Şarê Şeladizê hewteyêkê verî sere wedart û baregehê Tirkan fîna dest, wesayît û techîzatê leşkerîyî vêşnayî. PDK seba ke xo AKP’yî rê weş ramojno pîya bi MÎT’î cayo ke tede serewedartiş virazîyayo ûca hemverê PKK’yî de wazeno çalakîya hempare virazo.
DIMAYÊ EŞKERAYÎYANÊ BÊŞERMAN DE 130 DESTBENDKERDIŞÎ
Tîya ra nizdîyê hewteyêk verî şarê Şeladizê hemverê baregehê leşkerî yê dewleta Tirkan de sere wedart û baregeh fîna xo dest, wesayîtê leşkerîyî dayî verê adirî. Naye ser PDK seba ke dewleta Tirkan kêfweş bikero eşkerayîyê ke şarê ûcayî sûcdar ramojnenê dayî. Tayê selahîyetdarê PDK’yî seba ke xo dewleta Tirkan rê weş ramojnê eşkerayîyê bêşermî dayî. Dimayê nê eşkerayîyan ra Şeladizê, Amidîye de şaristenek û qezayî gîrîyayî binê ablûka. Yew roje dimayê serewedartişî ra seba ke kesê serewedartoxî bêrê tepiştene operasyon ame destpêkerdene. Heta nika nizdîyê 130 kesî ameyî tepiştene.
PDK’yî ê kesê ke tepiştê înan ra êyê ke nizdê YNK û Goranî yê bi dewrekewtişê partîyanê înan serbest veradayî. La êyê ke pabesteyê têgêrayîşê Tevgera Azadî yê vera nêdayî û eşîretî tehdît kerdî. Kesê ke destbend kerdî bi zorî înan hemverê Têgêrayîşê Azadîye de dayî qiseykerdene, nê medyay sosyale de vila kerdî, senî ke AKP wazena îdrak virazo wina kerd.
PDK, PÎYA BI MÎT’Î RAYRAŞÎYAYÎŞ ORGANÎZE KENO!
Ame zanayene ke PDK û MÎT’ê Tirkan o ke herême de serbest gêreno hemverê Têgêrayîşê Azadîya Kurdan de serê kayêkê leyminî de hemparîye kenê. Goreyê hayîdarîyanê çimeyanê cayî û baweran PDK û MÎT dimayo ke PDK’yî destbendkerdişê bi seyan kesan ra û înan medyaya sosyale ser o dayîş qiseykerdişî ra netîce nêgirewt, nika tayê eşîretê ke Şeladizê, Amedîye û Derelok de yê tehdît kerdî. Nê eşîretê ke ameyê tehdîtkerdene înan ser o zor ame kerdene ke tewrê rayraşîyayîşo ke do rojanê ameyoxan de hemverê estbîyayîşê gerîlayanê Kurdan ê herême de bêro organîzekerdene bibê, êyê ke tewrê ci nêbê do bi zor keyeyê xo ra bêrê berdene bi rayraşîyayîşî.
EŞÎRETA RÊKANÎ YENA TEHDÎTKERDENE
Ame zanayene tewr zaf eşîreta Rêkanî seba tewrê rayraşîyayîşî yo ke do rojanê ameyoxan de bi hemkarîya PDK û MÎT’î hemverê estbîyayîşê gerîlayanê HPG’yî yê herême de bêro viraştene bibo, amîya tehdîtkerdene. Eşîreta Rêkanî ra çar kesî hêrişê hewayîyî yê dewleta Tirkî ya roja 23’ê Çele ya hemverê Derelokî de ameybî kiştene. Şar zî dimayê nê qewimîyayîşî ra baregehê dewleta Tirkan ê herêma fînabi xo dest.
Sebebê tarîxkîyî yê hetê PDK û MÎT’î ra ameyîş tehdîtkerdişê eşîreta Rêkanî zî estê. Xîlafê mabênê eşîreta Rêkanî û PDK’yî bi vateyêkê hîna rastî yê mabênê Keyeyê Berzanî resenê serranê 1960’yan. Serra 1961 de seba ke Mela Mustafa Berzanîyî hemverê Abdulkerîm Kasimî de kîşta Abdulselam Arifî de ca girewt xîlafê mabênê înan dest pêkerd. Dimayê nê xîlafan ra hêrişê PDK’yî yê hemverê dewanê Rêkanîyan dest pêkerdî. 300 dewê Rêkanîyan hetê PDK’yî ra ameyî vengkerdene. Pêkewtişê mabênê Rêkanî û PDK’yî heta serra 2003 dewam kerdî. dimayo ke 2003 de DYA mudaxeleyê Iraqî kerd Mesûd Berzanîyî keyeyî dayî ê dormeyanê muxalifan zî. Bi na polîtîka êyê ke ameyî bicakerdene ra yew dezayê înan Ethem Berzanî bi, o bîn zî serekê eşîreta Rêkanî Mihemmed Axayê Kelhê bi.
Her çend Barzanî û Rêkanîyî seke pêameye biasê zî dimayê serewedartişê Şeladizê ra hedeframotişê PDK’yî yê na eşîre, ramojneno ke xîlafî hewna nêqedîyayê.
