Hemserekîya Konseya Rayberdişî ya KCKyî bi eşkerayîyêka nuştekîye hêrişê DAÎŞî yê vera Kimanî şermezar kerd û nê pare kerdî:

'23ê çeleyê 2023yî de bajarê Kirmanî yê Îranî de semedê yadkerdişê Kasim Suleymanî şaro ke şîyêne mezelan ser raştê hêrişî ame û qirkerdişo gir qewimîya. Nê hêrişî de bi desan kesan dinyaya xo bedilnaye û bi seyan kesî birîndar bîyî. Ma bi nameyê şar û têgêrayîşê xo kesê ke ameyî qetilkerdene bi rêzdarî yad kenê û sere de keyayanê kesanê ke dinyaya xo bedilnaye, heme şarê Îranî rê serweşîye wazenê, birîndarn rê şîfa wazenê. No hêrişo ke sere ra bewlîyo ke DAÎŞî kerdo û nika DAÎŞî girewt xo ser, ma bişîdetî şermezar kenê.

Bi nê hêrişî de têna şarê Îranî nê  heme şarê Rojhelatê Mîyannênî ame hedefgirewtene. No hêriş bi waştişê xorîkerdişê şerê Rojhelatê Mîyanênî ame kerdene. Peyê nê hêrişî de hezê  ke wazenê şerê Rojhaletê Mîyanênî bibo xorî, ê est ê.  Tay hêzanê ka Hamas û Îsraîl vedayî pê la netîceya ke waştêne dest nêfîna, wazenê ke wa şer bibo xorî û heme herême ra bibo vila. Coka semedê nê çîyo ke destê înan ra yeno kenê. Nê hêzî verî ra tim wazenê ke Îran, Îsraîl û Amertî ka biverdê pê. Hêrişê Kirmanî nê waştiş û planî fîneno meydan. Pîya bi nê hêrişê rîyo raşt nê hêzan ê ke kenê xo sey vera şerê Gazze ramojnê, kewt meydan.

No hêrişo ke hetê DAÎŞî ra ame kerdene reyna rîyê DAÎŞî û hêzê ke peyê ci de vet meydan. Hêzê ke wazenê wa Rojhelatê Mîyanênî de şer bibo xorî, paştî danê DAÎŞî  ke  sere de kurdî wa hêrişê şaran bikerê. Nika zî nê hêzan bi eynî waştişî DAÎŞî rê hêriş da kerdene. Vizêr kam peyê DAÎŞî de bê, ewro zî peyê ci de yo. Têgêrayîşê Azadîye yê Kurdîstanî û şarê Kurdîstanî seba ke verê şerî bîgêro û gonî merişîyo vera DAÎŞî şer kerd, o bin fîna û Rojhelatê Mîyanênî û dinya nê belayî ra xelisna. Vera DAÎŞî têkoşîno tewr pîl hetê kurdan ra ame dayene û ewro ra tepîya zî do têkoşînê ma dewam bikero. No hêriş zî sey hêrişanê ke cuwa ver Vakur, Rojawna û Tirkîya de ameyî kerdene, sey înan o. Sey Kirmanî hêrişanê bînan de zî şar ame hedefgirewtene û bi seyan kesan dinyaya xo bedilnaye.

Sere de nê qirkerdişî hêrişê ke DAÎŞî vera kurdan û Rojhaleta Mîyanênî û şaranê bînan kerdî, pê destê dewleta tirke û Tayyip Erdogan ameyî kerdene.  Çunke ê wazenê ke wa şerê Rojhelatê Mîyanênî xorî bibo. Her cade vera kurdan hêriş kenê û Rojawan de heme binawanî hedef genê. No zî na raştîye mojeno çiman ver. Ganî her kes nê bizano. Şerê vera kurdan yeno manaya xorîkerdiş û  hîrakerdişê şerê Rojhelatê Mîyanênî. Kesê ke Rojhelatê Mîyanênî de haştîye wazenê xo ra ganî vera kurdan şer mekerê.

Ma reyna hêrişê vera Kirmanî şermezar kenê. Kesanê ke dinyaya xo bedilnaye ma înan bi rêzdarî yad kenî û birnîdaran rê şîfa wazenê. Ma dejê şar û îdareyê Îranî pare kenê.''