Hemserekîya Konseya Rayberdişî ya KCKyî derheqê serrgêra Fermanê Şingalî yê 3ê Tebaxe de eşkerayîyêke daye. Eşkerayîye wina ya:

''7 serrî verî 3ê tebaxa 2014î de DAÎŞî vera Şingalî hêrişê qirkerdişî dayî destpêkerdene ke tede êzidîyî ciwîyayêne. Bi hezaran kurdê êzidîyî qetil kerdî, bi hezaran cinî û kênayê êzidîyî remnayî. Hema zî aqîbetê bi hezaran kênayan ê ciwanan û cinîyan nêzanîyeno. Ma êzidîyanê je Fermanê 74. de ameyî qetilkerdene yad kenê û reyna soz danê ke cinî û kênayanê esîran bixelisnê.

3ê tebaxa 2014î de DAÎŞî qirkerdişê êzidîyan kerd. Hêzanê ke seba pawitişê êzidîyan wezîfedar bîyî vera qirkerdişî de wezîfeyê xo nêardî ca. Êzidîyî qirkerdişî reyde têrî ameyî verdayene. Rayber Apoyî hêrişê DAÎŞî ra wextêkî verî pare kerdbi ke ganî perspektîfê pawitişê êzidîyan bêro ronayene. Ney ser o komêka gerîlayan a bi 12 kesî ver bi Şingalî kewtî rayîr. Nînan ra tay gerîlayî hetê PDKyî ra Şingal de tepişîyayî. Gelîyanê bînan zî vera hêrişanê DAÎŞî verê qirkerdişê temamîya êzidîyan girewt.Gerîlayan têna êzidîyî nêxelisnayî rûmetê Iraq û PDKyî zî xelisna.

Eke 12 gerîlayan verê qirkerdişî nêgirewtêne bi hezaran ciwananê êzidîyan zî pê ruhê Derwêşê Evdîyî no hêriş çin kerdêne êzidîyî qirkerdişî ra xelisnayêne. Semedo ke êzidîyî wayîrê xopawitiş û xoîdarekerdişî nêbîyî nê hêrişê qirkerdişî ameyî kerdene. Fermanê 74. îsbat keno ke xopawitiş û xoîdarekerdişê êzidîyan heqo bingeyî yo.  Nê hêrişanê qirkerdişan û rotişê bi hezaran cinîyan ê êzidîyan pêro merdimîye kerda deyndarê êzidîyan. No deyn zî pê şinasnayîşê xoîdarekerdiş û xopawitişê êzidîyan mumkîn o.

Parlamentoyê Belçîka, Hollanda, Portekîz û Iraqî hêrişê 3ê tebaxe yê DAÎŞî sey jenosîdî qbul kerdî. Nê birî girîng ê la tede kêmasîyî zî estê. Ganî semedo ke reyna qirkerdiş nêro kerdene ganî çita bêro kerdene. Ganî verî cewabê nê persî bêro dayene. Çarçewa na bire de ganî semedê xoserîya êzidîyan xebatî bêrê kerdene. Heta ganî bawerî û îdareyê bînî zî wayîrê xoserîye bibê. 

Hema zî xebatê nêşinasnayîşê îradeyê êzidîyan estê. No bêwijdanî û bêexlaqî ya. Ganî êzidîyan ser ne karêko sîyasî ne zî otorîterîyêk bêrê kerdene. Êzidîyî dewlete nêwazenê, nêwazenê bibê îqtîdar zî, ê sîstemêkê xoserî yê demokratîkî wazenê. Êzidxane bi nê hawayî Iraq û Başûrê Kurdîstanî de rûmet bido qezençkerdene.

Wa çew nêvajo çira êzidîyî Rayber Apoyî ra hes kenê, gerîlayan sempatîk vînenê. Rayber Apoyî pêro têkoşînê sîyasî de waşt ke nasname û bawerîya êzidîyan azad bibê. Nê esasî ser o seba êzidîyan xizmetê pîlî kerdî.Rayber Apoyî Fermanê 73. û 74. ra verî PKK hîşyar kerd ke wa êzidîyan bipawo. Coka hem Herêmanê Pawitişî yê Medya ra gerîlayê YJA-Starî û HPGyî hem zî Rojawanî ra şerwanê YPG-YPJyî vazdayî Şingal û vera DAÎŞî seba pawitişê Şingalî xo kerd bend. Êzidîyî semedê nê nêzdîbîyayîşê Rayber Apoyî ra tira hende hes kenê. Ê girêdayeyê Rayberîyêka winasên ê. Wijdan û têdûştîya înan waştêne. Semedo ke êzidîyî wayîrwijdan ê wayîrê Rayber Apoyî vejîyenê.

Gerîlayan vera DAÎŞî şer kerd, xeylêk şehîdî dayî, êzidîyî pawitî. Bi se hezaran kesî qirkerdişê DAÎŞî ra xelisnayî. Wayîrvejîyayîş û heskerdişê gerîlayan hewcedarîya edaletî ya. Coka wa kes nêvajo çira êzidîyî gerîlayan ra hes kenê. Xora no heskerdiş û girêdayîşî nêbîyêne şaş bîyêne.

Gerîlayan dima ke Şingal xelisna warê leşkerî de ciwanê êzidîyî perwerde kerdî û Şingalî ra xo apey ant. Hînî ciwanê êzidîyî Şingalî pawenê. Meclîsê xo zî bi xo îdare kenê. Herinda ke her kes ney ra keyfweş û sipasdar bibo tedaya dişmena kurdan dewleta tirke ra semed xoîdarekerdişê êzidîyan nêno qebulkerdene. No neheqîyêka tarîxî û bêwijdanî ya.

Serrgêra Fermanê 3ê Tebaxe de ma soz danê ke her wextî ra zêdêr wayîrê êzidîyan vejîyê, qesasê cinîyan ê êzidîyan pê xeta azadîya cinîyan û pê caardişê xoserîya demokratîke ya Şingalî bigêrê. Ma venga pêro merdimîye danê ke wayîrê êzidîyan vejîya, îdare û xoserîya înan bişinasna.''