Hemserekîya Konseya Rayberdişî ya KCKyî bi mesajêkî fermandar û şerwanê HPG û YJA-Starî yê Operasyonanê Şorişgêran ê Xakurkê, Metîna û Zapî fîraz kerdî û veng da ke vera hêrişanê dewleta tirke çalakîyî û xoverdayîş bêrê pîlkerdene.

Mesaj wina yo:

''Hêzanê Pawitişê Şarî 22-23yê kanûna 2023yî de Xakurkê, Metîna û Zap de çarçewa Operasyonanê Şorişgêran de çalakîyî kerdî, derbê giranî dayî artêşa îşxalkere ro û kerd ke artêşa îşxalkere bi giranî bin bikewa. Nê çalakîyanê serkewteyan ra semed ma pêro fermandar û şerwananê HPG û YJA-Starî zerrî ra fîraz kenê, selam kenê û serkewtişê dayîmîyî wazenê. Ma bi taybetî embazanê ma yê beşdaranê nê çalakîyan fîraz kenê. Tay embazanê ma zî nê çalakîyan de bi qehremanî şer kerd û ê şehîd bîyî. Şexsê nê şehîdan de ma pêro şehîdanê xo bi rêzî û minetî yad kenê. Ma ancî şehîdanê xo rê sozê serkewtişî danê.

Gerîlayan ancî artêşa tirke bin viste

Vera gef û hêrişanê şefanê faşîstan gerîlayan serê sibayî, şan û şewe derbê giranî dayî artêşa îşxalkere ro. Bi nê çalakîyan gerîlayan ancî îsbat kerd ke ê verê artêşa tirke ya îşxalkere de serwer ê. Şarê Kurdîstanî û gerîlayî do qetî welatê azadî û cuya azade ra fek vera nêdê, seba ney zî vera her hêriş û îşxalî xo ver bidê, dişmenî çin bikerê û azadîye bîyarê ca. Şarê Kurdîstanî gamêke zî têkoşîn û xoverdayîşî ra anêgêra û bi nê hawayî qerardarîya xo îsbat kerde. Gerîlayan Xakurkê, Metîna û Zap de bi giranî artêşa tirke viste bin.

Ganî pêşmergeyî tewirê îxanetî yê PDKyî qebul nêkerê

Bêguman çarçewa Operasyonanê Şorişgêran de çalakîyê gerîlayan do dewam bikerê û gerîlayî hîna zaf derban do bidê piro. Wa her kes zî goreyê ney têbigêro. Heyf ke PDKyî heta nika hemkarîya dewleta tirke kerde û paştî daye artêşa tirke ya îşxalkere. Dewleta tirke bi destekê PDKyî kena ke Başûrî îşxal bikera. Rixmo ke ma çend reyî na babete ser o hişyarîyî dayî zî PDKyî tewirê xo ra fek vera nêda. Tewirê PDKyî xizmetê kurdan nêkeno û ganî no tewir nêro qebulkerdene. Ganî pêşmergeyî zî nê tewirî qebul nêkerê. Ma venga pêşmergeyan danê ke wa çeperanê artêşa tirke ra dûrî vinderê.

Dewleta tirke binkewtişê xo nimnena

Dewleta tirke û îqtîdarê AKP-MHPyî yo faşîst kenê ke binkewtişê xo yê pîlî binimnê. Coka hêrişê kurdan kenê û qirkerdişan kenê. Eşkera bi ke îqtîdarê AKP-MHPyî yo faşîst verê gerîlayan de bin kewto. La ancî zî no îqtîdar qirkerdiş, înkar û dişmenîya kurdan de israr keno. Na çarçewe de zî hêrişê Rojawanî zêdîneno. Bi nê hawayî kenê ke binkewtişê xo binimnê. Rojawan de netîceya nê hêrişan de heta nika xeylêk merdiman dinyaya xo bedilnaye û xeylêk merdimî zî birîndar bîyî. Dewleta tirke Rojawan de waranê sivîlan û dezgehanê xizmetî dana bombayan ver. Nê hêrişan mojna ke çîyê ke Rojawan de yenê kerdene û çîyê ke Gazze de yenê kerdene seyci yê. Erdoganî bi nê hêrişan mojna ke o babeta Gazze û Filîstînî de sextekarîye keno.

Şarê ma wa tewirê xo yê xoverdayoxî pîlêr bikero

Dewleta tirke ya kolonyalîste armanc kena ke Rojawanî îşxal bikera, Şorişê Rojawanî tasfîye bikera û statuyê kurdan çin bikera. Vera nê armancan ganî şarê Rojawanî tewirê xo yê xoverdayoxî pîlêr bikerê. Şar û dostê kurdan ganî her ca de çalakîyan û xoverdayîşî pîl bikerê, paştî bidê şarê Rojawanî û Şorişê Rojawanî.''