Fermandarê Qerargehê Merkezê Pawitişê Şarî Murat Karayilanî bi mesajê vîdeoyî Roşanê Gandarbîyayîşî yê 15ê Tebaxe fîraz kerd.

Karayilan mesajê xo de nê çîyan ser de vindert:

''Ez Roşanê Gandarbîyayîşî yê her kesî fîraz kena. Ez ê Rayber Apoyî zî fîraz kena û selam û hûrmetê xo pêşkêşê ey kena. Ez şexsê Fermandar Egîd û Zîlane de pêro şehîdanê ma bi rêzî yad kena.

Hemleya 15ê Tebaxe vera qirkerdiş û qatlîaman hemleya estbîyayîş û azadîye bîye. Hemleya 15ê Tebaxe ronesansêk ard Kurdîstanî û şorişê fikran awan kerd. Ma sey gerîlayan 39 serrî yo kenê ke erjê demokrasî û şarê kurdî bipawê.  Dewleta tirke bi taybetî 8 serranê peyênan de vera ma hêrişanê giranan kena. Nê hêrişan de gerîlayan xoverdayîşê pîlî kerdî. Embazanê ma sey şagirtanê Fermandar Egîdî û hemrayanê Fazil Botanî ler kerd. 

Şarê ma yo ercîyaye û embazê ma yê ercîyayeyî;

Dişmenî seba ke Herêmanê Pawitişî yê Medya çin bikero hêrişê Zap, Metîna û Avaşînî kerd. Xoverdayîşê Zap, Avaşîn û Metîna tarîxê şarê ma de rîpelêko newe yo. Reya verên a hêzê kurdî heman cepheyî de 3 serran xo ver danê. Dişmenî nê hêrişan de çekê teknolojîkî, qedexekerdeyî, nuklerî û kîmyewîyî şuxilnayî. Rixmê ney zî embazanê ma pê xoverdayîşê xo tarîx de rîpelêko newe akerd. Yanî hêzêko qij la bi îrade bi mîsal ke senî eşkeno vera hêzêkê pîlî ser bikewo. Dewleta tirke rixmê destekê hêzanê mîyanneteweyîyan û kurdanê xayînan zî nêeşkaye netîceyêke bigêra. Nika şer uca de dewam keno. 

Dewleta tirke armanc kerdêne ke serra 100. ya Komare de gerîlayan biqedîna, Iraq û Sûrîye îşxal bikera. La gerîlayan verê ney girewt. Dewleta tirke seba seserra diyîne ya komare zî qirkerdişê kurdan xo rê kena esas, wazena Sûrîye û Iraqî ser o serdest biba û sînoranê Mîsaki Mîllî bîyara ca. Ganî ma vera ney bingeyê yewîya neteweyîye de xo rêxistin bikerê. Ganî şarê erebî û kurdî zî vera nê hêrişan îtîfaq bikerê û pîya têkoşîn bikerê. 

Şarê ma yo ercîyaye û hemrayê ma yê ercîyayeyî;

Tecrîdê vera Rayber Apoyî Kurdîstan de sey polîtîkaya qirkerdişî, Tirkîya de zî sey tecrîdê vera demokrasî û azadîye dewam keno. Eke ma tecrîdî nêşiknê demokrasî û azadîye do nêrê. 

Ma sey gerîlayanê azadîye kewtê serra 39. ya Hemleya 15ê Tebaxe. Her serrgêra Hemleya 15ê Tebaxe de ma sozî danê şarê xo û sey milîtananê Rayber Apoyî zî sozê xo anê ca. Ewro gerîlayî resayî astêka pîle. Gerîlayan îsbat kerd ke çew nêeşkeno înan bin bikero. Gerîlayî do tim şarê xo bipawê. Her çiqas tay kurdî hetê dişmenî de cagênê zî dişmen do nêeşko ma çin bikero! Wexto ke leşkerî yenê mezwîyanê ma ser û kişîyenê mesuldarê nînan ma ney dişmen o. Ma şerê pawitişî kenê û hêrişê çewî nêkenê. Gerîlayê azadîye yê Kurdîstanî do serra 40. de zî îsbat bikerê ke ê nênê binvistene û biresê asta gerîlayanê serfîrazîye. Hedefê ma no yo.

Gerîlayî serra 40. de do rolê xo bîyarê ca. Nê prosesî de ganî ma xeta Şerê Şarî yê Şorişgêrî bîyarê ca. Ganî şarê ma nê esasî ser o wayîrê erkanê xo vejîyo. Sere de cinî û ciwanî wa her kes erkê xo bîyaro ca û xo rêxistin bikero. Şarê ma wa yewîya xo bîyaro ca. Her parçe wa rêxistinîya xo bikerê, vera kerdişanê dişmenî bêveng nêmano û xo bipawo. Eke wina bikerê ma eşkenê azadîya Rayber Apoyî û Kurdîstanî bivisnê destî. Şarê ma hêzo tewr pîl o!Kurdîstan ancax pê têkoşînî azad beno. Eke her kes têkoşîn bikero o çax ma serra 40. de do ser bikewê.

Bi na hêvî û bawerî ma bi ruhê Hemleya 15ê Tebaxe her kesî rê serkewtiş wazenê. Ez reyna Roşanê Gandarbîyayîşî fîraz kena, her kesî rê selamê şorişgêrî û hûrmetê xo pêşkêş kena. Wa biciwîyo ruhê 15ê Tebaxe, biciwîyo Şerê Şarî yo Şorişgêr! Jin, Jiyan, Azadî! Bijî Serok Apo!''