Hemserekîya Konseya Rayberdişî ya KCKyî derheqê hêrişê dewleta tirke yê vera Şingalî eşkerayîya nuştekîye daye û nê pare kerdî:

''Dewleta tirke ya îşxalkere reyna hêrişê Şingalî kerd û hemkarîya xo ya DAÎŞî fîna çiman ver. Serkêşanê êzidîyan ra Seîd Hesenî ke xoverdayîşê vera çeteyanê DAÎŞî de sefanê verênan de xoverdayêne, wesayîta ci pê teyarayan ame hedef girewtene û pîya  û birazayê ci şerwanê YBŞyî Îsa Xwededa şehîd bîyî. Ma keyeyanê ci yê erjîyayeyan û heme şarê êzidîyan rê serweşîye wazenê.

Rojêke badê nê hêrişî Şingal de nêweşxane ame bombardumankerdene. Hêriş de şerwanê YBŞyî Hemîd Sadun (Qîran Sîba), Xidir Şeref (Pîr Xidir), Ramî El Salim (Ronî), Meytem Xidir Xelef (Serhed Zemar) û xebatkarê weşîye Elî Reşo Xidir, Sedo Îlyas Reşo, Hecî Xidir û Muhlise Sîdar şehîd bîyî. Ma keyeyê nê şehîdan û heme şarê êzidîyan ra serweşîye wazenê û çar birîndaran şîfa wazenê.

Seîd Hesano ke rayberê şarê êzidîyan o 2014î ra heta 2014î  sey berpirsîyarê Tevgera Azadî û Demokrasi a Ezdîya (TEVDA) gurîya. Gama ke DAÎŞî hêrişê Şingalî kerd, kişta 12 gerîlayanê ke hêriş vindarna de vindert. Seba ke şarê Şingalî erdê xo de bimano xebatî kerdî. Sey Derweşê hemdemî gerîlayan reyde xoverdayîş kerd. Eke şar rixmê serd û sipirî û germ kilijî Koyê Şingalî de memandayêne herra êzidîyan do bêwayîr bimendayêne. Belka êzidîyî hinî nêeşkenayêne agêrê Şingalî. Şehîd Seîd Hesenî ke vera qirkerdişê DAÎŞî pîya bi gerîlayan Şingal pawit do çirey vîr a nêşiro.

Şehîd Seîd Hesenî sere de kênaya ci Şehîde Bêrîvane Şingal xeylêk merdimê xo semedê azadîya Êzidîxanî şehîd dayî. Şehîd Seîd Hesenî ronayîşê YBŞyî de  rolo pîl kay kerd û semedê ronayîşê meclîsanê şarî yê Şingalî pîya bi Mam Zekîyî keda pîle daye. Keda ey do pê azadîya Êzidîxanî bêro tacîdarkerdene.

Gama ke Serekwezîrê Iraqî şiyênî Şingal no hêriş ame kerdene. Eşkerayo ke hêrişo plankerde yo. Pê zextê dewleta tirke û şantajê PDKyî ambênê Iraq û PDKyî de yew peykerdiş amebi kerdene. Dewleta tirke pê nê hêrişan wazenê îredeyê êzidiîyan bêro şiknayene û no pêkerdiş bêro caardene. Badê hêrişî Serekwezîr Kazimî vat 'ganî pêkerdişê Şingalî bêro caardene.' No vatiş û hêrişê dewleta tirke yê vera nêweşxaneyî ramojnenê ke yeno waştene ke îdareyo xoser û xopawitişê Şingalî bêro tasfîyekerdene.

Vera nayî ganî heme şarê êzidîyan, dostê înan û merdimîya bivîjdan û biadalete  wayîrê Şingalî vejîyo. Êzidîxan têna pê têkoşînî eşkeno bibo azad û xoser. Yewna rayîrê nayî çîn o. Beno ke bedelî bêrê dayene la pê têkoşînî Êzidîxan eşkeno bibo xoser.

Bêşik o ke eke Şingal de xayînî çînêbîyêne no hêriş nêameyêne kerdene. Şingal de şebekeyê xayînîye ameyo rêxistinkerdene. Ê îstîxbarat danê dewleta tirke ya ke sey  DAÎŞî bawerî û nasnameyanê bînan rê dişmen a. Seba ke Şehîd Seîd Hesen vera qirkerdişê DAÎŞî û remnayîşê bi hezaran cinîyan ê êzidîyan hersbîyaye bi, vera xayînîye û hemkarîye hersbîyaye bi, o ame hedef girewtene. Na raştîye reyna fîna çiman ver ke xayînîye û hemkarîye semedê heme kurdan darba pîl a. Semedê weşkerdişê na darbe ganî Êzidîxan bibo azad.

No hêriş vera şarê Iraqî zî ame kerdene. Coka ganî Iraq vera nayî tewir bîgiro. Berpirsîyarê hêrişî Amerîka ya. Sey fermî ê Iraqî bo zî warê hewayî eslê xo de kontrolê Amerîka de yo. bêvengîya vera nê hêrişî sey bêvengîya vera hêrişanê DAÎŞî ya. Xora dewleta tirke pê nê hêrişan wazena karo nêmcet ê çeteyan temam bikero. Nê hêrişî reyna ramojna ke ganî Iraq xoserîya Şingalî nas bikero.

Ma reyna rayberê şarê êzidîyan Şehîd Seîd Hesenî heme şehîdanê êzidîyan bihurmet û minetî yad kenê  û soz danê ke ma do sey vizêrî ewro ra tepîya zî tim paştî bidê şarê êzidîyan.''