Konseya Serekîye ya Pêroyî ya KCKyî bi wesîleya serrgêra Komployê Mîyanneteweyîyî yê 15ê Sibate eşkerayîya nuştekîye daye û nê vatî.

''Menga sibate û bi taybetî 15ê Sibate hetê tarîxê têkoşînê kurdan ra rojêka sîya ya. 1925 de şexsê Şêx Seîd û embazanê ci de îradeyê şarê kurdî ame qirkerdene.  Ame waştene ke bi Komployê Mîyanneteweyî yê 15ê Sibate qirkerdişo ke şexsê Şêx Seîdî û embazanê ci de dîya destpêkerdene, newera bêro kerdene. Coka Rayber Apoyî 15ê Sibate sey 'Roja qirkerdişê kurdan' pênas kerd. Hinî wextê ci ameyo ke na roja sîya, roja qirkerdişî biçarîyo roja xelisyayîşî. Xora Rayber Apo rixmê şertanê tecrîdî semedê nê kede dano. Kurdî tarîxî ra nata tim raştê qirkerdişan yenê. Rayber Apoyî cehd kerd  ke kurdan nê qederê qirkerdişî ra bixelisno û dişmenîya mabenê kurdan û tirkan biqedîno. Xora no komplo vera nê waştişê Rayber Apoyî ame kerdene.

Badê komployî şero gird ameyêne pawitene la Rayber Apoyî bi stratejîya bedilnayîşê demokratîkî her kes şaş kerd. Rayber Apoyî semedê wayubiratîya şaran paradîgmaya newî aver berde û bi nê tewirê xo yê tarîxî kayê komplokeran betal kerdî. Sîstemê kapitalîstî yê seserra 20. kurdî  bi ziwan, kultur û nasnameyê ci sey şarêkê bianorî qebul nêkerdî. Nasnameyê înan tim înkar kerd, red kerd. Eynî wextî dewletanê hegemonan çimeyê zengînîye yê cografyaya Kurdîstanî mabênê xo de pare kerdî.

Hinî sîyasetê înkar îmha û qirkerdişî rijîyayo. AKP hukmatanê verênan ra zafêr vera kurdan sîyasetê qirkerdişî rayra beno. Dewaya winayêna ke morê xo dayo yew seserre ro xora bê têkoşînê şorişgêrî nîna çareserkerdene.  Ewro goreyê huqûqê mîyanneteweyîyî hinî semedê azadîya Rayber Apoyî şertê ke hewce kenê ameyî meydan. Cezaya vera Rayberîya ma hinî goreyê huqûqê mîyanneteweyîyî hukmê xo kerdo de.

Tewr peynî de Rayber Apoyî heyetê DEM Partî reyde pêvînayîş kerd. Reyna hetê hukmatî ra tim veng dîyeno Rayberîya ma ke vengdayîşê çekeronayîşî bikero û rêxistine tesfîye bikero. La şertanê cuye û xebityayîşî yê Rayber Apoyî de qet çîyêk nêbedilnenê. Sebe ke nê vengdayîşê Rayberîya ma û Têgerayîşê ma rê benê bieşkê bêrê cewabkerdene ganî şertê xebityayîşê azadî, resnayîşê azadî û cuyeya azade bêrê caardene.  Şarê Kurdîstanî û Tirkîya nê pêvînayîşan û vengdayîşan ra zaf çî paweno. La hetê bînî ra hukmatê AKPyî her roje vera Başûr û Rojawanê Kurdîstanî hêrişanê qirkerdişî keno. Her roje sîvîlî, cinî û domanî yenê qetilkerdene. Hunermend û rojnamegerê kurdî yenê hedefgirewtene. Reyna Vakur û Tirkîya de operasyonê qirkerdişê sîyasîyî dewam kenê. Şaredarîyê ke hetê şarî ra ameyî vîjnayene tede qeyûm yeno cakerdene. Nê pêro mojnenê ke AKP samîmî nîyo.

Sey netîce; hinî wextê azadîya fîzîkîye ya Rayber Apoyî û şarê kurdî ameyo. La no do bi xoverdayîşê rêxistinkerdeyî yê kurdan eşkeno bêro caardene. Ma veng danê ke semedê binfînayîşê komployî çar parçeyanê Kurdîstanî û teberê welatî de wa şarê ma têkoşînê xo yê şorişgêrî xurtêr bikero. Sere de cinî û domanî  ganî şarê ma semedê azadîya fîzîkîye ya Rayber Apoyî têkoşînê xo girdêr bikero.Nê 26 serran de dostê kurdan zaf bîyî. Hem Rojhelatê Mîyanênî de hem zî her hetê dinya de têkilîya ma bi grûbanê dostan, sîyasetmedaranê namdaran ameye averberdene. Ma veng danê heme dostanê xo ke wa dahîna xurt wayîrê Rayber Apoyî bivejê, paştî bidê cehdkerdişanê ci yê çareserîya demokratîke û keda ke semedê azadîya ci danê wa girdêr bikerê.''