Hemserekîya Konseya Rayberdişî ya KCKyî derheqê hêrişanê dewleta tirke de eşkerayîyêke weşanaye.

Eşkerayîya KCKyî wina ya:

''Dewleta tirke ya faşîste sey DAÎŞî hêrişê Mexmûr, Şingal û Herêmanê Pawitişî yê Medya kerd. Pê nê hêrişan dewleta tirke reyna dişmenîya xo ya vera kurdan mojnaye. Seba dewleta tirke ferqê qet yew kurdî çin o. Kurdê ke wazenê pê nasname, ziwan û kulturê xo biciwîyê seba dewleta tirke dişmen ê. 

Nê hêrişê dewleta tirke hêrişê polîtîkaya qirkerdişê kurdan o. Coka her kes pey goş keno, paştî dano nê hêrişan. Hukmatê Iraqî zî nê hêrişî tesdîq kerdî.  Mabênê înan û dewleta tirke de vera kurdan menfaatê hemparî estê. Rixmê ney şarê sivîlî vera hêrişanê serê Şingal û Mexmûrî nêrazîbîyayîşêko xurt mojna.

Hêzê Koalîsyonî yê ke rayberîya ci DYA kena pê tesdîqê nê hêrişan bîyî hemkarê qirkerdişê kurdan.Tirkîya zî endamîya xo ya NATOyî nê hêrişan de xebitnena. Şarê ma nê hêrişan do xo vîr a mekero û nê hêz û dewletî wijdanan de û verê tarîxî de do bêrê hukmkerdene. 

PDK û YNK zî nê hêrişan ra berpirsîyar ê. Beno ke fermîyetî de warê hewayî binê kontrolî yê hêzanê Iraqî û Koalîsyonî de yê la nê hêrişî warê hewayî rê Kurdîstanî de benê. Coka PDK û YNK zî berpirsîyar ê ke vera nê hêrişan tewirê xo bimojnê. Bêvengîya înan sey hemkarîya nê hêrişan a. 

Peygoşîya dişmenîya dewleta tirke ya vera kurdan, peygoşîya hêrişanê dewleta tirke yê vera kurdanseba her hêzêkê sîyasî yê kurdan yena manaya çimgirewtiş. Dewleta tirke hêrişanê xo bi nê hawayî kena meşrû. Wextêk de ke Rojhelatê Mîyanênî de hemsengîyê neweyî yê sîyasîyî awan benê û kurdî benê wayîrê destkewteyanê pîlan eke partîyê sîyasî yê kurdan na raştîye nêvînenê o çax mîyanê xafletêkê pîlî de yê. 

Eşkera yo ke çar parçeyanê Kurdîstanî de şarê ma vera nê hêrişan wurzeno payan ser û zaf hêrsbîyaye yê. Şarê kurdî ganî her ca de vera hêrişanê dewleta tirke wurzo payan ser û bendê bidê verê nê hêrişan. Tewirê şarê Başûrê Kurdîstanî, dezgehan ê demokratîkan,  cinî û ciwanan girîng o. Çend ke no tewir xurt bo hende zî verê hêrişan do bêro girewtene. Ganî hêzê koalîsyonî yê hemparî zî tewirê xo ser o vinderê.

Oyo ke dewleta tirke hende har kerdo, rêxistinîya şarê kurdî yo û têkoşînê demokrasî û azadîye yo. Averşîyayîşê şarê kurdî sey mergê polîtîkayanê qirkerdişî yeno dîyene. Coka hêrişê vera kurdan, cuya azade, demokratîke kenê. Vera destkewte û rêxistinîya kurdan hêriş kenê.

Ma venga kurdan, dostanê kurdan, hêzanê demokrasîyî danê ke vera hêrişanê qirkeran û kolonyalîstan wurzê payan ser, hêzê demokrasî û azadîye bipawê, seba rijnayîşê sîstemanê despotîkan, qirkeran û murtecîyan ê Rojhelatê Mîyanênî têkoşîn pîl bikerê.''