîzîya xo ra hêrişê kurdan keno. Wazeno kurdan lînç bikero, qetil bikero, bitersno. Seke zanîyeno Îzmîr û Konya de înan kurdî qetil kerdî.Nika zî vanê 'Şima daristanî vêşnayî.' Yew eleqeyê ma pê şewatê daristanan çin o. Kurdîstan de hende daristanî yenê vêşnayene key helîkopter ame ke şewat hewna bikero? Eqsê ci dewlete nêverdena şewatî hewna şorê. Tirkîya de se beno ê vanê 'PKKyî kerdo.' Bi nê hawayî dişmenîya kurdan kenê. Dişmen rayaumûmîye ra mergan nimneno.  Çalakîyê Gever, Qereqolê Amûdka û Çakmakliyî yê Dêrsimî îsbatê ney ê. La ê vera vanê 'Ma PKK Vakur de qedînayo.' Înan medya zî viste binê kotrolê xo û vera pê propagandaya xo kenê. No zî mojneno ke AKP-MHP hê Kurdîstan de çin benê.

Tirkîya vana a seba şerê vera PKKyî Başûr de ya. La çimê înan hê destkewteyanê pêro kurdan de yê. Soyluyî Şirnex de no îtîraf kerd vat 'Ma tîya ra şorê Iraq û Sûrîye.' Armancê înan caardişê Mîsak-i Mîllî yo. Ê armanc kenê ke key Peymana Lozanî biqeda sînoranê xo hîra bikerê. Eke wina nêbo ê çira Kerkûk de tirkmenan ca kenê û rêxistin kenê? PKKyî ra nêbîyêne Tirkîya rew ra Başûr îşxal kerdêne. Tay selahîyetdarê Başûrî pê fekê Tirkîya qisey kenê û vanê 'Wa PKK tîya ra vejo.' PKK bi serran Başûr de yo, bi hezaran şehîdî dayî. Hûrmetê ma hukmatê herême rê esto.

La raştîya Kurdîstanî esta. 40 serrî yo gerîlayî ê koyan de yê. Ma Başûrî ra vejîyê zî Tirkîya tira nêvejîyena. Wa her kes naye hol bizano. Wa şarê ma hol bizano ke PKK binê bara girane de yo, şer de yo, Rayberê ma esîr o, vera ma zulm û zorbazî esta, îşkence esto, embazê ma, kedroyê ma hê zîndan de yê, grevê vêşanîye de yê, kurdî kuçeyan de hetê dewleta tirke ra kişîyenê. Ma vera ney xo ver danê. Ma pê keyfê xo tênêgêrenê. Ma wazenê meseleya kurdan pê demokrasî çareser biba. Eke PDK dostê Tirkîya yo wa mesele çareser bikero. Eke wina nêbo na dostanîye raşt nîya. PDK heta ke PKKyî ra vano Başûrî ra veje wa hêrişanê Tirkîya şermezar bikero. Hêvîya ma sîyaset û hêzanê Başûrî ra na ya. Vera Başûrî îşxal esto. Ma vera ney şer kenê xo ver danê. No xoverdayîş xoverdayîşo neteweyî yo.

3 embazê ma nêzdîyê dewa Bêxme ya herêma Xalîfanî de bîyî. Dima ma nînan ra xeberêke nêgirewte. Nika ma pabeyê ci yê ke PDK derheqê nînan de eşkerayîye bido. Ma eşkerayîye daye, veng da. Ma waşt ke PDK aqîbetê înan ser o eşkerayîye bido. Ma wina waştêne ke PDK wa şerê vera dewleta tirke de hetkarîya ma bikero. La înan ma girewtî binê ablûqa, îstîxbarat da dişmenî, rayîrê ma girewtî. Ma wazenê meseleyanê xo pê dîyalogan çareser bikerê. PKK têgêrayîşêko îdeolojîk o. Tirkîya 40 serrî yo vera PKKyî şer kena la pê PKKyî nêeşkena. Wa PDK zî nê kerdişanê xo war verdo. Nê kerdişê ci têna dişmenî rê xizmet kenê.

Her roje çîyo giran beno. Ê heywananê gerîlayan diznenê benê. Çira PDK dest nano heywananê HPGyî û beno roşeno? Tirkîya ameya heta Zap, Metîna û Avaşînî. Gereka PDKyî hetkarîya ma bikerdêne û ma pîya vera dişmenî şer bikerdêne. La wina nêbî. Kurdî eşkenê ser bikewê, bibê îrade. Xoverdayîşo nikayên ê 3 mengan ney îsbat keno. Qet nêbo ma yewbînan ra ra zerar vîneno. La ma çen vajê zî eşkera yo ke netîce nêdana. Mi nêpawitêne ke na mesele resena na aste. Wa her kes wayîrê mesuldarîya xo vejîyo. Ez hînî nêwazena çîyêkê neweyî vaja. Ez hêvî kena ke aqîbetê embazanê ma wextêkê nêzdî de do zelal bibo. Ma nika pabeyê ney ê.''