Hemserekîya Konseya Rayberdişî ya KCKyî, derheqê qirkerdişê sivîlî yê dewleta Tirkî de ke Başûrê Kurdistanî de kerdibi eşkerayîyêka nûştekîye daye. Hêrişanê dewleta Tirkî yê hewayîyan ke roja Çarşemeyî keridibi de sivîlî ameybî hedefgirewtene û çar kesan cuya xo vîndî kerdebî.

Eşkerayîya KCKyî de ca dîya nînan:

“Şarê ma çar perçeyanê Kurdistanî de û teberê welatî de xoverdayîşê azadîye yê tewr berzî ke tarîxê xo de bîyo şahid dano. No xoverdayîşo biîhtîşam ê şarê ma dostanê ma kêfweş keno û dişmenanê zî qehr keno. Dewleta Tirkî ya qirkerdox a ke hemverê îradeyê azadîye yê şarê Kurdî de nêeşkena tehemul bikero bi heme barbarîya xo her perçe de hêrişê şarê ma kena. Rejimê qirkerdoxî tewr peynî mintiqaya Reşawa ya Deralukî ser o hêrişo hewayî kerd û çar hemwelatijê ma qetl kerdî, di hemwelatijê ma zî birîndar bîyî. Sere de ma hemwelatijê ma yê ke hêrişanê TCyê faşîstî de şehîd kewtê rê Homayî ra rehmet wazenê, birîndaran rê zî şîfaya lezgîne wazenê. Sere de keyeyanê şehîd û birîndaran rê ma heme şarê Kurdî rê tazîyeya xo anê ziwan.”  

TC YO QIRKERDOX HEMEYÊ KURDAN HEDEF GÊNO

“No hêriş hêrişo ewilên ê dewleta Tirkî ya faşîste yê hemverê şarê ma yê sivîlî yê Başûrê Kurdistanî nêyo. Rejimê qirkerdoxî heta nika Başûrê Kurdistanî de bi seyan sivîlê ma qetl kerdê. Nê rejimê faşîstî heman wextî de Rojava û Vakûrê Kurdistanî de zî şarê ma yo sivîl hedef girewto û bi seyan qetl kerdê. Şarêk bi ewladanê xo û serkêşanê xo esto. Serkêşan seba ke sîyasetê çinêkerdiş û înkarî yê serê Kurdan bişiknê xo dayo vernî û şar zî dorê serkêş û ewladanê xo de ameyê têhet. Naye ra her kes mecbûr mendo ke şarê Kurdî pîya bi serkêşanê înan qebûl bikero, yan zî pîya bi şarê înan şarê Kurdî hedef bigîro. Dinya hêdî hêdî mecbûr manena ke Kurdan pîya bi serkêşanê înan qebûl bikero. Naye ra dewleta Tirkî bi hawayêkê xeylî hişmendî pîya bi ewlad û serkêşanê ci şarê Kurdî hedef gêna. Bê ke ferq bifîno mabên hêrişê heme Kurdan kena.  

KOORDÎNATAN TEYAREYANÊ KEŞIFÎ YÊ AMERÎKA RA GÊNA

Nê hêrişê TCyî sere de Amerîka bi nezaret û paştîdayîşê hêzanê mîyanneteweyîyan de virazênê. Koordînatê nuqteyanê ke yenê pirodayene bîzat hetê teyareyanê keşifî yê Amerîka ra dîyenê teyareyanê şerî yê Tirkan. Eşkera yo ke Amerîka çarçiwaya mefaatanê xo de pêşkêşkerdişê ‘gonîya Kurdan’ de xo rê şermêk nêvînena. Hukmatê Başûrê Kurdistanî zî hem hemverê wayîranê teyareyanê keşifî û hem zî hemverê wayîranê teyareyanê şerî yê ke hêriş kenê bêveng maneno. Bêguman na bêvengî hetê şarê ma ra sey ‘hemparîya sûcî’ yena ercnayene.  

ŞEHÎDÊ DERALUKÎ DO MUCADELEYÊ MA DE BICIWÎYÊ

Bêguman bedelê ci çi beno wa bibo şaro Kurd her çar perçeyanê Kurdistanî de hîna beno azad û biqerar o ke bibo wayîrê statu. Na qerardarîye sere de îradeyê gerîla yê sey pola, bi grevanê vêşanîye yê ke çarperçeyanê Kurdistanî de û teberê welatî de dewam kenê û bi çalakîyanê demokratîkan yena ramojnayene. Wa guman çinê bo ke şehîdê Deralukî zî do bi heman hawayî mucadeleyê ma de bêrê ciwîyayene û ma do wayîrê vîrardişê înan vejîyê. Ma nê bingeyî de veng danê hemeyê şarê xo ke şehîdanê ma rê wayîr vejîyê û hemverê faşîzmê Tirkî de mucadeleyî xurt bikerê. Reyna ma şehîdanê xo rê Homayî ra rehmet wazenê, birîndaran rê zî şîfaya lezgîne wazenê û vanê wa sereyê keyeyanê şehîdan û şarê Kurdî weş bo.”