Komîteya Têkilîyanê Karanê Teberî ya KCKyî Qirkerdişê Zaxoyî ser o eşkerayîyêke daye.

Eşkerayîye wina ya:

''20ê temmuza 2022yî ra nata dewleta tirke ya faşîste û îşxalkere bi hemkarîya PDKyî hêrişanê vera Başûrê Kurdîstanî rê bêmabên dewam kena. Vizêr nêmroje ra dima artêşa tirke dewa Perexî ya herêma Derkarî ya Zaxoyî de bi topan seyrangehê ereban da bombayan ver.

Bombardumanê artêşa tirke ya îşxalkere de 8 hemwelatîyan dinyaya xo bedilnaye û 23 kesî zî birîndar bîyî. Mîyanê 7 menganê peyênan de hêrişanê dewleta tirke ya faşîste de 28 sivîlî ameyî qetilkerdene. Dewleta tirke Başûr, Rojawan û Vakurê Kurdîstanî de qirkerdişan kena. Dewleta tirke ya faşîst Neteweyanê Yewbîyayeyan, Amerîka, NATO, Yewîya Ewropa û hemkaranê kurdan ra destek gêna, polîtîkayanê xo de sînoran nêşinasnena, sivîlan û gerîlayan reyde xozaya Kurdîstanî zî çin kena, vêşnena û rijnena.

Dewleta tirke Zap, Avaşîn û Metîna de vera gerîlayan bombayanê nukleeran, çekanê termobarîkan û çekanê kîmyewîyan şuxilnena û sûcê şerî kena. Gemarîya şerî ya AKP-MHPyî Şengal, Mexmûr, Kune Masî, Kelar, Rojava, Mûsil-Nînova, Silêmanî û tewr peynî Zaxo de bi desan merdimî qetil kerdî û bi desan merdimî zî birîndar kerdî.

Bi bêvengîye hukmatê Iraqî û Başûrê Kurdîstanî zî nê hêrişan kenê meşrû. Ganî sere de Neteweyê Yewbîyayeyî, Amerîka û Yewîya Ewropa, pêro hêzê mîyanneteweyî bibê wayîrê tewirêkî û nêbê hemkarê sûcanê şerî yê dewleta tirke.

Dewleta tirke ya ke bi xeyalanê Neo-Osmanîyan herême de gonî rijnena, bêra vindarnayene. Ganî pêro dînamîkê herême ney bizanê ke heta faşîzmê tirkan nêro bêtesîrkerdene Rojhelatê Mîyanênî û dinya de aramîye do nêra destvistene.

Ma venga şar û dostanê xo danê ke vera nê hêrişî reyna tewir û çalakîyanê xo asta rêxistinkerde û berze de bimojnê. Ma merdimanê ke nê hêrişî de şehîd bîyê, bi rêzdarî yad kenê, birîndaran ra şîfaya xeyrîne wazenê. Ma sey têgêrayîşî soz danê ke ma do hesabê nê qirkerdişî rejîmê dewleta tirke ra bipersê.''