KCK: Tecrîdê vera Rayber Apoyî bi têkoşînî qedîyeno

KCKyî pare kerd ke raporê CPTyî netîceya têkoşînî de ame eşkerakerdene û vat: ''Tecrîdê vera Rayber Apoyî zî do bi têkoşînî biqedo.''

Hemserekîya Konseya Rayberdişî ya KCKyî derheqê raporê CPTyî de eşkerayîye daye.

Eşkerayîya KCKyî wina ya:

''Rayberê kurdan û rayberê azadî û demokrasîyî yê Rojhelatê Mîyanênî Rayber Apo 20 serran ra nata binê tecrîdî de yo. Rayber Apo 2-3 rey zî tede 10 serrî yo ke nêeşka avûkatanê xo bivîno û keyeyî xo reyde zî zaf tay ame pêser. No tecrîdo giran goreyê polîtîkaya qirkerdişê kurdan yeno caardene. Coka no tecrîd zî polîtîkayêka qirkerdişî ya. Bêgûman kurdî û Rayberê Şarê Kurdî vera nê kerdişan û hêrişanê dewlete xo ver danê. Kurdî zî Rayber Apo zî pê na hîşmendîye têgêrenê.

Komploya mîyanneteweyîye ya vera Rayber Apoyî hetê ê kesan ra ameye kerdene ke sesera 20. de  qirkerdişê kurdan meşrû kenê. Sîstemê tecrîdî hetê Tirkîya û Amerîka ra yeno caardene. DYA, TC û Ewropa mesuldarê nê tecrîdî yê. CPT heta nika vera tecrîdî tênêgêrabi û nê sûcî ra seke hemkarîye kerde. Labelê kurdî wayîrê Rayberîye vejîyayî û bi nê hawayî tehcîr teşhîr kerd. CPTyî penî de Îmrali zîyaret kerd û raporê xo rayaumûmîye reyde pare kerd.

Gam û rewşêka girînge ya ke CPTyî sîstemê Îmraliyî sey sîstemêkê îşkence û tecrîdî pênase kerd. Bi nê hawayî pêro argumanê tecrîdî qedîyayî, berê Îmraliyî şikîyayî. Nê teşhîrî têkoşînê azadkerdişê Rayber Apoyî geşêr kerd. Hêrişê faşîst û qirkerî giran ê la azadîya kurdan û yê Rayber Apoyî nêzdî ya.

Na raştîye mojnena ke têkoşînê seba azadîya Rayber Apoyî û têkoşînê kurdan ganî pîya bi heman qerardarîye dewam bikerê. Raporê CPTyî girîng o la qîm nêkeno. Senî ke no rapor netîceya têkoşînêkê pîlî de visîya dest ganî bi heman hawayî seba qedînayîşê tecrîdî zî têkoşîn do bêro kerdene. CPTyî sîstemê Îmraliyî sey sîstemê îşkence û tecrîdê giranî pênase kerd. Mesuldarîya hêzanê demokrasîyî û kurdan a ke têkoşînê vera tecrîdî pîlêr bikerê û azadîya Rayber Apoyî nêzdêr bikerê. CPT têna bi nê têkoşînî eşkeno gamanê averan bierzo. 

Tecrîdê Rayber Apoyî sey qirkerdişê kurdan o, sîyasî yo. Coka mumkîn nîyo ke no tecrîd bi vengdayîşan biqedo. Raporê CPTyî kurdan û demokratan mesuldar keno ke vera tecrîdî têkoşîn bikero. Qedîyayîşê tecrîdê vera Rayber Apoyî, pêvînayîşê avûkat û keyeyan têna bi têkoşînî benê. Nê esasî ser o ma veng danê ke têkoşînê seba azadîya Rayber Apoyî pîl bikerê, faşîzmê AKP-MHPyî çin bikerê, Kurdîstanê azadî, Tirkîyaya demokratîke û Rojhelatê Mîyanênî yê demokratîkî biafernê.''