Komîteya Şaran û Bawerîyan a KCKyî bi wesîleya menga Muharemî eşkerayîyêke daye û nê pare kerdî:

''Misilmanê şîî û elewîyî kewtî mengêka bîne ya Muharemî. Înan bi yadkerdişê têkoşînê heq û edaletî yê Hz. Huseyînî yê vera zalimîye dest pê Rojeyê Muharemî kerd. Têgêrayîşê ma zî vano ke ganî trajedîyê komel û bawerîye yê winasênî nêrê ciwîyayene û ganî neheqîye û zulmî zî biqedê. Ma venga pêro tefergîranê heq û heqîqatî danê ke ewro vera Yezîtan xeta moderne ya Huseynîyî de bibê.

Kerbela roje û rojê şînî yenê manaya yadkerdişî ke elewî û misilmanê şîîr Huseyînî û embazanê ci yad kenê û heman wextî de zalimîya Kerbela zî nêverdenê vîr a şorê.Xoverdayîşê Kerbela û tewirê Hz. Huseyîn ewro tewr zaf venga elewîyan dano ke bibê Huseynî. Seba ke Yezîtê ke dewleta tirke îdare kenê warê bawerî û komelkî de gefanê elewîyan wanenê, elewîyan rê teda û şîdetî kenê. Dewleta tirke tarîx de zaf reyî elewîyî qetil kerdî. Qirkerdişo kulturel ê elewîyan û hêrişê asîmîlasyonî zî her wextî ra zafêr ê. Coka na menga Muharemî seba elewîyan mîyanê rewşêka xirabe de dest pêkerde. Seba ke Tirkîya hetê hişmendîya Yezîtî ra yena îdarekerdene nê tehlukeyî qewimîyenê. Elewîyê ke nê tehlukeyan vînenê ganî yadkerdişanê menga Muharemî, îbadet û xizmetê xo û yewîya xo xurtêr bikerê û mîyanê têkoşînê demokrasî de refanê xo xurtêr bikerê.

Elewîyî serê xeta têkoşînê çêrî û fedakarî ya Îmam Huseyînî de eşkenê tehlukeyê serê bawerî, kultur, ziwan, estbîyayîş û azadîya xo bişiknê. Bi na wesîle ma venga pêro elewîyan danê ke tewirê Huseynî yê vera zaliman bikerê tewirê xo. Ma venga ê kesanê ke Îmam Huseyînî sey rayberê xo vînenê, danê ke wa vajê eke zulm est o, Huseynê mazluman est ê. Têkoşînê vera dewleta tirke yeno manaya dewamkerdişê tradîsyonê Kerbela. Coka têkoşînê vera faşîzmê AKP-MHPyî yo ke serkêşîya Yezîtîye keno, yeno manaya newekerdişê raştîya Huseynî ya têkoşînê demokrasî.

Kamca de Yezît est bo ganî elewîyî têkoşînê demokratîkî vera ci bikerê. Ma pê bawer ê ke elewîyî zî Muharem de hîna zaf xoverdayîşê Kerbela yad bikerê. Cewherê elewîtîye zî no yo. Terefgîrê xoverdayîşê Kerbela tim bîyî terefgîrê têkoşînê azadî û demokrasîyî. Ma pê bawer ê ke pêro kesê ke xoverdayîşê Kerbela sey heq û heqîqatî vînenê, xoverdayîşê vera Yezîtanê modernan zî xizmetê tewr fîrazî kenê.

Na menga Muharemî de zî bi wesîleya îbadet, yadkerdişî ma reyna nîyaz kenê ke kesê ke Îmam Huseyînî zerrîya xo de hîs kenê xizmetê înan defterê raştîye de do bêrê nuştene. Ma venga pêro zerrîwazanê Huseyînan, Hz. Huseyîn û cananê şehîdan danê ke vera zulmî têkoşînê xo de înan bidê ciwîyayene. Bi na wesîle ma sey têgêrayîşê modernî yê Huseynîyî dîyar kenê ke yadkerdişê înan Têkoşînê Azadîye yê Kurdîstanî de ciwîyeno. Ma venga pêro kesan danê ke tewrê refanê demokrasî û têkoşînê azadîye bibê, vera tradîsyonê Yezîtî yo ke wazeno kultur, şar, bawerî, demokrasî û çepgîran qir bikero, xoverdayîşî geş bikerê.''