Hemserekîya Konseya Rayberdişî ya KCKyî bi wesîleya serrgêra Hemleya 1ê Hezîrane eşkerayîyêke daye. Eşkerayîye wina ya:

''Ma hê dekewenê serra 18. ya Hemleya 1ê Hezîrana 2004î. Ma pêro şehîdanê ke caardiş û averberdişê na hemle de rolê înan esto bi rêzdarî û minetî yad kenê. Ma sozê xo dibare kenê ke do hesreta înan Kurdîstanê Azadî û Rojhelatê Mîyanênî yê Azadî awan bikerê.

Hemleya 1ê Hezîrana 2004î hem dewama Hemleya 15ê Tebaxe ya hem zî safhaya girînge ya serfîrazîya na hemle ya. Prosesê sîyasîyî na hemle kerde girîng. Prosesê winasênî de ke komplogeran û dewleta tirke xîret kerdêne Têgêrayîşê Azadîye û PKK tasfîye bikerê na hemle vejîyaye werte.

Dima ke Rayber Apo ame esîrkerdene 5 serran prosesê adirbirnayîşî de Rayber Apoyî û Têgêrayîşê Azadîye semedo ke meseleya kurdan bingeyê demoratîkî de çareser biba veng da. La dewleta tirke vatêne ke hînî PKK nêeşkeno têkoşîn bikero û bêro xo ser. Nê prosesî de coka Tayyîp Erdoganî vatbi 'Eke şima meseleya kurdan nêfikirê meseleyêka winasêne nêbena.' Tasfîyetîya zereyî ya komplogeran zî seba ke partîye bivisnê destî têgêrayêne. La dima ke Rayberîye çarçewa paradîgmaya newîye de hîşmendîya newîye ya têkoşîn û rêxistinîye pêşkêş kerde tasfîyekeran dî ke remayîşî ra ber rayîrêk çin o.

Nê remayîşî reyde hesabê AKP û komplogeranê mîyanneteweyîyan nêameyî ca. 1ê Hezîrana 2004î de gerîlayan çarçewa paradîgmaya azadîwaştoxê cinîyan, ekolojîke û demokratîke de dewro newe yê têkoşîn da destpêkerdene. Yar û neyarî dî ke PKK verî ra zî zêdêr bîyo xurt. Bi nê hawayî pê berzkerdişê têkoşînî cewab dîya hêrişanê tasfîye.

1ê Hezîrana 2004î  ra nata 17 serrî vîyartî, nê serran de Têgêrayîşê Azadîye hem xeta sosyalîzmê demokratîkî de tam nişt ro hem zî hetê sîyasî û leşkerî ra qewimîyayîşê pîlî vistî destî. Dewleta tirke vera Hemleya 1ê Hezîrane 2014 de Planê Çinkerdişî awan kerd. Hemleya 1ê Hezîrane têna hemleyêke nîya, têkoşîno sîyasî û komelkî yê paradîgmaya newîye yo. Hemleya 1ê Hezîrane reyde Têgêrayîşê Azadîye zî bîyo mîsalê rêxistinîye yê xeta sosyalîzmî.

Ewro Têgêrayîşê Azadîye û gerîlayî pê ruhê 15ê Tebaxe û pê hîşmendîya 1ê Hezîrane vera hêzanê kolonyalîstan û hemkaranê ci yê neteweyîyan têkoşînêkê pîlî kenê. Gerîlayî Zap, Metîna û Avaşîn de vera hêrişanê dewleta tirke xoverdayîşêkê pêtî kenê. No xoverdayîşê 40 rojan xeta modernîteya demokratîke ya Rayberîye de darbanê pîlan dano kolonyalîstan ro û mojneno ke do înan bin bikero. Ma nê xoverdayîşê tarîxîyî yê gerîlayan fîraz kenê. Seke Şehîd Çîyagerî bi xurtî vatbi 'Peynîye do biba bêhempa!'

1ê Hezîrane heman wextî de serrgêra Xoverdayîşê Gezî yo. Têkoşînê Azadîye yê şarê kurdî û ruhê Gezî do yew bibê û Kurdîstanê Azadî û Tirkîyeya Demokratîke awan bikerê.

Tirkîya ewro polîtîkaya şerê gemarinî û îdareyê faşîstî ra semed hetê sîyasî, ekonomî, komelkî û kulturelî ra pûç bîya. Hînî Tirkîya do rojêke zî pê îqtîdarê AKP-MHPyî nêşora. Eke Têkoşînê Azadîye yê şarê kurdî û ruhê Gezî yew bibê peynîya nê îqtîdarî do bêra.

Ma reyna şehîdanê Hemleya 1ê Hezîrane û  Xoverdayîşê Gezî bi rêzdarî yad kenê û mujde kenê ke tay mend ke hesreta înan do bêra caardene.''