Hemserekîya Konseya Rayberdişî ya KCKyî derheqê felaketê Liçikî yê Erzînganî de eşkerayîyêke daye. Eşkerayîye wina ya:

''Netîceya hezazê erdê sîyanurînî û teqayîşê boruyan de qezaya Liçikî de new karkerî binê herre de mendî û herême raştê tehlukeyêkê pîlî ameye. Rîyê ferasetê rantgîr û kolonyalîstî de tehlukeyêko cidî qewimîya. Ekolojîya herême binê tesîrê kîmyewîyanê jehrînan de mende. Noyo ke qewimîyeno Çernobîlêk o.

Seke zanîyeno serranê peyênan de cigêrayîşê bi sîyanurî seba texrîbatê ekolojîkî ra amebi qedexekerdene û madenê winayênî ameybî qefilnayene. Tirkîya ra ber yewna cayê dinay de maden û kîmyewîyê jehrînî wina nêbenê sebebê felaketan. Bi taybetî wextê îqtîdarê AKPyî de rîyê polîtîkayanê rant û kolonyalîstan ra ekolojî hîna zaf texrîb bîya. Felaketê Liçikî nimûneya ney a peyên a.

Felaketê madenî teyna merdiman rê ney pêro xoza, nebat û gandaran rê zerar danê. Xoza dadîya ma ya pêroyînan a û ganî dana ma. Eke ma xoza biherimnê, zerar bidê ci û çin bikerê ma do peynîya xo  zî bîyarê. La heyf ke no feraset AKP-MHP de çin o. Derdê AKp-MHPyî teyna pere yo. No îqtîdar bi xo şirîkê şîrketan, mafya û rantî yo. AKP-MHP sey Mussoliniyê faşîstî bi qiseyê 'herêmî û millî' keno ke serê sûcanê xo bigêro û rayaumûmîye bixapîno. Heyf ke hêzê demokrasîyî zî na babete de bi hawayêkê radîkalî tênêgêrenê û ferasetê îqtîdarî teşhîr nêkenê. Îqtîdaro ke 'herêmî û millî' yo qet wina beno sebebê felaketan?

Felaketê madenî yê Liçikî felaketêko winayên o ke hema raştîyê ci nêameyê eşkerakerdene. No felaket Çernobîkê AKP-MHPyî yo. Îqtîdar û medyaya ci asta tehlukeyî nimnenê. Eke nê madeyê kîmyewî yê jehrînî bikewê awa Firatî û hewzaya Mezopotamya tehlukeyêko pîl do biqewimîyo. Ma texrîbatêkê ekolojîkî de têrî ameyî. Ma îqtîdarê AKP-MHPyî nê felaketî ra semed şermezar kenê. Ganî Tirkîya cade xo ferasetê dişmenîya vera merdim û xoza ra bixelisna. Hînî wa Tirkîya û Kurdîstan nê ferasetî ra bêrê xelisnayene, xoza azad biba û cuya demokratîke biba.''