Konseya Rayberdişî ya KCKyî ewro eşkerayîyêka nuştekîye daye.

Eşkerayîya KCKyî wina ya:

''Dewleta tirke ya faşîst û kolonyalîste bi her hawayî hêrişê destkewteyanê kurdan kena û aKP-MHP zî vera hêrişê Rojawan, Şingal, Mexmûr, Herêmanê Pawitişî yê Medya û Başûrê Kurdîstanî keno. 16ê hezîrane de artêşa tirke ya îşxalkere hêrişê Heftanînî kerd û armanc kerd ke tîya ra dima zî hêrişê Zap û Avaşînî bikera. La xoverdayîşê Heftanînî verê înan girewt. Dewleta tirke armanc kena ke pêro Başûrê Kurdîstan, Rojawan û Rojhelatê Mîyanênî îşxal bikera.

PDK PKK sey mesuldarê hêrişanê dewleta tirke mojneno û nê hêrişan meşrû û normalîze keno. Goreyê PDKyî Heftanîn de rîyê PKKyî ra zerar reseno sivîlan ser. La ê dişmenîya vera kurdan mîyan kenê. PDK wina nêzdîyê mesele beno ke eke gerîlayî xoverdayîşê xo yê vera TCyî  ra fek vera nêdê ê do hêrişê gerîlayan bikerê. PDK wazeno ke cayanê gerîlayan de pêşmergeyan ci bikero.

11ê tebaxe de zî Xinere de yewinanê Iraqî waşt ke ê do tay noqtayan sey paravan bixebitnê la gerîlayan no qebul nêkerd. Dewleta tirke yewinanê Iraqî ser o bombayî varnayî û di fermandarê Iraqî û embazê ma Fermandar Agît Garzan nê hêrişî de şehîd bîyî. PDKyî hê hêrişî de zî PKK sey mesuldar dî. PDK herinda ke dewleta tirke rê vajo meseleya kurdan çareser bi rayîrê demokratîkî bikera hêrişanê vera PKKyîjan sey meşrû mojneno.

Yeno famkerdene ke TC do hêriş bikero, PDK zî do PKK sey bahane bimojno û seba vetişê PKKyîjan zemînêk biaferno û tewr peynî de zî bi rayîrê hêrişan no plan do bêro caardene. Hêrişê vera sivîlan zî seba meşrûkerdişê nê planî yenê kerdene. Yeno famkerdene ke seke ma alozîya Zînî Wertê de zî vat PDK wazeno bi hemkarîya TCyî PKK tasfîye bikero û seba naye zî wazeno Iraq tewrê plananê xo bikero.

Dewleta tirke dişmena destkewteyanê kurdan a. Coka TC hêrişê Rojawanî keno. Referandumê 2017î de eşkera bi ke kam dişmenê statuyê kurdan o. Bi vatişê 'sebebê hêrişan PKK yo' çew nêeşkeno na raştîye mîyan bikero.

Tewirê PKKyî tim eşkera û zelal o. Kurdan zaf rey dî ke gerîlayî destkewte û statuyê kurdan pawenê. Wexto ke DAÎŞî hêrişê Kerkûk û Hewlêrî kerd reya verêne gerîlayî vera naye têgêrayî. Dinya alem zanena ke êzidîyî hetê kam yew kesan ra ameyî xelisnayene. Coka çew nêeşkeno vajo ke gerîlayî statuyê înan visnenê tehluke.

Şarê kurdî yê welatperwerî û rayaumûmîya kurdan a demokratîke rê;

Dewleta tirke wazena ke Rojawan û Başûrê Kurdîstanî îşxal û îlhaq bikera û pêro kurdan qir bikera. La PDK na raştîye nêvîneno û beno parçeyê polîtîkayanê qirkerdişî yê dewleta tirke. Dewleta tirke sey her wextî kurdan vera yewbînan kena şerî ra. PDK zî bi vatiş û polîtîkayanê xo nê komployî ano ca.

Ma qet nêwazenê ke kurdî vera yewbînan şer bikerê. Ma alozîya Zînî Wertê de zî bi hawayêkê hîsgerî nêzdîyê mesele bîyî û şerî ra xo dûrî girewt. La wextêk de ke dewleta tirke vera şar û gerîlayanê ma şer kena PDK zî alizîyeno ma. Ma xîret kerd ke na rewşe bi nermîye safî bikerê la tewrê PDKyî negatîf o.

Ma venga pêro welatperweran û şarê kurdî danê ke vera hêrişanê dewleta tirke kişta gerîlayan de ca bigêrê. Çunke dişmenîya vera PKKyî dişmenîya vera pêro kurdan a. Ma venga PDKyî danê ke seba menfaatan ameyoxê kurdan nêvisno tehluke, hemkarê hêrişanê dewleta tirke nêbo, tewrê xebetanê yewîya neteweyîye ya kurdan bibo û statuyê Başûrî bipawo.

Şerê Hîreyênî yê Dinya de her çiqas seba kurdan îmkan û firsendî estê zî tehlukeyî zî estê. Ma venga pêro şarê xo yê welatperwerî, hêzanê sîyasîyan, roşnvîr û hunermendan danê ke bi caardişê yewîya neteweyîye tehlukeyanê vera kurdan pûç bikerê, seba ke pêro parçeyê Kurdîstanî biresê cuya azade û demokratîkî îmkan û firsendan bixebitnê, têkoşîn berz bikerê.''