Hemserekîya Konseya Rayberdişî ya KCKyî derheqê 8ê Adare de eşkerayîyêke daye.

Eşkerayîye wina ya:

''Ma 8ê Adare Roja Cinîyan ê Kedkaran a Dinya fîraz kenê, pêro cinîyanê le têkoşînê vera sîstemê serdestîya camêrdan de şehîd bîyê bi minet û hûrmetî yad kenê.

8ê Adare zimistanê serdestîya camêrdan ra derbazbîyayîşê wisarê azadîwaştoxê cinîyan o. Pêro merdimîye pê paywiriştişê cinîyan hîna hêvîdar ewnîyena ameyoxî. Çunke têkoşînê azadîye yê cinîyan têkoşînê xelisîyayîşê pêro merdimîye yo. Camêrdî eke raşta zî wazenê bibê azad ganî bibê parçeyê têkoşînê cinîyan. Heta ke cinîyî azad nêbê camêrdî zî do bibê koleyê sîstemê îqtîdarê tedakar, kolonyalîstî. Azadîya cinîyan do bikerê ke camêrdî lêşinî û sûcanê xo ra bixelisê. Rayber Apoyî coka tezê 'kiştişê camêrdî' aver berd û ey şexsê xo de camêrdîya lêşine û sûcdare kişte.

Rayber Apo vera sîstemê serdestîya camêrdan têkoşîno tewr pîl û fîraz ê tarîxî berz kerd

Rayber Apoyî şexsê xo de camêrdîye kişte û bi nê hawayî vera sîstemê serdestîya camêrdan têkoşîno tewr pîl û fîraz ê tarîxî berz kerd.Ey cinîyî reyna wurznayî payan ser û verê ci akerd ke merdimîye heta peynî mîyanê fîrazîyan de biciwîya. Bi nê hawayî tarîxê merdimîye yo ke do peynîya serdestîya camêrdan a 5 hezar serre bîyaro dest pêkerd.Naye ra pey cinîyî do verê dinya biweçînê.

Rayber Apoyî karaktero komelkî yê cinîyan û pêro serebûtê cinîyan analîz kerdî û îdeolojîya xelisîyayîşê cinîyan awan kerde. A raşte na bîya îdeolojîya xelisîyayîşê pêro merdimîye û tarîxê merdimîye roşnî kerd. Pê nê roşnîye şexsê cinîyan de merdimîye werişte payan ser. Îdeolojîya xelisîyayîşê cinîyan a Rayber Apoyî seba merdimîye bîye mîlad. Cinîyî hînî bîyî rayberê şorişan û hemle û têkoşînê şorişgêrî anê ca.

Hînî çîyêk nêeşkeno verê vayê têkoşînê azadîye yê cinîyan de vinderê

Roja ewroyîne de têkoşînê ke azadîya cinîyan esas gênê merdimîye cuya azade û demokratîke de aver berê. Îdeolojîyê ke azadîya cinîyan esas nêgênê neçare yê ke apey şorê û binkewtişî tame bikerê. Çunke tarîx dormeyê têkoşînê azadîye yê cinîyan de xo do bidevirno. Coka Rayber Apoyî tesbît kerd ke şexsê têkoşînê azadîye yê cinîyan ê kurdan de têkoşînê azadîye yê şaranê Rojhelatê Mîyanênî do geş bibo. 

Têkoşînê azadîye yê cinîyan pê bingeyê xo yê îdeolojîk û teorîkî her ca de xo mojna ra. Coka rixmo ke sîstemê serdestîya camêrdan 2020 de pandemî kerda bahaneya astengkerdişê têkoşînî têkoşînê cinîyana aver şi. Cinîyî 8ê Adare ra dima zî do 2021 de nê têkoşînî berz bikerê. Hînî çîyêk nêeşkeno verê vayê têkoşînê azadîye yê cinîyan de vinderê. Cinîyî do pê îdeolojîya xo pêro merdimîye dormeyê xo de kom bikerê û şorê sîstemê serdestîya camêrdan ser. Tersê nê sîstemî do vera bibo pîlêr û no tersê ci do bibo raştikên.

Rayberîya cinîyan de têkoşînê demokrasî do peynîya nê îqtîdarî bîyaro

Ewro Tirkîya bîye merkezê kanperestîya sîstemê serdestîya camêrdan. Temsîlkarê nê kanperestî zî îqtîdarê AKP-MHPyî yo. No îqtîdar dişmenîya cinîyan keno coka 2020 de tewr zaf hêrişê cinîyan kerd, bi seyan sîyasetmedarê cinîyî eştî zîndanî, waqayê tacîz û tecawuzî kerdî hacetê hêzkerdişê sîstemî. Naye ra têkoşînê cinîyan ê kurd, çerkes, tirk, misilman, xirîstîyan elewîyan ê vera nê îqtîdarî bîyo têkoşînê xelisîyayîşê pêro merdimîye. Têkoşîno ke 8ê Adara 2021î de do bêro berzkerdene, têkoşînê Kurdîstanî de do biba roja tewr girînge. Cinîyî do peynîya kokê AKP-MHPyî bîyarê.

2021 de têkoşînê azadîye yê cinîyan rijnayîşê îqtîdarê AKP-MHPyî de rolê xo bîyaro ca, pêro îqtîdaranê kanperestan bilerzno. Dima ke xîretê AKP-MHPyî Garê de bin kewt ê hînî bîyê qels. Rayberîya cinîyan de têkoşînê demokrasî do peynîya nê îqtîdarî bîyaro. No têkoşînê azadîye pêro şaranê Rojhelatê Mîyanênî do îqtîdarê dişmenê cinîyan ra bixelisno û verê demokratîkbîyayîşî akero.

8ê Adare de cinîyî Kurdîstan, Tirkîya û dinya de do wirzê payan ser û bi nê hawayî merdimîye ser o hewrê sîyayî do vila bibê û merdimîye do biresa ê serranê ke do serê cuye de sey tîje vejîyê.''