Hemserekîya Konseya Rayberdişî ya KCKyî derheqê serrgêra dardekerdişê Şêx Seîd û 47 embazanê ci de eşkerayîyêke daye. Eşkerayîye wina ya:

''96 serrî verî Şêx Seîd û 47 embazê ci Warê Dagkapiyî yê Amedî de ameyî dardekerdene. Ma nê risipîyanê kurdanê ke seba azadîya Kurdîstanî ganê xo feda kerdî, bi minetî yad kenê. Ma do qîrayîşê înan ê serê sehpaya qirkerdişî, hesreta Kurdîstanê azadî ya ke emanetê ewladanê xo kerda qetî do ser bivisnê.

Rayber Apoyî tim ard ziwan ke polîtîkayanê qirkerdişê kurdan serra 1925î de dest pêkerd. A roje ra nata dewleta tirke ya îşxalkere-qirkere vera kurdan nê polîtîkayanê qirkerdişî ana ca. Ewro zî hîşmendîya qirkere, polîtîka û kerdişê xo goreyê ê çaxî qat bi qat zêdê kerdî. A roja ke Şêx Seîdî û 47 embazê ci ameyê dardekerdene ra nata na tehlukeya qirkerdişî vera zêdîyena. La ewro şarê kurdî babeta şinasnayîşê dişmenanê kurdan û polîtîkayanê qirkerdişî de zaf zanaye yo. Hesreta azadî û demokrasî seba pêro şarê kurdî bîya hesretêka esase. No zî seba çinkerdişê hêzan ê kolonyalîstan û qirkeran hêzêkê pir heybetînî vejeno werte. Her çiqas zorî û astengîyî estbê zî wexto ke têkoşîn bêro kerdene her wextî ra zêdêr ma nêzdîyê hesreta Kurdîstanê azadî yê Şêx Seîd û embazanê ci yê.

Şêx Seîd û 47 risîpîyanê kurdan serê sehpaya dardekerdişî de tewirêko rûmetên mojna. Înan serê sehpaya qirayî ke de doman û tornê înan do alaya têkoşînî bigêrê û ser bivisnê. Bi des serran o ke kêna û lajê kurdî û domanê înan nê tewirê rûmetênî têkoşînê vera kolonyalîzm û qirkerdişî de temsîl kenê û ciwîyenê. Hînî hesreta Kurdîstanê azadî ya Şêx Seîd û Seyîd Rizayî  her koy, gelîye û şaristanî de yena ciwîyayene. Sey bedenanê Şêx Seîd û Seyîd Rizayî bi des hezaran şehîdê nê erdî pê estbîyayîşê xo qîrayî ke ê do nê şarî temsîl bikerê û do çin nêbê. Laj û kênayê kurdî û domanê înan ewro her cayî de seba Şêx Seîd, Seyîd Rizayî û pêro şehîdan xo ver danê. Şaro ke wayîrê xoverdayoxan ê winasênan bo, teqez do bireso azadîye û bi hawayêkê demokratîkî biciwîyo.

Serra 1925î nata îradeyê paytext Amedo ke bi des hezaran şehîdê ci estê, û îradeyê Kurdîstanî qet yew hêz nêeşkeno bişikno. Ewro ruhê azadîye yo ke her cayê Kurdîstanî ra gêreno, ruhê kurdê azadî yo. Nê ruhî vizêr zî xo ver dabi, no ruh ewro zî xo ver dano û do siba zî xo ver bido. Kêna û lajê şarê kurdî do bi des hezaran şehîdanê xo vîr a nêkerê. Ê do sey înan bibê fedayîyê şarê kurdî. Ewro êyê ke Zap, Metîna û Avaşîn de xo ver danê pêro kêna û lajê Kurdîstanî yê.

Şarê kurdî yo ke bi des serran o bi hawayêkê fedayîyî şer keno, vera her şiklê zulm û cîyakerîye vejîyeno do nê dejan bikero esas û omînê cuya azade û demokratîke. Şarê kurdî do nê dejan ra weşîye û azadîye peyda bikero.

Roja ke Şêx Seîd û 47 embazê ci ameybî dardekerdene seba Rayber Apoyî zî bira dardekerdişî ameye dayene. Kolonyalîstanê qirkeran vatêne k çarenusê ma no yo. Ma zî sey ê bînanê ke xo ver dayêne goreyê perwerîya bi şehîdan nê çarenusî pûç kenê û do Kurdîstanê azadî û demokratîkî awan bikerê. Ma do şayîya fîrazkerdişî ya tewr pîle Warê Dagkapiyî de bikerê.

Înan bawer kerdbi ke doman û tornê înan do bibê teqîbkeranê dewaya înan. Ma do bibê layîqê na bawerîye. Nika ra pey zî têkoşîn do bêro xurtkerdene. Ma do qetî hesreta înan bîyarê ca.''