KCK: Bi pîlkerdişê hemle verê hêrişan eşkeno bêro girewtene

KCKyî bale ante ser ke hêrişê nîjadperestî bi destê îqtîdarê AKP-MHPyî yenê kerdene û vat: ''Bi pîlkerdiş û averberdişê hemleya ''Tecrîd, faşîzm û îşxalî rê bes o, wext wextê azadîye yo'' verê nê hêrişanê faşîstan û mergan eşkeno bêro girewtene.''

Hemserekîya Konseya Rayberdişî ya KCKyî derheqê hêrişanê nîjadperastan ê vera kurdan de eşkerayîyêke daye û nê pare kerdî:

''Bi serran o ke xeylêk waranê Tirkîya de vera kundanê wendakaran û karkeran hêrişê nîjadperestî yenê kerdene. Zafê nê hêrişan de  darbê mergî yeno pirodayene. Reyna nê hêrişan de kurdî bi çeke û kardan yenê qetilkerdene. Aşman verê cu Anqara de ciwanêk seba ke muzîko kurdkî goştarî kerd ame qetilkerdene. Demo nizdî de zî Sakarya de kedkarê serrewextî yê kurdî raştê hêrişî ameyî ke mîyanê înan de cinî doman zî bibî. Tewr peynî de zî Afyon de ciwanêk hetê hêrişkerdoxanê nîjadperastan ra ame qetilkerdene.

Tirkîya de hêrişê wînayên ê vera kurdan bîyî sey çîyêkê normalî. Dewleta tirke qetilkaran pawena û verê hêrişan akena. Îqtîdar tim HDPyî sey rêxistina terorî ramojneno. Coka hemwelatîyê Tirkîya dişmenîya vera kurdan sey çîyê normalî vînenî. Seba ke têkoşînê azadîye yê kurdan sey terorî yeno morkerdene hêrişî winayên yenê kerdene. Verê nê hêrişan hukmat akeno. Xora zafê înan zî hetê rêxitinanê îstîxbaratî ra yene plankerdene û caardene. Bi nê hêrişan wazenê ke îradeyê kuran bişiknê. Nê hêrişî sey leteyêke polîtîkaya qirkerdişî ya vera kurdan ê. Zafê nê hêrişan hetê MÎT û polîsan ra yenê organîzekerdene. Nê hêrişê plankerde yê.

Ganî kurdî zî semedê vergirewtişê înan rêxistinkerde xopawitişê xo bîyarê ra. bi pîlkerdiş û averberdişê hemleya ''Tecrîd, faşîzm û îşxalî rê bes o, wext wextê azadîye yo'' verê nê hêrişanê faşîstan û meran eşkeno bêro girewtene. Kurdî ganî ramojnê ke ê pê hêrişan nêgerîyenê binê zext, û ê mêşnaya qûrbanîye nê yê. Ganî kurdî bi giranîye nê hêrişan ser o vinderê. Hêrişê winayêne ganî semedê şarê kurdî bibê sebebê perwerde, rêxitinbîyayîş û têkoşînî.

Ciwano ke Afyon de ame qetilkerdene, ma keyeyê ci rê serweşîye wazenê. Ma veng dan kurdan û dostanê înan  û hêzanê demorasîyî ke bi çalakîyanê xurtan Tecrîd, hemleya ''Tecrîd faşîzm û îşxalî rê bes o, wext wextê azadîye yo'' Kurdîstan û Tirkîya de aver bêrê.''