Hemserekîya Konseya Rayberdişî ya KCKyî derheqê bira qefilnayîşê hîrê partîyan a Iraqî de eşkerayîyêke daye. 

Eşkerayîye wina ya:

''Iraq de bi bahaneya ke têgêrayîşê ma de eleqeyê nînan est o bira qefilnayîşê hîrê partîyan ameye girewtene. Eşkera yo hukmatê Iraqî bi tedayanê dewleta tirke û PDKyî na bire girewta. Coka na bire sîyasî ya û antîdemokratîk a. Ma hukmatê Iraqî bi tûjî şermezar kenê. Hukmatê Iraqî bi na bire tarîx de cayêko gemarin verda.

PADÊ, Tevgera Azadî û Partîya Cepheyê Têkoşînê Demokratîkî goreyê qanûnanê Iraqî ronîyayê û sûcdarîya vera nînan bêbinge yê. Nê partîyî teyna fikranê Rayber Apoyî rê hûrmet kenê. Naye ra ber yew eleqeyê ma bi nînan çin o. Têgêrayîşê ma wextê hêrişanê DAÎŞî de şer kerd û erdê Iraqî DAÎŞî ra xelisnabi. O çax hukmatê Iraqî verê rayaumûmîye de têgêrayîşê ma rê sipas kerdbî. La ewro hukmatê Iraqî hemkaranê DAÎŞî de kar keno û keda ma înkar keno. Mabênê DAÎŞ û Erdoganî de ferqêk çin o. Hukmatê Iraqî bi hemkarîya Erdoganî şaranê xo ver bi tehlukeyêkî beno. Dewleta tirke senî nêzdîyê kurdan bena wina nêzdîyê Iraqî zî do biba. Dewleta tirke kena ke şarî bikewê pê û bi nê hawayî a zî biresa armancanê xo. Coka ma venga hêzanê sîyasî, partîyan, roşnvîran û şaranê Iraqî danê ke vera kerdişanê hukmatê xo tewir bigêrê.

Manîdar o ke bira qefilnayîşê PADÊ serrgêra Qirkerdişê Şingalî de dîyaya. Hukmatê Iraqî bi na bire kerd ke keyfê dewleta tirke bîyaro. PADÊ ê kesan ra yeno pê ke wextê hêrişan de înan Şingal nêteriknabi. Bi qefilnayîşê PADÊ yeno waştene ke êyê ke Şingalî ra remayê wa hukmê Şingalî bikerê. Astengkerdişê îradeyê Şingalî do meseleyan giranêr bikero. Qefilnayîşê PADÊ planê dewleta tirke û PDKyî yo. Nê serê Şingalî planan virazenê û kenê ke meseleyê Şingalî do dewam bikerê. 

Ma ancî na bira hukmatê Iraqî şermezar kenê. Teyna hukmatê Iraqî ney her kes nê kerdişan ra mesuldar o. Coka ma venga hêzanê Iraqî danê ke mesuldarîyanê xo bîyarê ca. Ma venga roşnvîran, dezgehan, demokratan û şaranê Başûrê Kurdîstanî û Iraqî da ke vera na bira antîdemokratîke û neheqe tewir bimojnê.''