Hemserekîya Konseya Rayberdişî ya KCKyî derheqê îşkenceyê serê tepişteyanê sîyasîyan û rewşa zîndanan de eşkerayîyêka nuştekîye daye.

Eşkerayîye wina ya:

''Dewleta tirke ya îşxalkere û qirkere û îqtîdarê AKP-MHPyî kesanê demokratan û şarê kurdî erzenê zîndanan. Dewleta tirke zîndan de zî tedaya tepişteyan û hêrişê înan kena. Hînî zîndan de tepişteyî kişîyenê. Zîndanî bîyê cayê îşkence û mergî. Keyeyê tepişteyan bi çalakîyanê xo xîret kenê ke bale biancê serê teda û hêrişanê tepişteyan û rewşa krîtîke.

Nê hêrişê vera tepişteyan karakterê dewlete û îqtîdarê AKP-MHPyî eşkera kenê. Tek armanc û hedefê dewleta tirke qirkerdişê kurdan o. Têna çîyo ke dewlete tepişteyan rê keno no armanc eşkera keno. Tepişteyê sîyasîyî zîndanan de yenê qetilkerdene û malayê fermîyî yê dewlete zî nimajê cenaza nêkenê. No exlaqî nîyo. Verî zî destûr nêdîyabî ke cenazaya dadîya Aysele Tugluk biameyêne definkerdene û hêrişê cenaza amebi kerdene. Aha nika zîndan de Aysele Tugluk yena kiştene. Seba ke kurdî teslîm nêbenê û dewaya azadîye de israr kenê faşîzmê AKP-MHPyî kurdan ra qesas gêno. Kesê ke xo rê vanê kurdî hetê îqtîdarî ra erzîyenê zîndanî û maruzê îşkenceyî benê.

Sere de Mudirîya Pêroyî ya Zîndanan, pêro îdareyê zîndanî bîyî torra çete û kiştoxî yê faşîzmê AKP-MHPyî. Tek armancê înan no yo ke tepişteyan dewaya înan ra dûrî bigêrê û kesanê ke vera ney ê, tasfîye bikerê. No feraset berhemê dişmenîya vera kurdan o ke dewleta tirke, AKP û MHP keno.

Tepişteyan seba ke îradeyê xo teslîm nêkerdo û vera teslîmîyetî xo ver danê, maruzê îşkence, teda û tecrîdî manenê. Hende teda û hêrişî mojnenê ke tepişteyî mîyanê xoverdayîşêkê pîlî de yê. Tepişteyê sîyasîyî rûmetê komelî yê. Nê merdimê rûmetênî seba dewaya azadîye tepişîyenê. Coka înan rê 'tepişteyê azadîye' vajîyenê. Warê fîzîlî de azadîya înan destê înan ra ameyo girewtene la raştîye de nê merdimî merdimê tewr azadî yê.

Dewleta tirke ya îşxalkere û qirkere û faşîzmê AKP-MHPyî pê teda û hêrişanê winasênan kenê ke tepişteyî çok şorê erdî ro. Na şaşîyêka pîl a. Tepişteyî do teslîm mebê. Tepişteyan rê wextê Darbeya 12ê Êlule de zî heman çi ame kerdene la tepişteyan xoverdayîşêkê bêhempayî rê serkêşîye kerde. AKP û MHP zî heman prosesê 12ê Êlule keno. Ê wazenê pê gefan, teda û tecrîdî û pê vêşnayîşê înfazê teişteyan ser bikewê. La tepişteyî qetî dewaya xo ra fek vera medê. Çunke ê awankerdoxê xeta xoverdayîşê 14ê Temmuze û mîrasdarê na xete yê. Tepişteyê azadîye pê tehdît û şantajan, pê teda û îşkenceyî do teslîm mebê.

Ganî vera hêrişan keyeyê tepişteyî têna nêrê verdayene. Ganî şarê ma û dostê ma tewirê xo zêde bimojnê û çalakîyanê keyeyanê tepişteyan pîlêr bikerê. Wayîrvejîyayîşê tepişteyan erko tewr esas ê welatperwerîye û merdimîye yo. Keyeyê tepişteyan tim çalakîyan kenê. Ganî şarê ma hetê nê keyeyan de ca bigêro. Ganî pêro komel seba tepişteyan wurzo payan ser û tewirê xo bimojno. Ganî têkoşînê tepişte û keyeyanê înan têna nêro verdayene.

Wa çew vera qirkerdişê tepişteyan û kerdişanê vera zîndanan bêveng nêmano. Bêvengîya vera nê kerdişan nakokîyêka pîl a. Ganî na nakokîye ra ma xo bixelisnê. Ganî bizanîyo ke komel faşîzmê AKP-MHPyî vîneno. Krîterê demokratîkbîyayîşî, vera zulmî vejîyayîş, hetê tepişteyan de cagirewtiş ganî bêrê caardene. Ma venga rayaumûmîya demokratîke danê ke vera na rewşe zêdêr hîsger biba. Ganî rayaumûmîya demokratîke vera kerdişanê AKP-MHPyî bêveng nêmana, nê kerdişan teqîb bikera. Ganî her kes vera kerdişanê faşîzanan ê AKP-MHPyî bigêro, tewirê xo bimojno û wayîrê tepişteyan vejîyo.

Faşîzmê AKP-MHPyî û hêrişê vera zîndanan şarê kurdî de hêrsêkê pîlî virazenê. Bi nê hêrsî ganî têkoşînê azadîye bêro pîlkerdene û bireso armancanê xo, faşîzmî çin bikero. Senî ke faşîzmê 12ê êlule verê hêrsê şarî akerd û têkoşîn kerd pîlêr, ewro zî caardişê faşîzmê AKP-MHPyî hêrsî zêdînayîşî. No do verê rijîyayîşê AKP-MHPyî abikero, hesreta azadîye bîyaro ca. Têgêrayîş û şarê ma do faşîst û hêrişkeran ra hesab bipersê. Ma sey Têgêrayîşê Azadîye xoverdayîşê pîlî yê tepişteyan selam kenê. Têkoşîno rûmetên û îradeyê tepişteyan do ser bikewrê, hişmendîya faşîste do bin bikewa.''