Cepheyê Turkmenan û komanê selefîyan rayîrê Hewlêr-Kerkûkî trafîkî rê qefilnabi. Vera ney 2yê êlule de kurdan çalakîya protestoyî kerdbî la hêzanê Iraqî hêrişê çalakîkeran kerdbî.

Goreyê xebera Rojnewsî hêrişê hêzanê asayîşê Iraqî de ciwanê kurdî Hawkar Ebdullah, Hisên Sabîr, Heval Star û Hawrê Ekber ameyî qetilkerdene, 15 çalakîkerî zî birîndar bîyî.

Ofîsê Serekwezîrîya Iraqî serebûtî ra dima merkezê Kerkûkî de qedexeyê tebervejîyayîşî îlan kerd.

Kerkûk de pêro kuçe û cadeyî ameyî qefilnayene û serê sibayî qedexe qedîya. Nika rewşe şaristan de asayî ya.

Wina pawîyeno ke ewro Serekwezîrê Iraqî Muhammed Şîya Sûdanî wekîlanê Kerkûkî de pêvînayîş bikero û qewimîyayîşanê peyênan biercno.