Hemserekîya Konseya Rayberdişî ya KCKyî derheqê hêrişanê dewleta tirke de eşkerayîyêke daye û nê pare kerdî:

''Dewleta tirke ya îşxalkere ke polîtîkaya îşxalî rayra bena bi hêrişanê xo wazena ke şarê kurdî qir bikero. Hetêkî ra bi artêşa xo hêrişê Sûrîye, Iraq û Libya kena hetê bînî ra heme welatanê ereban tehdît kena. Karakterê xo yê îşxalkerdoxî ke osmanijan ra girewto sey polîtîkaya herême şuxulnena ke semedê heme şaranê Rojhelatê MÎyanênî bîya hêzêko hêrişkero  bitehluke. Na polîtîkaya xo û hêrişê xo yê şiknayîşê îradeyê şarî binê maskeyê îslamî de niminena. Îslamî semedê emelanê xo yê leyminan şuxulnenê ke çirey hema îqtîdar û dewletêke wina nêkerdo.

Her cayo ke îşxal kenê alaya xo daliqnenê, dibistananê tirkan akenê û polîs û asayîşê ca kenê.  Senî ke Sûrîye de kerde pereyê xo danê şuxulnayene ke wa bingêyê îlhaqî bêro afernayene. Dewleta tirke ke wazena kurdan qir bikero ke Kurdîstanî bikero cayê vilakerdişê netewa xo bi hêrişê vera welatanê ereban wazenê îşxalê xo gird  bikero. Yewîya Ereban ke armancê îqîtîdarê AKP-MHPyî dî, vera înan tewirê xo eşkera ramot. Wezîrê Karanê Teberî yê Misiri yo verên Amr Musayî bi vatişê  'Tirkîya hêrişê welatanê ereban kena û înan rê dişmenîye kena' polîtîkaya hêrişkare ya dewleta tirke teşhîr kerde. No çîyêko muhîm o. Reyna nêrazîbîyayîşê sîyasetmedar û roşnvîranê welatanê ereban ê vera hêrişê dewleta tireke yê vera kurdan zî bimana yo. Semedê na hîsgêrîya înan ma Yewîya Ereban û welatanê ereban rê spas kenê.

Seserran ra zafêr o ke Rojhelatê Mîyanênî de vera kurdan û ereban polîtîkaya qirkerdişî yena rayraberdene. Bitaybetî zî dewleta tirke çirey nêwaşt ke kurdî û erebî bibê wayîrê îradeyî  û bihêz bî. Warê bandure yê wextê Împaratorîya Osmanijan de nika zî wazenê ke bi zanayîşê qirkerdişî yê netewe-dewlete bibê hekîm. Ganî heme şar, welat û hêzê Rojhelatê Mîyanênî vera na poltîkaya hêrişkare ya dewleta tirke de bibê yew û tewirê xo ramojnê. No semedê îstîkrar û haştîya herême zaf muhîm o. Hêrişê dewleta tirke ya ke sey eşqîyayê Rojhelatê Mîyanenî têgêrana, tena bi yewbîyayîşê şaran eşkenê bêrê vindarnayene. Dewleta tirke têna dişmena kurdan nîya. Ganî her kes karekterê înan ê îşxalkerî hole nas bikero. Ma sey şarê kurdî do vera nê sîstemê qirkerî xover bidê. Ma veng danê heme şar û dewletanê Rojhelatê Mîyanênî ke wa vera na polîtîkaya hêrişkare tewirê xo ramojnê ke bi xurtkerdişê têkoşînî verê hêrişan bêro girewtene.''