Hemserekîya Konseya Rayberdişî ya KCKyî eşkeraya nuştekîye dayê û nê pare kedî:

''Metîna, Avaşîn û Zap de mabênê gerîlayan û artêşa tirke de şerkêko giran qewimîyeno. Mabênê hêzanê leşkerî yê PDKyî û gerîlayan de tengijîno ke beno ke her hele biaçarîyo pêkewtişî dewam keno. Embazê ma Fermandarê Pêroyî yê HPGyî Murat Karayilanî vatbi  hêzê PDKyî  wazenê dormeyê xeylêk nuqtayanê gerîlayan bigêrê û beno  ke her  hele pêkewtiş biqewimîyo û  seba ke verê nê pêkewtişan bêro girewtene veng dabi şar, roşnvîr, hunermend û hêzanê sîyasîyan ê kurdan ke wa berpirsîyarîya xo bîyarê ca.  

Hunermend û roşnvîrê  ke vîjdanê şarê kurdî yê Ewropa de cade cewabê nê vengdayîşî da. Hunermdan ard ziwan ke pêkewişê mabênê gerîlayan û hêzanê tayabetan ê PDKyî zirar dano dewaya azadîye ya kurdan û veng da PDKyî ke wa waranê gerîlayan ra xo peyser bianco. Hîs û waştişê hunermandanê kurdan hîsê heme şarê kurdî yê. Ma nê hunermendan pîroz kenê û pê bawer ê ke semedê vergirewtişê şerî ê o rolê xo yê tarîxî  kay bikerê.

Ganî vengê hunermandan û roşnvîranê kurdan hetê her kesî ra sey berpirsîyarîya neteweyîye bêro destgirewtene. Na çarçewe de ganî şar û hêzê sîyasîyî yê kurdan bi caardişê berpirsîyarîya xo cewab bidê embazê ma Fermadarê Qererqahê Merkezî yê Pawitişê Şarî Murat Karayilanî. Xora nika ra rayapêroyîya kurdan vera pêkewtişê winayênî ke do xizmetê dewleta tirke bikero hîsgêrîye esta.

Fermandarê ma yê Qererqahê Merkezî yê Pawitişê Şarî sey têgêrayîşî tewirê ma eşkera kerd.Polîtîkaya ma ya pêkewtişî seba qet grûbêka sîyasî û leşkerîye ya kurdan çîn a. Rixmo ke PDK serrek a yeno ma ser ma pê berpirsîyarîya xo ya seba şarê kurdî û dewaya azadîye pêkewtişan ra remayî. Rixmê heme kerdişanê PDKyî yê ke xizmetê hêrişê îşxalî yê deweleta tirke kenê ma sebr kerd ke leteyêke kayanê dewleta tirke mebê. Ma pê rayîrê pêvînayîşan cehd kerd ke tengijînîyan kêm bikerê û verê pêkewtişan bigêrê la seba ke PDKyî gama ke hêrişê îşxalî zêdîyayî hêzê xo warê gerîlayan de ca kerdî ma bi pêkewtişan rî bi rî mendê.

Fermandarê ma yê Qererqahê Merkezî yê Pawitişê Şarî veng da gerîlayan û vat sebr bikerê, pêkewtişan mekerê la PDK keno ke cadê pêkewtişan bido destpêkerdene. Fermandarê PDKyî pê eşkerayîyanê xo çapemenîya ci zî pê weşananê xo kenê cade şer vejîyo. Wa heme şarê ma û rayrapêroyîye bizano ke ma sey têgêrayîşî heta hela peyêne do pêkewtişê winayênî ra biremê la eke çîyo winayên biqewimîyo berpirsîyara ci PDK yo.

Wezîrê Karanê Zereyî yê PDKyî êyê ke Ewropa ra semedê vergirewtişê şerê mabênê gerîlayan û hêzanê leşkerî yê PDKyî bigêrê waşt bêrê Başûrê Kurdîstanî bi kerdişê provokasyonî sûcdar kerdî. Bi propaganda provokasyon û polîtîkaya şerî yê xo nimnenê. Xora tim vera gerîlayanê PKKyî propoganda kenê. No tewirê PDKyî vengdayîşê Fermandarê ma yê Qererqahê Merkezî yê Pawitişê Şarî dahîna keno muhîm.

Ethem Barzanîyo ke demê nêzdîyî de îdareyê PDKyî de cagirewtêne polîtîkaya PDKyî û tekîlîya ci ya bi Tirkîya rexne kerdî û PDKyî ra qerfîya, berpirsîyaranê YNKyî vat ê do şerêkê mabênê kurdan de ca nêgêrê, tewirê Hizbu Şui, hîsgêrîya hunermend û roşnvîranê kurdan, Başûrê Kurdîstanî de eşkerayîye xeylêk dezgeh û roşnvîran  seba ke tehlukeyê şerê mabênê gerîlayan û hêzanê leşkerî yê PDKyî nêzdî yo ameyî kerdene.

Gerîla û Têgêrayîşê Azadîye yê Kurdan  vera hêrişê îşxalî yê dewleta tirke têkoşîno tarîxî dano û do bidê.  Ciwanê cinî û camêrdî yê kurdan cuya xo kendê feda têkoşîno fedayîkî kenê. Ganî şarê kurdî wayîrê xoverdayîşê gerîlayan vejîyo û destûr medo PDK waranê gerîlayan bigêro binê kontrolî. Ma PDKyî ra nêwazenê ke vera îşxalî  têkoşînê pîlî de rolê xo kay bikero. Xora ê vera îşxalaî paştî ma nêdanêî têna wa nê tewiranê xo yê ke têkoşînî zehîf keno caverdê. Nika xeylêk gerîlayêkê ganî vera îşxalî têkoşîn bikerê vera leşkeranê PDKyî tedbîran genê. No zî têkoşînê tarîxî ser o tesîr keno. Hêzê leşkerî yê ke pabesteyê PDKyî yê  nika mabênê waranê gerîlayan de tekîlîya gerîlayan birnenê. No xizmetê hêzanê îşxalkeran o. Ganî PDK nê tewirê xo caverdo.

Ganî şarê kurdî, roşnvîrê ci û hêzê ci yê sîyayîsî giranîya rewşe bivînê û seba ke polîtîkaya PDKyî vindarnê, cade têbigêrê. Ganî nê prosesê talî de giranîya xo ramojnê û kayanê dewleta tirke bixeripnê. No wezîfeyê tewr muhîm ê heme kurdan o ke ganî lezabez bêro kerdene. Wext wextê paştîdayîşê ciwananê kurdan û wayîrvejîyayîşê xoverdayîşê înan ê qehremankîyî yo. Ma pê bawer ê ke şarê kurdî her cade do werzo payan ser  seba ke têkoşînê azadîye yê kurdan  ser bikewo rolê xo kay bikero.''