Hemserekîya Konseya Rayberdişî ya KCKyî pê eşkerayîyêke Înîsîyatîfê Pawitişê Kurdîstanî selam kerd. Eşkerayîye wina ya:

''2 mengî yo mabênê artêşa tirke ya îşxalkere û gerîlayanê azadîye de şerêko giran qewimîyeno. Artêşa tirke herêman de ke waştêne îşxal bikerê rasta xoverdayîşêkê pîlî ameye. Gerîlayî her roje derbanê giranan danê îşxalkeran ro û înan qels kenê.

Wextê nê şerê giranî de PDKyî hêzê xo yê leşkerî dormeyê gerîlayan de ca kerdî, kewtî mîyanê gerîlayan û no zî beno sebebê qesawetê kurdan. Fermandarê Pêroyî yê HPGyî embaz Murat Karayilanî eşkera kerd ke wextê nê şerî de PDKyî hêzê xo yê leşkerî herêmanê gerîlayan de ca kerdî û Karayilanî şîyar kerd ke no beno ke bibo sebebê şerê vera gerîlayan. Rixmo ke hende hêz û dormeyan veng da PDKyî hêzê xo yê leşkerî apey nêantî û zêdînayî.

Hêrişê îşxalî yê dewleta tirke û gamê PDKyî seba tasfîyeya Têgêrayîşê Azadîye yê Kurdîstanî xizmetê dewleta tirke kenê.Pêro parçeyanê Kurdîstanî de vera şerê zereyî yê kurdan, vera şerê PDKyî yê serê PKKyî çalakîyî ameyî kerdene. Mîyanê rayaumûmîya kurdan û dostanê kurdan de na rewşe hesasîyetêko girîng aferna. Netîceya nê hesasîyetî de kurdan û dostanê înan seba ke verê hêrişan û şerê zereyî bigêrê waşt Ewropa ra şorê Başûrê Kurdîstanî, bibê mertalê gandarî. Bi nê hawayî xîretêko sivîl dîya destpêkerdene. No xîret seba her welatperwer, demokrat sereberzî û fîraz o. La nê merdimî raştê barbarîya Almanya û PDKyî ameyî.

Ma pêro kurdan û dostanê înanê ke tewrê nê xîretî bîyê bi rêzdarî selam kenê. Ma pê bawer ê ke çalakîyê înan ê demokratîkî do rolê xo bîyarê ca.

PDK vera nê xîretê haştîyane, demokratîk û holî sey hêzêkê dişmenî têgêra. Rayaumûmîya kurdan û mîyanneteweyî vera nê tewirî mat mendî û nêrazîbîyayîşê xo mojna. No tewir wina ame wendene: 'PDK nêwazeno şerê vera gerîlayan vindarno. Ma zî vera nê tewirê PDKyî de mat mendî. Ganî ma reyna îfade bikerê ke ma xo şerê vera PDKyî ra dûrî gêbê û şerê winasênî sey waştişê dewleta tirke vînenê. Coka ma hema zî pawenê ke PDK hêzanê xo waranê gerîlayan ra aepy bigêro.

Nê xîretê demokratîk û sivîlî tay raştî zî eşkera kerdî. Ancî eşkera bi ke têkoşînê azadîye yê kurdan raştîyan vejeno werte. Dewleta Almanya qanûnê xo û qanûnê mîyanneteweyî binpay kerdî û nêverda kurd û dostê înan şorê Hewlêrî. Almanya îtîraf kerd ke înan xatirê endama NATOyî Tirkîya ra no çi kerd. Almanya kifş kerd ke a hemkara tewr pîle ya dewleta tirke ya qirker a. Almanya bi israr û hemkarîye qirkerdişê kurdan rê paştî dana. Ma venga Almanya danê ke wa hînî hemkarîya nê sûcî nêkera.

Almanya pê nê tewirê xo îlan kerd ke a do Tirkîyaya faşîste payan ser o vindarna û heqê merdiman dayê kişte. Dewleta tirke pê şerê vera kurdan û demokratan bîye qels û gemarine. Sere de Almanya xeylê welatê NATOyî zî paştî danê na dewleta faşîste. Xora Kombîyayîşê Berzî yê NATOyî mojna ke ê hemkarê polîtîkayanê qirkerdişî yê Tirkîya yê.

Tewirê vera îşxalî û PDKyî roje bi roje xurt beno, têkoşînê demokrasî û azadîye yê şarê kurdî zêdêr beno wayîrê paştdayîşê rayaumûmîye û komelî. Coka ma ê kesanê ke Înîsîyatîfê Pawitişê Kurdîstanî awan kerd bi rêzdarî selam kenê û karê înan de serkewtiş wazenê.''