KCK: Ganî elewîyî vera faşîzmê îqtîdarî xo ver bidê

KCKyî hêrişê faşîstî yê vera dezgehanê elewîyan şermezar kerdî û vat: ''Têkoşînê demokrasî yê vera nê hêrişan yeno manaya newekerdişê raştîya Huseyînî.''

Komîteya Şar û Bawerîyan a KCKyî derheqê hêrişanê vera dezgehanê elewîyan de eşkerayîyêke daye.

Eşkerayîye wina ya:

''Verî menga Muharemî de je sey 'Menga Heramî' şinasîyena, ma hêrişanê vera elewîyan şermezar kenê ke seba yadkerdişê şehîdanê Kerbela rojeyê Muharemî gêbê. Ma venga elewîyan danê ke vera faşîzm û hêrişan têkoşînê yewî û demokrasî bikerê.

Ma venga elewîyan danê ke goreyê fermanê rayîrê heqîqetî vera faşîzmê AKP-MHPyî, bi xurtî û bi tesîrî tewirî bimojnê. Ma pê bawer ê ke elewîyî do cewabê xurtî bidê nê hêrişan û bi yewîya xo cewab bidê faşîzmî. Seba têkoşînê demokrasî yê vera faşîzmî nê prosesî de ma venga têgêrayîş, ciwan, cinî, dezgeh û rêxistinanê elewîyan danê ke mesuldarîya xo ya tarîxîye bîyarê ca.

Hêzê wayîrê mezg û sentezê Tirk-Îslamî yê, resayî a aste ke şaran û bawerîyanê herême rê gefan wanenê, hêriş kenê, bi polîtîkayanê qirkerdişî xîret kenê şarî qir bikerê. Tarîxê dewleta tirke tarîxê qirkerdişê şaran û bawerîyano. Nê şaran ra yew zî elewî yê ke tim raştê qirkerdişê kulturel û fîzîkî ameyê. Dewleta tirke bi qirkerdişê elewîyan û kurdan kokê xo naro. Rejîmê AKP-MHPyî zî dewlete ra wetêr o. Îqtîdar elewîyan de pêvînayîş keno, cemxaneyan zîyaret keno labelê wa elewîyî bizanê ke karakterê na dewlete faşîst o. Dewleta tirke seba qirkerdişê elewîyan amadekarîye kena. Nêbo çira mîyanê înan de 20-30 hezar cergê DAÎŞî est ê. Hêzê ci yê paramîlîterî est ê ke SADATî rêxisin kerdê. Polîsî bi temamî binê xizmetê înan de yê la vera hêrişan polîsî tênêgêrenê. Înan nika bi eşkerayîyan vanê ke hêrişkerî destbend kerdê. Gelo ê kam ê? Senî bêrêxistinî, bêamadekarî, bêplanî nê kesî bi hemwextî hêriş kenê?

Nê pêro mojnenê ke Tirkîya de vera elewîyan prosesêko tehlukeyîn dîyayo destpêkerdene. Ganî elewîyî xo rêxistin bikerê, peynîya rewşa parçebîyaye bîyarê û rojdemî de eleqedar bibê. Ganî elewîyî bizanê ke seba destvistişê azadîya bawerîye û heqanê xo xopawitişê xo xurt bikerê û komelê xo bipawê. Faşîzmê AKP-MHPyî Yezîtî temsîl keno. Coka elewîyî zî ganî pê têkoşînê vera AKP-MHPyî binê Huseyînî. Ma wazenê bîyarê vîrê elewîyan ke goreyê bawerîya elewîtîye eke cayêk de Yezît est bo ganî elewîyî tewrê têkoşînê demokratîkî bibê.

Her çî ra verî ganî elewîyî seba azadîya bawerîya xo têkoşîn bikerê. Seba ney zî girîng o ke elewîyî cade peynîya tewirê parçebîyayeyî bîyarê, çarçewa perspektîf û bernameyêkê hemparî de vera faşîzmî cepheyê têkoşînê hemparî de bibê yew, xo pîl bikerê û xurt bikerê. Sere de elewîyî ganî pêro hêzê muxalîfî û demokratîkî yê Tirkîya, na raştîye bivînê û têkoşîn bikerê.

Ma wazenê bîyarê vîrê elewîyan, hêzanê çepgîr, sosyalîst û demokratîkan ke tewirê Huseyînî pawitişê heqê mazlûman bi têkoşînê vera dewlete û îqtîdarê çete, kiştox û faşîstan beno, pê pîlkerdiş û xurtkerdişê têkoşînî beno. Bi na wesîle ma reyna wazenê vajê ke têkoşîno hempar eşkeno verê hêrişanê neweyan bigêro. Kolonyalîzmê tirkan bingeyê xo Tirk-Îslamî ra gêno. Coka vera nê hêrişan ma venga elewîyan, dormeyanê misilmananê demokratîkan, şarê êzidîyan û hêzanê demokrasî danê ke vera Yezîtê nê çaxî xo ver bidê.''