PDKyî sîyasetmedaro kurd Omer Bartan Tirkîya rê teslîm kerdbi. Konseya Rayberdişî ya KCKyî derheqê mesele de eşkerayîyêke daye.

Eşkerayîya KCKyî wina yo:

''PDKyî sîyasetmedarêko bîn o kurd dewleta tirke rê teslîm kerd ke serrêke û nême ra verî tepiştbi. Sîyasetmedaro kurd ê bi nameyê Omer Bartano ke karanê xo yê sîyasîyan ra Tirkîya de ameyêne cezakerdene, derbazê Başûrê Kurdîstanî bibi. Bartan herinda Ewropa de verê xo da îdareyê kurdan Başûr û bi nê hawayî nêwaşt ke welatî ra vejîyo.  La Başûrê Kurdîstanî de semedo ke Tirkîya gêrayêne ci ame tepiştene. PDK ge ge seba ke zerrîya Tirkîya weş bikera sîyasetmedaranê kurdan tepişnena. Kerdişê winasî yê organanê îdarîyanê ke binê îdareyê PDKyî de yê pêro kurdan dejnenê. Ma venga PDKyî danê ke nê kerdişan war verdo.

Dewleta tirke serkêşîya dişmenîya vera kurdan kena. Vakurê Kurdîstanî û Tirkîya de her roje bi desan sîyasetmedarê kurdî seba ke azadî û heqanê kurdan pawenê tepişîyenê. Omer Bartan zî pê bahaneyanê pûçan amebi cezakerdene. Teslîmkerdişê ey yeno a mana ke PDK bahaneyanê tepişîyayê kurdan tesdîq keno.

Têkilîyê PDKyî yê bi dewleta tirke zeraranê pîlan danê têkoşînê azadîye yê kurdan. PDK hem seba ke şerwanî biremê înan teşwîq keno hem zî sîyasetmedaranê kurdan Tirkîya rê teslîm keno. Nê kerdişê PDKyî destek danê Tirkîya. No tewirê PDKyî tewirê partîyêka kurdan nîyo. Xeylêk endam û şerwanê PKKyî eleqeyê înan pê PDKyî çin o tepişîyenê û erzîyenê zîndanan. Labelê ajano ke gonîya gerîlayan milê ci de ya yan zî noqtayanê gerîlayan dewleta tirke rê vano wexto ke tepişîyeno PDK cade wazeno wa bêro veradayene.

Nê nêzdîbîyayîşê PDKyî mîyanê kurdan de benê sebebê nêrazîbîyayîşan ê pîlan û têkilîyanê mabênê rêxistinanê kurdan sabote keno. Dewleta tirke serkêşîya dişmenîya vera kurdan kena û wazena pêro kurdan qir bikera. Paştdayîşê seba dewleta tirke zî zerar dano destkewteyan û têkoşînê pêro parçeyanê Kurdîstanî. Coka ganî PDK nê têgêrayîşê xo ra fe vera bido, sîyasetmedaranê kurdan dewleta tirke ya îşxalkere rê teslîm nêkero.''