Komîteya Tekîlîyanê Teberî ya KCKyî derheqê zîyaretê Wezîrê Karanê Teberî yê Tirkîya Hakan Fidanî yê Bexdad û Hewlêrî de eşkerayîye daye û nê pare kerdî:

''Wezîrê Karanê Teberî yê Tirkîya Hakan Fidanî bado ke Wezîrê Karanê Teberî yê Iraqî Fuad Huseyînî reyde Bexdad de pêvînayîş kerd, eşkerayîye daye.  Serekê MÎTî yo verên  Hakan Fidanî vat PKK herra Iraqî îşxal keno, waşt wa PKK sey 'rêxistina terorî' bêro naskerdene û semedê  'têkoşînê hemparî yê vera terorî' veng da. Hakan Fidan wazeno karê leyminê ke wextê serekîya MÎTî de kerdî na rey bi nameyê 'dîplomasî' de bi bazarîye aver bêro.

Wezîrê Karanê Teberî yê Tirkîya yo ke herra Iraqî îşxal kerda, 100 qereqol, baregehê leşkerî û merkezê MÎTî akerdî, nêşarmîyeno qala bandura Iraqî keno. Hakan Fidan keno goreyê xo îşxalê leşkerî yê dewleta tirke yê herra Iraqî, Iraqî rê  bido qebulkerdene, bikero sey çîyêkê normalî.

Tirkîya ke Hewlêr hetê sîyasî, leşkerî û ekonomîkî ra kerdo sey bajarê Tirkîya, wazena bêvengîya hukmatê Başûrê Kurdîstanî, dewleta Iraqî û Neteweyanê Yewbîyayeyan sey firsetî bişuxulno, na polîtîka vila bikero û îşxalê xo yê vera herra Kurdîstan û Sûrîye bi rayîrê 'dîplomasî'  bikero mende.

Hakan Fidano ke bi komplokarîye û provokatorîye yeno naskerdene û vatbi  semedê îşxalkerdişê herra Sûrîye 'eke hewce bikero ez hetê Sûrîye ra çend roketan ver bi Tirkîya dana eştene' nika bi nameyê Tirkîya falîyetê 'dîplomasî' reyra beno.

Hakan Fidano ke bajarê Başûrê Kurdîstanî bi ajanan MÎTî û çeteyan kerdî pirr û bi talîmatanê ke dayî Silêmanî, Şingal û Mexmûr de bi desan kesî qetil kerdî, bi bêheyayîya pîle qala 'terorî' û 'têkoşînê vera terorî' keno.

Wexto ke Hakan Fidan serekê MÎTî de bê bi hemkarîya dewleta tirke û DAÎŞî bi desan qirkerdiş û çalakîyê bombayinî ameyî kerdene û qet kiştoxêkê înan nêame tepiştene. La Hakan Fidan îdîa keno Tirkîya vera DAÎŞî têkoşîn kena.

Armancê zîyaretê Hakan Findanî yê Bexdad û Hewlêrî oyo ke polîtîkaya Başûrê Kurdîstanî bikero bajarêkê Tirkîya, aver bêro. Pîya bi nê polîtîkayanê hêriş û suîkastan ê vera Silêmanî, Şingal û Mexmûrî bido domnayene.

Mabênê ma têgêrayîşê ma û dewleta Iraqî û şaranê ci de qet problemêk çîn o. Seba ke têna Iraqî sey dewletê herême estbîyayîş û azadîya kurdan qebul kerd, tim mabênê ma û Iraqî de tekîlîya dostîye est a.  Dewleta tirke ya îşxalkere wazena Iraqî zî bikerê mîyanê sîyasetê xo yê qirkerî. Coka qetilkarê kurdan Fidan vano 'Iraq wa PKKyî sey rêxistina terorî îlan bikero.' Nê vatişî vera rîyê Wezîrê Karanê Teberî yê Iraqî vano ke o bi xo kurd o. La vera nê vatişî qet reaksîyonêk nîno dayene. Dewleta tirke bi paştdayîşê PDKyî keno ke têgêrayîşê ma û Iraqî biverdo pê. Ma pê bawer ê ke selahîyetdarê dewleta Iraqî û hukmatî, welatperwer roşnvîr û şarê ci nê kayanê mexapîyê û vera ci bivejîyê.

Bi na wesîle sere de şarê Kurdîstan û iraqijî, îdareyê Başûrê Kurdîstanî, îdareyê Bexdadî, teşkîlatê Neteweyanê Yewbîyayeyan ganî şirê Tirkîya ser ke Tirkîya îşxalê xo yê herra Iraqî biqedîno û baregehanê xo yê leşkerîyan wedaro. Ganî destur mêro dayene ke Tirkîya bi bahaneyê 'terorî' hêrişê herra Iraqî bikero. Ganî destur mêro dayene ke dewleta tirke binê tekîlîyanê sîyasî û tîcarî de Kerkuk, Musul, Hewlêr û Silêmanî bikero bexçeyo peyên ê MÎT û çeteyanê DAÎŞî. Şert o verên û dîyarker ê bandure û pawitişê herra Iraqî, qedîyayîşê îşxalê dewleta tirke yê vera herra Iraqî yo.''