21ê gulane de tewr tay 150 cinîyan ê sîyasetmedar, nuştox û akademîsyanan ê 20 welatan, KCK, PDK û YNKyî rê mektubêk erşawit. Cinîyan mektub de bal ante kerdişanê dewleta tirke ser û seba yewîye veng da.

Hemserekanê Konseya Rayberdişî ya KCKyî Besê Hozat û Cemîl Bayikî kêfweşîya xo ya seba mektubî arde ziwan.

Cewabê Hozate û Bayikî wina yê:

''Ma pê kêfweşî mektubê cinîyan wend. Ma înan rê sipasîye  kenê. Mesajo ke cinîyan derheqê Zînî Wertê de erşawit zaf manadar û ercîyaye yo. Şer xozaya cinîyan rê nêşino. Cinîyê ke ewlad, mêrde, way û birayanê xo vîn kenê, her tim vera şerî vejîyayî. Ma na kulturê tarîxîyî ra pê bawer ê ke partî û sîyasetmedarê kurdî do vengdayîşê cinîyan bieşnawê.

Key hîşmendîya serdestîya camêrdan bêra qelskerdene hînî dinya de şer do biqedo û haştîye serdest biba. Ma nê vengdayîşê cinîyan ê seba çareserkerdişê alozîye seba şarê kurdî û pêro merdimîye girîng vînenê. Dinya de camêrdî serdest ê, cinîyî temsîlê wijdanê komelî kenê.

Vatişêk va 'Ça de şer biqewimo hêverî tede raştîye mirena.'  Ça de şer biqewimo tede demokrasî û azadî darbe wenê. Coka zaf girîng o ke cinîyan bale ante yewîya kurdan û rolê kurdan ê seba demokratîkkerdişê Rojhelatê Mîyanênî ser. Kurdî pê nê rolî cuya azad û demokratîke ya kurdan xurt bikerê û destkewteyanê kurdan bipawê.

Vengdayîşê cinîyan ê kurdan ê seba yewîya kurdan seba ma wezîfeyêk o ke ganî ma bîyarê ca. Seba hesasîyetê înan ma mînetdar ê.

Dewleta tirke verê cuya azade ya kurdan gêna, hêrişê kurdan kena, wazena ke destkewteyanê kurdan çin bikera. Dişmenîya kurdan û yê cinîyan pîya yenê caardene. Nê vengdayîşî ra dima dewlete hêrişê cinîyan ê kurdan kerd. Dewleta tirke paştdayîşê cinîyan ê kurdan, tirkan û dinya ra zaf tersena. 

Ma pê bawer ê ke cinîyê azadîwaştox û demokratîkî yê dinya dost û wayê cinîyan ê kurdan ê. Ma nê vengdayîşê cinîyan sey venhdayîşê sena têkoşînê hemparî yê cinîyan ê vera hêzanê dişmenan zî vînenê. Ma paştî danê têkoşînê demokrasî û azadî yê cinîyan ê dinya. Vengdayîşê şima tim seba ma bibo wezîfeyêk ke ma do bîyarê ca.

Nê esasî ser o ma vanê ke seba vengdayîşê înan ê yewîya neteweyî û haştîya kurdan ma do xîret bikerê ke pratîk de bibê cewab. Ma bi rêzdarî selam kenê ê cinîyan  ke seba demokrasî û azadî têkoşîn kenê.''