Komîteya Bawerî û Şaran a KCKyî seba Şêx Mihemed Ebdulkerîm mesajê yadkerdişî weşana.

Eşkerayîya KCKyî wina ya:
''Ma waştbi ke ma tewrê merasîmê şînî yê Şêx Mihemed Ebdulkerîm Kesnezanîyî binê, keye û endamanê tarîqatê Kadîrîyan ra serweşîye biwazê. La ma tay sebeban ra ke şima zî pê zanenê, nêeşkîyayî. Coka ma wazenê pê nê mesajî serweşîya xo pêşkêş bikerê.

Ma hêverî keye û murîdanê Azîz Şêxî rê sabir û metanet wazenê. Keyeyê ci yê erjîyayeyî û cemaatê Kadîrî rê serweşîye wazenê. Homa pê rehmê xo Şex şa bikero, cayê ci cenet bo.

Ma sey Têgêrayîş zanenê ke tarîqatê Kadîrî xîret kenê ke krîterê heq û edaletî, exlaqê têgêrayîş û parekerdişî, erjanê Îslamê demokratîkî bîyaro co. Seba ke Kadîrî tarîqatê alîm û pîranê kurdan o û Kurdîstan de vila bîyo ma qîmet danê ci.

Tarîqatê Kadîrî pê hîşmendîya parekerdişî û mutewazîtîye wazîfeyêko dînî û neteweyî ard ca. Hetê bînî ra înan seba averşîyayîşê kurdkî û ziwan û edebîyatê kurdkî xizmetêkê pîlî dayî. Şêx Mihemed Ebdulkerîm Kesnezanîyê rehmetîyî rixmê pêro zorîyan no tradîsyon ard ca û temsîlkarîya erjan ê dînî û neteweyîyan kerde.

Seke zanîyeno Tarîqatê Kadîrîyî seba dewaya Kurdîstanî rayberê şarî, mucahîdê perwerî zî afernayî. Birêz Şex Mihemedî no çi sey wezîfe dî. Ma bawer kenê ke pêro murîd û derwêşî nê rayîrê Şêx Mihedem Ebdûlkerîm Kesnezanîyî do teqîb bikerê. Ma nînan dawet kenê ke seba yewîya têkoşînê kurdan zêdêr kede bidê. Ma zanenê ke no waştişê Şêx Mihemedê rehmetîyî zî yo. Pê na wesîle ma reyna Şêx Mihedem Ebdûlkerîm Kesnezanî bi rehmetî yad kenê, wa cayê ci cenet bo. Ma keyeyê ci yê erjîyayeyî rê û cananê Tarîqatê Kadîrîyî rê zî serweşîye wazenê.''