Komîteya Tekîlîyanê Teberî ya KCKyî derheqê hêrişê îşxalî yê dewleta tirke yê vera Başûrê Kurdîstanî û tewirê îdareyê PDKyî yê vera nê hêrişî de eşkerayîye daye.

KCKyî hêrişê peyênî yê dewleta tirke ke 23ê nîsan a 2021î de dayî destpêkerdene vist vîrî û vat nê hêrişî seba ke destkewteyê Başûrê Kurdîstanî werte bêrê wedartene yenê kerdene. Eşkerayîye de bale ameye antene nê xususan ser:

Verê çimanê dinya çeka kîmyewîye yena şuxulnayene

''Gerîlayê azadîye yê Kurdîstanî roja verêne ra bi ruhê fedayîkî û qehremanîyêka pîle vera hêrişanê dewleta tirke şerêkê xurtî rayra benê. No xoverdayîşo pîl ê gerîlayanê azadîye yê Kurdîstanî eynî wextî de hedef keno ke destkewteyanê Kurdîstan û Iraqî bipawo. Dewleta tirke verê çimanê heme dinya de heta nika 13 reyî çeka kîmyewîye şuxulnaye û rîyê nayî ra xeylêk gerîlayî şehîd bîyî, bi desan dewî ameyî vengkerdene, bi hezaran hektarê zîretî û herra ramitîye ameyî vêşnayene. Bi nê tewirî welatê ma yo ke cenetê rîerdî yo herra ci ya tewr stratejîke û axpînî ameyî çînkerdene.''

Tewirê PDKyî verê îşxalî akeno

KCKyî bale ante eşkerayîyanê Vervatoxê Grûbe yê PDKyî Vervatoxê Îdareyê Başûrê Kurdîstanî yo ke pabesteyê PKDyî yo ser û vat: ''Nê vervatoxî herinda caardişê berpirsîyarîya xo ya tarîxî û ehleqî de Têgêrayîşê Azadîye yê Kurdîstanî sûcdar kenê ke hêrişanê dewleta tirke meşrû bikerê. Reyna herinda wayîrvejîyayîşê welatperwerîya neteweyîye de sûcanê dewleta tirke nimnenê û cehd kenê ke tesîrê tewirê neteweyî yê şarê ma bişiknê. Rîyê nê tewirê PDKyî ra hêrişê îşxalî vila benê.''

Xozaya Başûrî yena talankerdene

Komîteya Tekîlîyanê Teberî ya KCKyî vist vîrî ke hêzê îşxalkerî rojanê peyênan de Başûrê Kurdîstanî de daran birnenê û xoza texrîp kenê û nê vatî: ''Birnayîşê daran û talan û xespkerdişê ci metodanê kolonyalîzmî ra yew o. Ganî vîranêşero ke dewleta tirke semedê birnayîşê daran nê semedê destsernayîşê nê herran dest pê nê seferê îşxalî kerd. Wazenê heme zengînîya bin û serê erdî ya nê herran talan bikerê, şarê herême erdê ci ra raqilnê û demografîya herême bibedilnê. Metodê dewleta tirke û pratîkê çeteyanê DAÎŞî yew o.''

Vara hêrişê îşxalî wirzê payan ser

KCKyî ard ziwan ke vera îşxalê dewleta tirke yo ke herra Kurdîstanî tarûmar keno ganî sere de Başûrê Kurdîstan û Iraq heme hêzê sîyasîyî yê çar leteyanê Kurdîstanî paştî bidê xoverdayîşê gerîlayan û veng da ke wa her kes vera îşxalê dewleta tirke tewirê xo ramojno.  KCKyî vat: ''Ganî sere de şarê başûrî heme leteyanê Kurdîstanî de şarê ma dahîna bicesaret vera hêrişanê îşxalî tewirê xo ramojno ke nê hêrişî biqedîyê. Kolonyalîzm têna bi xoverdayîş û têkoşînî eşkeno birijîyo. Ganî partîyê sîyasîyî û dezgehê komelê sîvîlî yê Başûrê Kurdîstanî senî ke vera çeteyanê DAÎŞî bi ruhê neteweyî xover da, vera deweleta tirke zî wina tewirê xo ramojnê. Ganî şarê Başûrê Kurdîstanî vera sîyasetê qirkerdişî yê dewleta tirke heme hezê xo yê sîyasî, komelkî, dîplomatîk û leşkerî bifîno dewre û paştî bido xoverdayîşê gerîlayan.''