Hemserekîya Konseya Rayberdişî ya KCKyî derheqê şewatê daristananê Tirkîya de  eşkerayîyêke daye. KCKyî vera îdîaya 'PKKyî şewat veto' nêrazîbîyayîşê xo mojna. Eşkerayîyê wina ya:

''Qeraxanê Ege û Dengiz ê Sipî de û xeylêk cayanê Tirkîya de adir kewto daristanan. Nê şewatî hema zî dewam kenê. Daristanî senî ke kokpp bingeyî yê hemsengîya ekolojîke yê cigêrê pêro gandaran ê zî. Coka nê şewatî seba pêro merdimîye û gandaran felaketêko pîl o. Ma pêro şaranê Tirkîya rê vanê derbazî bo ke pabeyê hewnaşîyayîşê şewatî yê. Ma pê dejê înan xemgîn ê.

Xeylêk rexneyê winasênî ameyî kerdene ke Tirkîya de şewatan ra dima xebatê tefênayîşî nêameyî kerdene. Rayaumumîye de tay îdîa ameyî kerdene ke nê şewatî seba rantî ameyî kerdene. Tay dişmenanê kurdan û kesanê ke wazenê mabênê şaran de dişmenîye bikerê eşkerayîyê povakatîfî dayî ke kurdan nê cayî vêşnayê. Tay kesî nê şewatî erzenê milê PKKyî û wazenê komelo ke pê şovenîzmî jehrî bîyo hêrişê kurdan bikero. Tay cayan de seba lînç û kiştişê kurdan xîretî yenê kerdene.

Vilakerdişê xeberan ê winasênan ke PKK û kurdan sûcdar kenê karê hêzanê şerê taybetî yê. Bi nê hawayî hêrişê vera kurdan yenê armanckerdene. Ê wazenê îradeyê kurdan bişiknê, kurdan kurdayetîye ra dûrî bivisnê.

Hukmatê AKP-MHPyî zêde teşhîr bîyo, paştdayîşo komelkî yê ci bîyo kêm. Bi taybeyî îqtîdarî komel kerdo di parçeyan. Semedo ke nê şewatî nêameyî hewnakerdene mîyanê şarî de vera îqtîdarî hêrs zêdîyayo. La AKP-MHP û weşanê şerê taybetî semedo ke bala şarî biancê cayêkê bînî wazenê nê şewatan bierzê milê PKKyî û kurdan. Na bêexlaqîyêka pîl û polîtîkayêka gemarin a. Şarê ma û rayaumûmîye pê nînan bawer nêkenê û vera şovenîzmî xîret kenê.

Îqtîdarî semedê serekkomarîye û hukmatî bi desan teyarayî hêrînayî, qesrêka 1001 odayan viraşte, bi seyan teyarayê ci yê şerî estê la nêeşkeno heîkopter û teyarayan peyda bikero ke nê şewatan hewna bikero. Hukmat wazeno nê felaketan seba menfaatê xo bişuxilno û serê raştîyan bigêro. Pêro hêrişê vera kurdan semedo ke netîceya polîtîkayanê faşîstan de qewimîyenê îqtîdar keno ke nê hêrişan normalîze bikero. Kesê ke Konya de ameybî kiştene menga gulane de vera înan hêriş amebi kerdene. Hêrişî ra dima înan rê amebi vatene ke 'Ma nîjadperest ê, ma do şima werte ra wedarê.' La rixmê ney zî hêrişkerî nêameyî tepiştene û tedbîrî nêameyî girewtene.

Xeberê ke vanê şewat hetê kurdan û PKKyî ra ame vetene bi temamî zûr ê û senaryoyê şerê taybetî yê. Pê nê zûran xîret yeno kerdene ke serê kerdişanê antî-ekolojîkan ê îqtîdarî bêro girewtene û têkoşînê demokrasî yê kurdan û şaranê Tirkîya bêro astengkerdene. Îqtîdarê AKP-MHPyî ney de peynîya xo vîneno. Coka îqtîdar pê provakasyonanê cîya-cîyayan ê 6-7ê êlula 1955î yê vera gayrîmisilmanan ewro vera kurdan ceribneno.

Coka îqtîdar şewatê daristanan zî vera kurdan û hêzanê demokrasî vurneno hacetêkê şerî. Terefgîr û hemkarê nê îqtîdarê faşîstî vera şaranê Tirkîya vurîyayê komekê. Ma nê xîretanê faşîstan ê dişmenê kurdan ser o şarê xo û şaranê Tirkîya hîşyar kenê. Nê kerdişê faşîstan do bêceza nêmanê. Vetişê şerê zereyî yê kurdan û tirkan sûcêko giran o. 

Şarê ma û Têgêrayîşê Azadîye nê welatê hemparî rê cuyêka azad û demokratîk hêvî kenê. Êyê ke Kurdîstan û Tirkîya sey welatêkê hemparî nêvînenê û vera nê welatî sûcan kenê do hetê şaranê ma ra qetî bêrê cezakerdene.

Vera nê hêrişkeran û hêzanê faşîstanê ke pêro şaranê Tirkîya, hêzanê demokrasî û kurdan sey dişmenî vînenê ma venga pêro şarê kurdî danê ke mil bi mil têkoşîn bikerê, îqtîdarê AKP-MHPyî ra bixelisnê û Tirkîyaya demokratîke û Kurdîstanê azadî biafernê.''