KCK: Gerîlayî heta ke şarê Kurdîstanî azad bibo do xo ver bidê!

KCKyî fermandar û gerîlayê ke Heftanîn de xo ver danê fîraz kerdî û vat: ''Gerîlayî senî ke 36 serrî yo ke xo ver danê seba azadîya şarê Kurdîstanî û caardişê estbîyayîşê neteweyîya kurdan do heta peynîye xo ver bidê.''

Konseya Rayberdişî ya KCKyî pê eşkerayîyêke fermandarî û gerîlayê ke xoverdayîşê Heftanînî de îradeyê şarê kurdî ancî mojna fîraz kerdî  

Eşkerayîya KCKyî wina ya:

''Hîşmendîya kolonyalîste û sîstemo sîyasî yê AKP-MHPyî çend qels bibê hende hêrişan kenê. Seba ke şarê kurdî pê xoverdayîşî cewabê nê hêrişan dano, ê hîna zêdêr hêrişan kenê. Nê dişmenî pê pêro hêzanê xo xîret kenê ke estbîyayîşê kurdan werte ra wedarê.

Îqtîdarê AKP-MHPyî 15ê hezîrane de hêrişêko giran o bîn da destpêkerdene. Hêrişê înan ê vera Mexmûr û Şingalî dişmenîya înan a vera kurdan eşkera kenê. Hêrişê vera Şêladizê de zî eşkera bi ke goreyê înan mabênê sivîl û gerîlayan de ferq çin o. Ma pêro keyeyanê şehîdanê xo rê serweşîye wazenê û venga şarê xo danê ke esasê perwerîya seba şehîdan ser o têkoşîn pîk bikero.

15ê hezîrane de hêrişanê vera Şingal û Mexmûrî reyde hêrişê herêma Heftanînî ya Herêmanê Pawitişî yê Medya zî dîya destpêkerdene. Armancê nê hêrişan hem pirodayîşê gerîlayan hem zî îşxalkerdişê Başûrê Kurdîstanî yo. Seba ke ê PKK qey hêrişanê xo sey asteng vînenê, wazenê ke hêverî na astengîye çin bikerê.

Bedelê ci çita beno wa bibo gerîlayî do xo ver bidê

Têgêrayîşê Azadîye yê Kurdîstanî û gerîlayî zanenê ke armancê dewleta tirke çinkerdişê kurdan o. Coka her ca de pê bedelanê pîlan vera nê hêrişan xo ver danê. Gerîlayan Heftanîn de derbê giranî dayî dewleta tirke ro û bi nê hawayî cewab da ke dewlete do nêeşka armancê xo bîyara ca. Sey 36 serranê peyênan gerîlayî heta ke şarê Kurdîstanî azad bibo û estbîyayîşê neteweyê kurdan bigêrîyo binê zixmîye do xo ver bidê. Bedelê ci çita beno wa bibo gerîlayî do xo ver bidê û caardiş, polîtîka û hîşmendîya kolonyalîste do çin bikerê.

Gerîlayî rûmet û ameyoxê şarê kurdî yê

Ma pêro fermandar û gerîlayanê ke qerardarî, isrardarî û îradeyê şarê kurdî xoverdayîşê Heftanînî de reyna mojnayî fîraz kenê. Gerîlayî rûmet û ameyoxê şarê kurdî yê. Gerîlayî rûmetê şarê kurdî temsîl kenê û îsbat kenê ke ameyox do azad bibo. Dewleta tirke 40 serran ra nata seba ke gerîlayan tasfîye bikera hêrişan kena. La gerîlayî vera naye xo ver danê û destkewteyanê ercîyayeyan visnenê destî. Têgêrayîşê Azadîye yê Kurdan û şarê kurdî naye ra pey zî pê xoverdayîşî do biresê cuya azade û demokratîke.

Ganî ciwanê kurdî tewrê gerîlayan bibê

Gerîlayî sembolê fedayîtîya kurdan ê ke her hêrişê dişmenan de bîyî hêzêr û wayîrê îradeyê pîlêrî. Xoverdayîşê gerîlayan xoverdayîşo fîraz ê estbîyayîşî yo. Kurdî çar parçeyanê Kurdîstanî de ganî wayîrê nê xoverdayîşî bivejîyê, dormeyê ci de bêrê pêser. Bi taybetî ganî ciwanê kurdî verê xo zêdêr bidê waranê gerîlayan. Seba ke îradeyê şarê kurdî bimojnê ganî ciwanî tewrê gerîlayan bibê.

Ma gerîlayanê ke hêrişanê dişmenan de pê xoverdayîşê fedayî şehîd bîyî pê mînet û rêzdarî yad kenê, selam kenê şarê ma û gerîlayanê ke xo ver danê. Ma têkoşînê azadkerdişê şarê ma de gerîlayan rê serkewtiş wazenê.''