Hemserekîya Konseya Rayberdişî ya KCKyî bi eşkerayîyêke seba beşdarîya Newroze ya xurte şar fîraz kerd. Eşkerayîye wina ya:

‘’Newroza ke seba mojnayîşê îradeyê şarê kurdî zaf girîng a, emser bi beşdarîyêka tewr xurte sey çalakîyêka sîyasî û komelkîye îradeyê kurdan mojna û derbazê tarîxî bîye. Bi hûmara beşdaran û bi coşê xo Newroza 2025î resaye leweyî. Şarê kurdî sere de Kurdîstan de pêro cayan de bi deyîranê azadîye, govend û tîlîlîyan Newroze fîraz kerde û bi mîlyonan merdiman bi waştişê azadîye meydanî lerznayî. Şarê kurdî bi servistişê Newroze pêro hêriş, komplo û kayî pûç kerdî û îradeyê xo eşkera kerd. Ma şarê xo seba beşdarîya ci ya xurte fîraz kenê û xoverdayîşê ci selam kenê.

Newroza 2025î bi coşêkê pîlî û beşdarîya xurte derbaz bîye. Vakurê Kurdîstanî de bi mîlyonan merdiman meydanan de Newroze bi coşî fîraz kerde. Newroza Amedî bîye leweyê şayîyan. Rojhelatê Kurdîstanî de şarî serranê verênan ra hîna zafêr tewrê şayîyan bîyî. Nînan de ruhê Jin, Jiyan, Azadî hakîm bi. Rojawan de Newroze ê bînan ra hîna bi heybetênî derbaz bîye. Başûr de zî şarî sere de Qendîl de her ca de Newroze fîraz kerde. Şayîyanê çar parçeyan de azadîya Rayber Apoyî ameye waştene û wayîrê Vengdayîşê Haştîye û Komelê Azadîye ame vejîyayene. Newroze de xeta azadîya Rayberîye, welatperwerîye û têkoşînî serdest bîye û şarê kurdî hesreta xo ya yewîya neteweyîye û azadîye arde ziwan.

Şayîyê Newroze dewam kenê. Ma ancî Newroza şar û dostanê xo fîraz kenê.

Bêguman vengdayîşê ‘Haştîye û Komelê Demokratîkî’ Newroza emserîne manadar kerde. Şarê kurdî Newroze de cewabê nê vengdayîşê Rayber Apoyî da û mojna ke do wayîrê nê vengdayîşî vejîyo. Şarê ma her ca bi sloganê ‘Bijî Serok Apo’ dekerd û heskerdişê xo yê seba Rayber Apoıyî eşkera kerd. Şarê ma Newroza 2025î bi şîarê ‘Rayberîya Azade, Komelê Demokratîkî’ pêşwazî kerde. No wayîrvejîyayîş bi mesajê Newroze yê şarê ma. 

Newrozan de mesajê şarê kurdî wayîrê girîngîya tarîxî yê. Çunke nê mesajî îradeyê şarê ma eşkera kenê. Şarê ma emser bi sloganan îradeyê xo eşkera kerd. ’Şarê kurdî bi qerardarî û zelalî ard ziwan ke hinî wa sîstemê Îmraliyî bêro rijnayene û Rayber Apo azad bibo. Mesajê 2025î no bi. Ganî no mesaj bêro famkerdene. Seba dostanîya bi kurdan no şert o. Êyê ke bi na raştîye nêzdîyê şarê kurdî nêbenê dişmenîya kurdan kenê û do tarîxî ra pakî bibê. 

Meseleya kurdan resaye a aste ke hinî çareserîye ferz kena. Newroze na raştîye eşkera kerde. Rayber Apoyî bi vengdayîşê xo ancî îradeyê çareserîye mojna. Şarê kurdî zî mojna ke ê perwerê nê îradeyî yê. Ganî goreyê ney gamî bierzîyê, sîstemê Îmraliyî bêro rijnayene û Rayber Apo azad bibo.

Verê nê îradeyê Rayber Apoyî û kurdan de ganî gamê hewceyî cade bierzîyê. La heta nika gamêke nêerzîyaye ke na yew mesele ya. Çareserîya meseleya kurdan, tedayê vera kurdan û muxalîfan mojnenê ke îqtîdar çareserîye ra dûr o û wazeno ke prosesî goreyê menfaetanê xo bişuxilno. La kurdî nê nêzdîbîyayîşan do qebul nêkerê. Çunke ma zanenê ke nêzdîbîyayîş û ferasetêko demokratîk nêbo çareserîya meseleya kurdan û demokratîkbîyayîş mumkîn nîyê.’’