Hemserekîya Konseya Rayberdişî ya KCKyî derheqê darbeya sîyasî ya vera HDPyî de eşkerayîyêke daye. Eşkerayîya KCKyî wina ya:

''Tradîsyonê xoverdayîşî yê HDP nêqedîyeno. Coka çend rastê hêrişan bêro zî xeta sîyasî ya HDPyî û tradîsyonê xoverdayîşê ci payan ser ê, xoverdayîşê vera faşîzmî bêmabên dewam keno.

Wekilîya Leyla Guven û Musa Farisogullari ameye batalkerdene. Sebebê nê hêrişan no yo ke HDP Tirkîya de dînamîko tewr girîng ê têkoşînê azadî û demokrasî yo. Seba ke HDP wayîrê cuya azade û demokrasî ya şarê kurdî vejîyena vera ci hêrişanê pîlan yenê kerdene.

Seba ke HDP wazeno pêro hêzê demokrasî û azadîye vera îqtîdarê faşîstî bibê yew HDP û şarê kurdî sey dişmen yenê dîyene. No faşîzm o ke şar, komel, kedkar, cinî û camêrdan rê zulm keno xeta HDPyî de mergê xo vîneno. Dîktatorîya faşîste HDP û şarê kurdî sey astengîya tewr pîle ya vera polîtîkayanê xo vîneno coka hende hêrişê ci keno.

Dîktatorîya qirkere û faşîste mîyanê çinbîyayîşêkê pîlî de yo. HDP tradîsyonê xoverdayîşî bêmabên dewam keno. Xoverdayîşê HDPyî yo pîl ê Kurdîstanî esasê şorişê demokratîkî yê neteweyî de aver şoro. Heta ke şarê kurd û Tirkîya estbê têkoşîn zî do dewam bikero.

HEPî ra nata vera hêzanê sîyasîyan ê demokratîkan hêrişê giranî yenê kerdene. Bi hezaran îdarekarê ke wayîrê tradîsyonê sîyasî bîyî, û endamî ameyî qetilkerdene, bi des hezaran ameyî tepiştene. Nika zî her roje bi desan kesî yenê tepiştene. La tradîsyonê sîyasî ra fek nêno veradayene. Sey teber zîndanan de zî xoverdayîş dewam keno. Nê tepişteyî teqîbkerdoxê tradîsyonê xoverdayîşê Zîndanê Amedî yê, ewladê rûmetênî yê şarê kurdî yê. No xoverdayîş teqez do ser bikewo, Kurdîstan do azad bibo, Tirkîya û Rojhelato Mîyanên zî do demokratîk bibê.

Dewleta tirke têna armanc kena ke şarê kurdî qir bikera. Coka ganî vera nê kerdişî her kes xo ver bido. Têkoşînê vera îqtîdarê faşîstî têna pê îtîfaqî mumkîn o. Sere de şarê kurdî û şarê Tirkîya ganî bizanê ke xeta sîyasî ya HDPyî seba şarê kurdî û şarê Tirkîya xeta bingeyî ya xuya azade û demokrasî ya. La na xete pê têkoşînî do biresa serkewtiş. Ganî no têkoşîn pê her metodî bêro dewamkerdene. Gerîla û milîsê HBDHyî na babete de têkoşîn pê qerardarî anê ca.

Dewleta tirke ya faşîste û qirkere têna Tirkîya û Vakurê Kurdîstanî de nê, Rojhelatê Mîyanênî de bi temamî hêrişê şarê ma û hêzanê demokrasîyî kena Şarê ma tarîx de îqtîdarê faşîstî yê tewr barbarî de rî bi rî yo. Nê esasî ser o ma venga şarê xo danê ke vera faşîzmî wurzo payan ser û têkoşîn xurt bikero, Kurdîstanêkê azadî, Tirkîyayêka demokratîje û Rojhelatê Mîyanênî yê demokratîkî awan bikero.''