Kesê ke 1938 de Qulika Zînî de ameybî qetilkerdene yad bîyî. Wekîla HDPyî ya Mûşî Gulîstane Kiliç Koçyîgît, Endamê Meclîsê Partî yê HDPyî Nesîmî Aday, Rêxistina HDPyî ya Erzînganî, Şubeyê Erzînganî yê PSAKDyî û xeylêk temsîlkar û îdarekaranê rêxistinan tewrê merasîmê yadkerdişî bîyî.

Merasîm de pankartê bi nuşteyê 'Dêrsimî ra heta Zînî ma pêro qirkerdişan şermezar kenê', 'Ma Qirkeşê Zînî xo vîr a nêkerd' ameyî akerdene.

Wekîla HDPyî ya Mûşî Gulîstane Kiliç Koçyîgît merasîm de qisey kerd û vat: ''Armancê qirkeranê Terteleyê Dêrsimî çinkerdişê kurdayetî û elewîtîye bi. Ewro hema zî no tertele bi temamî nêame eşkerakerden. Terteleyê Dêrsimî birînêk a û na birîne pê têrîbîyayîşî weş bena.''

Sekreterê Pêroyî yê Konfederasyonê Yewinanê Elewîyan ê Ewropa (AABK) Erdal Kiliçkayayî zî vist vîrî ke di statuyê Qirkerdişê Qulika Zînî ameyî rijnayene û vat: ''Ma seba testê DNA yê esteyan muracatê Serdozgerîya Erzînganî kerd. La muracat ame redkerdene. Nêwazenê gorê ma zî bibê.''

Serekê Şubeyê Erzînganî yê PSAKDyî Salîh Urunî û Serekê EMEPî yê Erzînganî Haydar Polatî zî ard ziwan ke merasîm de qisey kerd.

Qiseykerdişan ra dima merasîm pê vilakerdişê loqmayan qedîya.

Qulika Zînî de se bibî?

8ê tebaxa 1938î de qasê 100 kesanê bêsûcan wextê serebûtanê Terteleyê Dêrsimî de sînorê Dêrsim-Erzînganî de Qulika Zînî de bi hawayêkê komkîyî ameyî kiştene. O çax herêma Qulika Zînî sey 'qedexe' ameye îlankerdene. Bi nê hawayî meyîtê nê kesan zî nêameyî definkerdene. Hemwelatîyê bînî yê herême zî ameyî surgunkerdene. Serra 1950an de herême de qedexe wedarîya û esteyê qurbananê Qirkerdişê Qulika Zînî ameyî dîyene.

Serra 8ê temmuza 2014î de hetê Înîsîyatîfê Qulika Zînî ra esteyî ameyî komkerdene û cayêkê yadkerdişî ame viraştene.