Hemserekîya Konseya Rayberdişî ya KCKyî derheqê hêrişanê îşxalî û serkewtişê Garê de eşkerayîyêke daye.

Eşkerayîye wina ya:

''Seke 10ê sibata 2008î de vera Zapî amebi kerene reyna vera Herêmanê Pawitişî yê Medya hêrişê îşxalî ame kerdene. 4 rojan 50 ra zêdêr teyarayan û bi desan helîkopteran Garê daye bombayan ver. Dişmenî waşt ke nê bombardumanî de leşkeranê xo bîyaro war. Nê xîretê warardişî ameyî şiknayene. Nê noqtayan de gerîlayanê HPG û YJA-Starî xoverdayîşêko tarîxî kerd û artêşa tirke bin kerde. Ma gerîlayan fîraz kenê. Ma gerîlayanê şehîdan zî bi minet û rêzdarî yad kenê.

Hukmato faşîst AKP-MHP û şefê înan ê faşîstî Erdogan û Bahçelî çend serran o anê ziwna ke kamca de kurdî estbê çin bikerê û qir bikerê. Coka Vakurî ra dima Rojawan û Başûrê Kurdîstanî de zî hêrişê îşxalî yenê kerdene. Bi nê hawayî yeno armanc kerdene ke Têgêrayîşê Azadîye tasfîye biba û Rojhelatê Mîyanênî ser o nîzamê zulmî bêro ronayene. Hêrişê îşxalî yê Garê seke AKP-MHPyî îdîa kerd têna vera tay noqtayan nêameyî kerdene. Îqtîdarî cara wina propaganda kerdêne ke Garê de baregeh û qerargehê gerîlayan estê, eke Garê bivîsya destî Têgêrayîşê Azadîye do bêro tasfîyekerdene.

Medyaya Erdogan Bahçelîyî zî îlan kerd ke ê do Anqara şayîye bikerê û serrgêra 22. ya komployî sey roşanê 'binkewtişê PKKyî' îlan bikerê. La nê hêzê îşxalkerê ke vatêne 'ma şewêke nişka ra bêrê' binê bombardumananê giranan de şewêke nişka ra remayî. Seke Zap de qewimîya ê siwar ameyî peya şîyî.

Serfermandarê înan îtîraf kerd ke înan bi mengan no planê îşxalî kerd. Xora gama verêne ya nê planî îşxalê Heftanînî bîye. La Heftanîn de xoverdayîşê gerîlayan planê înan asteng kerd. Narey înan planêko hîra kerd. Verî ê şîyî Iraq û dima şîyî Hewlêr û înan PDKyî reyde şeklo peyên da planê xo. Dima ke înan PDKyî ra destûr û îstîxbarat girewt 10ê sibate de hêriş kerd. Qaşo înan qerargeho merkezî yê fermandarîye yê gerîlayan birijnayêne û dima verê xo bidayêne waranê gerîlayan.

Wextê caardişê azadîya kurdan û Rayber Apoyî

Wa bizanîyo ke armancê nê hêrişan qedînayîşê PKK û gerîlayan û temamkerdişê qirkerdişê kurdan bi.  Înan dima ke no bikerdêne statuyê Başûrê Kurdîstanî zî çin bikerdêne, Musil û Kerkûk bivistêne destî û Şorişê Rojawanî birijnayêne. Coka binkerdişê artêşa tirke yê Garê serkewtişê pêro kurdan o. Qaşo înan 15ê Sibate de roşan bikerdêne. Hînî kurdî eşkenê nê serkewtişî sey roşan fîraz bikerê. Ma do nê serkewtişî bikerê binkerdişê Komployê 15ê Sibate û bi nê hawayî Rayber Apo û kurdan azad bikerê.

No serkewtiş têna ê PKKyî nîyo, ê pêro parçeyanê Kurdîstanî û ê hêzanê sîyasîyan ê kurdan o. Ganî pêro kurdî wayîrê nê serkewtişî vejîyê. Gerîlayê ke no serkewtiş ard ca ganî kurdî dormeyê înan de bêrê yewca û tewrê têkoşînê azadkerdişê Kurdîstanî bibê.

Gerîlayî pawitoxê statuyê Başûrê Kurdîstanî yê

Nê xoverdayîşî mojna ke gerîlayî pawitoxê statuyê Başûrê Kurdîstanî yê. Garîlayanê ke wextê hêrişanê DAÎŞî de kerd reyna Başûr pawit. Eşkera bi ke eke Başûr gerîlayan reyde bibo yew qet yew hêz nêeşkeno vera ci hêriş bikero. Dewleta tirke pê şantaj, gef û teda hêzanê sîyasîyan ê kurdan vera Têgêrayîşê Azadîye xebitnena. Nê xoverayîşê tarîxîyî nê şantaj, teda û gefî zî bin kerdî û hêzê sîyasî yê kurdî kerdî azad.

Binkewtişê Garê yê artêşa tirke sey ê Zapî yê 2008î rîyê ci yo raştikên eşkera kerd û mojna ke şarê kurdî û şerwanê azadîye senî azadîya kurdan de isrardar û qerardar ê. Ganî na raştîye bikera ke sere de cinî û ciwanî şarê kurdî paştdayîşê xo yê seba gerîlayan xurtêr bikerê û zêdêr tewrê gerîlayan bibê.  Senî ke xoverdayîşê Zapî û hêrişanê DAÎŞî ra dima ciwanê kurdî ver bi gerîlayan vazdayî ganî nika zî wina bikerê. Çunke gerîlayî garantîya azadîye ya estbîyayîşê nê şarî ya.

Dewleta tirke xîret kena ke nê binkerdişî mîyan bikera û kena ke esîrê ke dewlete kiştê bikera rojdem. Ganî firsend nêro dayene ke hukmatê AKP-MHPyî nê binkerdişî mîyan bikero û xo bixelisno. No binkerdiş binkerdişê Bahçelî û Erdoganî yo. Nê binkerdişî ra dima AKP-MHPyî vera kurdan û hêzanê demokrasî gefê xo zêdînayî. Na raştîye zî mojnena ke no îqtîdar zaf bîyo qels. Şarê kurdî û hêzê demokrasî vera nê gefan ganî azadî û demokrasî de israr bikerê û nê îqtîdarê faşîstî vindarnê. Ganî kurdî û hêzê demokrasî Tirkîyaya demokratîke û Kurdîstanê azadî biafernê.

Gerîlayan seba ke şarê Tirkîya û Rojhelatê Mîyanênî nê îqtîdarê faşîstî ra bixelisê serkewtişêko pîl vist dest. Ma bi coş û hîsanê şorişgêran înan fîraz, şehîdanê xo pê minet û rêzdarî yad kenê. Ma venga kurdan û hêzanê demokrasî danê ke nê serkewtişî bikerê roşanê demokrasî û têkoşîn berz bikerê.