Hemserekîya Konseya Rayberdişî ya KCKyî derheqê hêrişê PDKyî yê vera gerîlayan de eşkerayîya nuştekîye daye û nê vatî:

''100 rojî yo dewleta tirke vera Herêmanê Pawitişî yê Medya hêrişê îşxalî reyra bena. Gerîla zî vera artêşa pîle ya 2. ya NATOyî ya ke heme îmkananê xo şuxulnena bi îradeyê xurtî xover dano. Gerîla bi mengan o dewleta tirke tarûmar keno. Vera hêrişê qirkerdişî têkoşînê estbîyayîşî dano. No têkoşîn têkoşînê anorî yo tewr pîl ê tarîxê şarê kurdî yo.

Gama ke gerîla vera hêrişê îşxalî xover dano hêzê PDKyî dormeyê ci genê û kewnê mabênê gerîlayan ke tekîlîya înan bibirne ke artêşa tirke rehet bikero. Rixmo ke şarê kurdî vera nê kerdişanê ci vejîyeno zî PDK eşkera vera gerîlayan şer dano despêkerdene. Eke PDKyî wina mekerdêne nika gerîlayan rewna sey operasyonanê verênan dewleta tirke bin vistibî û peyser qeldayebî.

Hêzanê leşkerî yê PDKyî 29ê temmuze de seba ke hêzanê Zap û Avaşînî cêser bifîne  warê Çemçoyî de têgêrayîşo leşkerî dayo destpêkerdene. Gerîlayan ê hîşyar kerdî û vat no eşkera şer o. La rixmê nayî hêzanê PDKyî waşt debikewê waranê gerîlayan. Nayî sero pêrodayîşo kilm qewimîyayo. Şarê herême kewt mabên û nêverda pêrodayîş bibo gird.  Hêzê PDKyî peyser ancîyayî la verê bêrê waranê gerîlayan de hêzê xo ca kerdî. Tewirê şarê herême yê vera hêzanê leşkerî yê PDKyî ke kewtî warê gerîlayan û çeke antî,  hem tewirêko erjîyaye yo hem zî yeno manaya vengdayîşî ke PDKyî ke wa na polîtîka caverdo.

Reyna pîya bi nayî yewinêka gerîlayan zî raştê hêrişê hêzanê PDKyî ameye. Goreyê zanayîşanê ke ame destfînayene tay gerîlayî şehîd bîyî tay zî esîr kewtî. Hêrişê PDKyî yê vera gerîlayan eşkera paştdayîşê dewleta tirke yo. Nê gamî verê îşxalî akenê û ameyoxê şarê kurdî ser o tesîro xirab kenê. Ma pawenê ke PDK nê tehlukeyan bivîno û peyser game bierzo.

PDK bi vatişê ma hukmatê eşkenê debikewê her cayî hêrişanê xo meşrû keno.  No yeno manaya ez do pîya bi artêşa tirke gerîlayan tîya ra vejî. Yanî pîya bi artêşa tirke vera gerîlayan şer arkerdiş o. Yewna îzahê nayî çîn o.

Gerîlayî wird rîyanê nê koyan de 40 serrî yo vera dewleta tirke ya faşîste şer kenê. PDKyo ke vano şima nêşkenê yew rîyê nê koyî şer bikerê, paştî dano artêşa tirke. Gerîlayê ke têkoşînê azadîye yê şarê kurdî kenê sey artêşêke her warê cografyaya Kurdîstanî şuxulnenê. Pê vervejîyayîşê PKKyî û paştdayîşê dewleta tirke destkewteyî nênê pawitene. Tewirê PDKyî desktewteyanê kurdan fîneno tehluke.

PDK seba ke hêrişanê xo meşrû bikero vano PKK hukmatê ma nas nêkeno û statuyê ma fîneno tehluke. La her kes zano ke gama ke vera Başûrî hêriş ame kerdene tewr vernî de PKK û gerîlayan mudaxale kerd ke destkewteyanê Başûrî bipawê.

Têkoşînê 1925, 1930, 1938 netîceya polîtîkayanê înkar û îmha de qewimîyayî. PKK û gerîla zî netîceya nê polîtîkayan ê. Heta ke meseleya kurdî nêro çareserkerdene nê problemî do tim bibê. Ganî hêzê sîyasîyî yê kurdan şirê dewleta tirke ser  ke meseleya kurdî bi metodanê demokratîkan bêro çareserkerdene.

Ma veng danê PDKyî ke wa nê tewirê xo yo ke yeno manaya şerî caverdo, hêzanê xo waranê gerîlayan ra peyser bianco û seba ke Vakurê Kurdîstanî de meseleya kurdî bêro çareserkerdene game bierzo. Ganî şarê kurdî, roşnvîr, nuştox, hunermend û hêzê sîyasîyî yê kurdan berpirsîyarîya xo bîyarê ca destûr nêde ke PDK şerî bido destpêkerdene.''