Hemserekîya Konseya Rayberdişî ya KCKyî derheqê qirkerdişê Konya de eşkerayîya nuştekîye daye:

KCKyî vat: ''Dişmenîya îqtîdarê AKP-MHPyî ya vera kurdan komelî cêser fînena. Na polîtîka bitaybetî serra 2021î de hêrişê vera kurdan û hêzanê demokrasîyî zêdînayî. Îqtîdar HDPyî sey hedefî ramojeno û bi nê hewayî kurdan û hêzanê demokrasîyî dey dişmenî geno dest. Netîceya nayî de her ca de vera kurdan û înanê ke reyê xo dayî HDPyî hêrişî yenê kerdene.  Bêşik o ke berpirsîyarê esasî yê nê qirkerdişî Erdogan û Bahçelî yê. Xora Devlet Bahçelî semedê Denîze Poyraz vatbi nê kuryeyê PKKyî yê û no qirkerdiş meşrû ramojna bi  »girewtbi xo ser. Hetê bînî ra Erdogan zî her roje vano nê rojê înanê rind ê, ê do hema çi- çi vînê. Bi nê vatişan qirkerdişan rê teşvîk keno.''

Eşkerayîya KCKyî de bale amaye antene nê xususan ser:

''Konya de keyeyo kurd netîceya polîtîkaya îqtîdarê faşîste de ame qetilkerdene û ame vêşnayene. No qirkerdişo wehşî seba ke no keye kurd o û nasnameyê xo canêverdeno ame kerdene. Kurdan rê yeno vatene ke şima nasnameyê xo caverdê zî aqibetê şima merg o. înkarê kurdan û redkerdişê nasnameyê kurdan ra nê qirkerdişî yenê kerdene. Tirkîya de kurdkî qiseykeridş zî sûc o. Wina yew raştîye esta.  Pê polîtîkaya sîstematîke  qirkerdişê kurdan yeno waştene.

Nê hêrişkaran verî zî hêrişê nê keyeyî kerdbi la herinda tepiştişî hêrişkaran de ê serbest ameybî veradayene. Veradayîşê nê hêrişkaran xora qirkerdişî rê teşvîkkerdiş o. Demo kilm de Konya de kurdo bi nameyê Hakîm Dal zî amebi qetilkerdene. Baroyanê Kurdîstanî vera nê hêrişî nêrazbîyayîş ramojna. Rojnameyê îqtîdarî Yenî Şafakî bi vatişê baroyê Qendîlî baroyî sey hedefî ramojnaybî. Pîya bi hukmatî çapemenîya faşîste zî nê qirkerdişan ra berpirsîyar a.

Ganî heme hêzê demokrasîyî na raştîye bivînê û vera îqtîdar û çapemenîye tewirê xo yê zelalî ramojnê. Heta ke heqê kurdan ê  esasî yê ziwan, nasname û azadîye  kulturî nêrê naskerdene verê hêrişan nêno girewtene û demokrasî nêno Tirkîya. Êyê ke wazenê qirkerdişan vindarnê ganî sebebanê nê qirkerdişan werte ra wedarê. Kam ke zerrîya safî ra vera qirkerdişan vejîyeno ganî semedê cuya azad û demokratîke ya kurdan game bierzo.

Bêşik o ke vera nê qirkerdişî ganî tewiro hempar bêro ramojnayene. Ganî hêzê demokrasîyî û şarê Tirkîya yê biwijdanî vera qirkerdişan bibê yew. Bi des hezaran ganî vejîyê kuçeyan û vajê ma pêro kurd ê, elewî yê. Xora nê wird meseleyê esasî heta bi hewayêkê demokratîkî nêrê çareserkerdene Tirkîya de qet yew meseleya sîyasîye, komelkîye  û ekonomîke nêna çareserkerdene. Coka ganî heme kesê biwîjdan, biedaletî û biehleqî pîya bi kurdan vejîyê kuçeyan. Senî ke verî zî ma vatbi wa çew/e mebo mêşnaya qurbanî. Ganî têkoşînê vera AKP-MHPyî  bêro pîlêrkerdene. Rêxitinbîyayîş û xopawitiş ganî bibo têkoşînê estbîyayîşî yê heme kurdan.''