Hemserekîya Konseya Rayberdişî ya KCKyî eşkerayîyêka nuştekîye daye. Eşkerayîye wina ya:

''Dîktatorîya faşîste ya AKP-MHPyî her roje teda, darbeyêka newî û zorbazîye zêdînena. Îqtîdar hînî her hêz seba xo sey tehluke vîneno û hêrişê ci keno. Armancê ci  tasfîyekerdişê hêzanê demokrasîyî yo. Hedefê înan o verên zî şarê kurdî yo. Seba ke vera şarê kurdî û hêzanê demokrasîyî darbe bikero rojdemêko winasên ê darbe aferna. Îqtîdar wazno ke kesêk vera nê zulman vengê xo zî nêvejo.

Nê wextê janî de zî tedayanê xo dewam keno. Xebitîyayîşê kargehan, kombîyayîşê polîsan serbest o la çalakî û protestoyê komêka qijkeke qedexe yo! Nê wextî de zî îqtîdarê dest na şaredarîyanê kurdan ser. No mojneno ke îqtîdar nêwazeno pê nasnameyê kurdan nêbno ke sîyaset û karê şaredarîye bêrê kerdene. Mesaj dano ke ey êyê ke kurdbîyayîş ser o sîsyet kenê tepiştî û eke çew biwazo reyna nê sîyasetî bikero wa bizano ke do çi bêro sereyê ci. Îqtîdar kurdbîyayîş sey sûcêk nîşan dano.

Gorê gerîlayan benê hedefê hêrişan. Ê hêrişê domanan kenê. Gelo Nisêbînî ra ber eşkenê cayêkê Tirkîya de hêrişê domanî bikerê?

Karakterê nê îqtîdarî de dişmenîya kurdan esta, îqtîdar armanc keno ke kurdan qir bikero. Kurdê ke nê nêvînenê kurdayetîya xo ra fek vera danê. Kurdê ke vera nê kerdişan tewirê xo nêmojnenê û nêwurzenê payan ser nê qirkerdişî tesdîq kenê. 

Eke hêzê demokrasîyî bibê yew û vera îqtîdarê faşîstî têkoşîn bikerê no îqtîdar do şoro. Ganî her ca de vera îqtîdarî têkoşîn bêro kerdene, faşîzm bêro çinkerdene û Tirkîya bêra demokratîkkerdene. 

Faşîzmê AKP-MHPyî hêrişê estbîyayîşê kurdan keno. Coka kurdî têkoşînê pîlî kenê. Ganî kurdî bizanê ke îqtîdaro faşîst wazeno her cayê dinya de kurdan qir bikero. Nêdîyayîşê ney gafletêko pîl o, tesdîqkerdişê ci îxanetêko tarîxî yo. Eke ma do  qerardarîya ameyoxî ra wurzê payan ser têkoşinê tewir bi tewirî do bêrê kerdene.

Ganî kurdî vera dişmenanê winasênan bi taybetî Vakur de her ca de xo rêxistin bikerê û têkoşîn bikerê. Sere de ciwanî û cinîyî pêro kurdî berpirsîyarê nê tarîxî yê. Her dewe de her kuçe de kurdî heta bieşkê rêxistinîya xo awan bikerê û têbigêrê. Kurdê têna Tirkîya de nê, her cayê Rojhelatê Mîyanênî de şaro tewr zanaye û demokratîk o.

Nê wextî de ke dişmenî hêrişanê xo dewam kenê nêbeno ke şima dest û kingê xo girê bidê. Xeylêk çalakîyî eşkîyenê bêrê kerdene.  Eke vîrusê Korona sey hacetêkê şerê taybetî û wextê qirkerdişê kurdan yeno dîyene, o wext ma ganî wextê vîrusê Korona bikerê çinkerdişê şerê taybetî û qirkerdişê kurdan. Naye ra ganî her ca bibo warê rêxistinbîyayîşî û meydanê çalakîye. Ganî her cinîye, camêrd, ciwan û kokim destê ci ra çi bêro bikero. Vera nê qirkerdişî roje roja xurtkerdişê têkoşînê estbîyayîşî yê pê nasname, kultur û ziwanê xo yo. 

Wext wextê ci yo ke ganî yar û neyarê kurdan bivînê ke kurdî do qet çin nêbê. Têkoşînê şarê kurdî yo bi desan serran, bi deh hezaran şehîdî dayî û no firsend û hêz dano ma. Xoverdayîş teqez do ser bikewo.''