Komîteya Têkilîyanê Teberî ya KCKyî bi eşkerayîyêke pare kerd ke sîyasetê hemkarîye yê PDKyî tehlukeyêko pîl o û venga şarê Kurdîstanî da ke verê kayanê PDKyî de  tewir bigêro û têkoşîn bikero.

Eşkerayîye wina ya:

''Şerê Dinya yo Hîrêyîn bi giranî tesîr keno. Hetêkî ra şerê Rûsya- Ukrayna û hetê bînî ra şerê Îsraîl û Hamasî bi şîdetê giranî dewam kenê. Şefê dewleta tirke ya faşîst Erdogan zî keno ke bi nê firsendî her ca de hêrişê kurdan bikero û kurdan qir bikero. Seba nê armancî dewleta tirke sere de Îran, Sûrîye û Iraq de dewletanê herême de  pêvînayîşan kena ke înan hemkarê qirkerdişê kurdan bikera. 

Dewleta tirke ya faşîste kena ke herême û dinya de îtîfaqê antî-kurdî awan bikera. Çar parçeyanê Kurdîstanî de erk û mesuldarîyê pêro hêzanê sîyasetî yê kurdan o ke verê nê îtîfaqî, hêrişan û qirkerdişê vera kurdan bigêrê. La PDK û keyeyê Barzanîyan herinda ke seba yewîya kurdan bixebitê, seba menfaetanê xo kurdan kenê qurbanê îtîfaqê antî-kurdî. No sîyasetê PDKyî seba kurdan û bi taybetî seba Başûrê Kurdîstanî tehlukeyêko pîl o. 

PDKyî bi Peymana Aşbattalî ya 1975î Başûrî rê îxanet kerdbî, Rojhelat û Başûr de şerê birakujî rê rayîr da û 1996 de bi ardişê artêşa Saddamî verê qirkerdişêkê pîlî akerd. 2003 de Başûrê Kurdîstan bi wayîrê statuyêkê fermîyî. La PDKyî seba ke zerar nêreso menfaetanê ci nêverda ke Qanûno Bingeyî bêro caardene û zengînîya Başûrî dewleta tirke rê pêşkêş kerde. Rîyê nê sîyasetê PDKyî ra ewro Başûr de krîzo ekonomîk û sîyasî est o. Şarê Başûrî her ke şino beno xizanêr la PDK û keyeyê Barzanîyen benê hîna zengîn.

Tarîxê ma yê nêzdîyî de PDKyî Şingal de êzidîyî qirkerdişê DAÎŞî de têrî verdayî û bi polîtîkayanê xo yê gemarinan zî statuyê Başûrî vist binê tehlukeyî. Ewro zî PDK artêşa tirke gêno heta zereyê Başûrî. Dewleta tirke xêrê PDKyî ra eşkena Başûr û Iraqî rê teda bikera. PDKyî Zaxoyî ra heta Sîdekanî dewleta tirke rê rayîrî akerdî. PDKyî sûc û hêrişê dewleta tirke zî kerdî meşrû. PDKyî dewleta tirke daxîlê sîyasetê Musil û Kerkûkî zî kerd û bi nê hawayî dewaya Şêx Abdulselam Barzanîyî rê îxanet kerd.

Ewro PDK seba destkewteyanê Başûrî tehlukeyo tewr pîl o. Rixmê ney zî Nêçîrvan Barzanî wurzeno vano 'PKK seba Başûrî mesele yo û dezgehanê Başûrî rê hûrmet nêkeno.' Barzanî keno ke hêrişanê dewleta tirke meşrû bikero û nê qiseyanê ey de yew raştîye zî çin a. Wa her kes bizano ke bînaya parlamentoyî ya Başûrî hetê PDKyî ra pêşkêşê Saddamî amebî kerdene. Ancî PDKyî bi xo manaya 'pêşmergeyan' kerde pûç, pêşmergeyî kerdî qoricîyanê dewleta tirke. Wexto ke hêzê PDKyî Şingal, Mexmûr, Kerkûk û Hewlêrî de DAÎŞî ra remayêne Gerîlayanê Azadîye yê Kurdîstanî û PKKyî bi bedelanê pîlan nê cayî pawitî. Nika zî PDK hem baregehan, destekê lojîstîkî û xizmetan dano dewleta tirke û endamanê MÎTî Başûr de keno meyman la hetê bînî ra PKKyî sûcdar keno. DAÎŞ seba Başûr û Iraqî çend tehlukeyîn o, Tirkîya zî hende tehlukeyîn a. Çunke DAÎŞ û dewleta tirke wayîrê heman ferasetî yê. Xora dewleta tirke û Erdoganî DAÎŞ kerd belaya sereyê dinya.

Tirkîya bi destê PDKyî mudaxeleyê Iraqî kena. PDK bîyo hacetêkê sîyasetê Tirkîya. Dewleta tirke kena ke sey cerganê Zêrevanî û Roje yê PDKyî hêzanê Iraqî zî bişawa şerê vera gerîlayan. Gerîlayî pêser derbanê danê artêşa îşxalkere ro la PDK keno ke leşkeranê dewleta tirke bipawo. PDK seba ke hemkarîya xo binimno binê nameyê 'Hêzanê Pawitişê Sînorî' de û bi ala Iraqî artêşa îşxalkere erdê Kurdîstanî de cakeno. Ma venga selahîyetdaranê Iraqî danê ke verê kayanê PDK û dewleta tirke de hişyar bibo, destûr nêdo ke binê nameyê Hêzanê Pawitişê Sînorî de ala Iraqî seba qirkerdişê kurdan bêra şuxilnayene.

Ma venga şarê ma yê çar parçeyanê Kurdîstanî danê ke verê nê kayanê tehlukeyînan de tewir bigêro û têkoşîn bikero. Bi taybetî wa partîyê Başûrê Kurdîstanî vera xeta îxanetî ya PDKyî û vera îşxalê Başûrî tewirêkî bigêrê û erkanê xo yê tarîxîyan bîyarê ca.''