Hemserekîya Konseya Rayberdişî ya KCKyî derheqê hêrişanê qirkerdişî yê vera Rojawanî de eşkerayîyêka nuştekîye daye.

Eşkerayîye wina ya:

''Çend rojî yo îqtîdarê AKP-MHPyî yo faşîst Rojawanî rê gef wanenê. Ewro (vizêr) ra nata hêrişê Rojawanî yenê kerdene. Nê hêrişan de şar, tesîs, kargeh û bendî yenê hedefkerdene. Ma nê hêrişanê namerdan ê dewleta tirke bi giranî şermezar kenê. Ganî her kes nê hêrişan şermezar bikero û wayîrê tewirî bibo. Nê hêrişî qirkerdişêko eşkera yo û sûcê merdimatîye yê. 

Dişmenîya dewleta tirke û AKP-MHPyî ya vera kurdan resaye rewşêke. Ê hînî ça de kurdî est bê hêrişê ci kenê û wazenê pêro kurdan çin bikerê. Erdogan bi dişmenîya vera kurdan jehr kewto. Her keso ke vera nê ferasetî vejîyeno yeno destbendkerdene, tepiştene û bêvengkerdene. Hetê bînî ra terefgîrê şerî her roje medya de wesfê şerî danê û hêrişan sey heqî mojnenê. Bi nê hawayî komelî rê zî tesdîqê şerî yeno ferzkerdene. La çalakîya fedayî ya Anqara zûrê AKP-MHPyî yê faşîstî eşkera kerdî. AKP-MHP û dewleta tirke her roje kurdan rê gef wanenê. Şarê kurdî vera qirkerdişî xo paweno û xo ver dano. Şarê kurdî do teslîmê faşîzm û kolonyalîzmî nêbo. 

Dewleta tirke seba hêrişanê vera Rojawanî çalakîya fedayî ya Anqara mojnena la no zûr a. Dewleta tirke cara bira îşxalê Rojawanî daya. Dewleta tirke û hukmatê AKP-MHPyî na bire girewta. Naye ra ber her çi zûr a. Çend rojî verî şefê faşîstî Erdoganî no eşkera kerd û dîyar kerd ke îşxalê Rojawanî rê amade yê. Coka nê hêrişî çarçewa qirkerdişê kurdan de yenê kerdene. Ganî şarê kurdî û rayaumûmîye na raştîye bivînê. Na raştîye ra ber nêzdîbîyayîşêk nêno qebulkerdene.

Eşkera yo dinya bi hêrişanê dewleta tirke yê vera şarê kurdî yena ceribnayene. Heta nika qet yew dezgeh û rêxistina mîyanneteweyî, bi taybetî Neteweyanê Yewbîyayeyan vera hêrişanê dewleta tirke tewirêk nêmojna û eqsê ci destek da nê hêrişan. Xora dewleta tirke bi nê hawayî hêrişanê vera kurdan rê dewam kena. Ma reyna venga dezgeh û dewletanê mîyanneteweyîyan û bi taybetî venga Neteweyanê Yewbîyayeyan danê ke destek nêdê nê hêrişanê dewleta tirke û tewirê xo bimojnê, mebê şirîkê nê hêrişan.

Ma venga şarê Kurdîstanî yê welatperwerî û hêzanê demokratîkan ê dinya danê ke vera hêrişanê dewleta tirke cade tewir bimojnê. Bêvengîya yena manaya tesdîqê hêrişanê dewleta tirke. Ganî bi tewirêkê xurtî tedaya dewlet û dezgehan bêra kerdene ke verê hêrişanê serê Rojawanî bigêrê. Ma venga pêro kurdîstanijan danê ke her ca de wurzê payan ser û vera nê hêrişan tewir bimojnê. Ganî şar, cinî, ciwan, hêzê demokratîkî û pêro dostê ma seba paştdayîşê kurdan dest pê çalakîyan bikerê.''